Yoonaasi 4:1-11
4 Ikkollana tini Yoonaasi horo dihagiirsiissinosi; hakko daafira lowo geeshsha hanqi.
2 Konnira isi togo yee Yihowa huucciꞌri: “Yihowa, gobbaꞌyara heeꞌre waajjummo coy dikonneeti? Umonni agure Terseesi xooqoommonku iseraati; korkaatuno ati mararattohanna* maaratto Magano, hanqoho muddamattokkiha, ammanamino baxillikki batiꞌrinoha, hattono mararte abbattora hedootto bao agurattoha ikkoottota afoommo.
3 Yihowa, xa anera heeꞌrantenni reya woyyitannoena shiie* ballo.”
4 Yihowano, “Togo ikkite hanqa hasiissannohe?” yee xaꞌmisi.
5 Hakkiinni Yoonaasi katamu giddonni fule, soojjaatoonni mare ofolli. Hakko daase qasiꞌre, katamu ikkannota laꞌꞌara daasu caalira ofolli.
6 Hakkunni gedensaanni Maganu Yihowa Yoonaasi caaꞌlanno gedenna fooggalunni fooliishsho afiꞌranno gede, buqqiicho* fulte Yoonaasi guggushshitanno gede assi. Yoonaasino buqqiicho afiꞌre lowo geeshsha hagiidhi.
7 Ikkollana halaalaanchu Magani layinki soodo daꞌmuulcho soy; daꞌmuulchuno buqqiicho qasi; iseno mooltu.
8 Arrishsho fultuta Maganu giirtannota soojjaati bubbe soy; arrishshono Yoonaasi sammo giirtu; isino daaqi. Shiie yee* duucha hige huucciꞌri; qoleno marro marro hige, “Heeꞌrantenni reya woyyitannoe” yii.
9 Maganu Yoonaasi, “Buqqiichote togo ikkite hanqa hasiissannohe?” yee xaꞌmisi.
Hakkiinni isi, “Ee hanqa hasiissannoe; isinni reyummoro woyyannoe” yii.
10 Yihowa kayinni togo yiisi: “Ati mittu hashshinni lophite mittu hashshinni mooltinotera, daafuroottokkite woy lossoottokki buqqiichora dadillootto.
11 Ikkina ani danchanna busha* bade afinokkihu 120,000 saꞌꞌanno manninna batinye saadansa heedhannohura jawu Nennewete katamira dadilla dihasiissannoe?”
