Ee, kaaˈlannohe; korkaatuno, aye manchinni roore kaaˈlankera dandaannohu ‘dadillitinore jawaachishanno Maganooti.’—2 Qorontoosi 7:6.

•   Jawaante aanno. Maganu qarrakki baalanka haaˈre hoolannoha ikkikkinni, qarrakki dandaatto gede kaaˈlitannohe jawaante aannohe; konni garinni huuccattokkira dawaro qolanno. (Isayaasi 40:29) Maganu huuccattokki macciishshate ayewoteno qixxaawinoho; korkaatuno Qullaawu Maxaafi, “Kaaliiqi [“Yihowa,” Haaro Alame Tiro] dadillunni hiiqqantinorira mule noonsa; hexxo hoogginore gatisannonsa” yaanno. (Faarso 34:18) Wole agurina, Maganu giddokkita coyidhe kuˈla hoogge hinciiccamatto woyite nafa, wodanikki hedo afanno.—Roomu Sokka 8:26, 27.

•   Dancha lawishsha ikkitanno xagge worino. Mittu Qullaawu Maxaafi borreessaanchi Magano togo yee huucciˈrino: “Kaaliiqaˈya ballo, hexxo mudhoommowa heeˈre, atewa hige raareemmo.” Kuni faarsaasinchi hexxo mudhe noo yannara sheshifatinohu, Maganu cubbonke maara hasiˈrannoha ikkinota qaagino daafiraati. Konni daafira kuni faarsaasinchi Magano togo yiino: “Cubbonke kiiroottoha ikkoommero, gatara dandaannohu ayeti? Kayinnilla ate waajjine hajajammeemmohe gede, maarattonkehu ateeti.”—Faarso 130:1, 3, 4.

•   Hexxo uyinonke. Maganu xaa yannara sheshifachishannonketano agurranna, yaandeemmo woy dadillineemmo gede assannonke qarra baalanka huneemmo yee hexxo uyino. Hatti hexxo woˈmitanno woyite, “sainore baala [yaaddonna dadilluno gatikkinni] hambanni; horonta diqaanganni.”—Isayaasi 65:17.

 Qaagiishsha: Yihowa Farciˈraasine Maganu manna kaaˈlannota ammantannoha ikkirono, addi addi dhibba lawishshaho darga assidhino yaaddo xagisiˈrate woˈnaaltanno. (Maarqoosi 2:17) Ikkollana, mitte xaginsanni ogimma bande tini woyyitanno diyineemmo; togoo hajo lainohunni mittu mittunku manchi woyyannosire umisi doodha hasiissannosita ammanneemmo.