Yoonaasi 1:1-17
1 Yihowa qaali Amiitay beetti Yoonaasiwa* togo yaanni day:
2 “Kaꞌe, jawa katama Nennewe hadhe, hakko yoote sokka lallawi; bunshensa afoommona.”
3 Yoonaasi kayinni Yihowawiinni xooqe Terseesi haꞌrara kai; isi Iyyoophe dirre Terseesi hadhanno markaawe afiꞌri. Konnira Yihowawiinni xooqe, markaawete noori ledo Terseesi haꞌrara woxe baaxxe markaawe giddi.
4 Hakkiinni Yihowa baaru aana wolqaataame bubbe abbi; jawu dambali kaino daafira markaawe hiiqqantara kaꞌu.
5 Markaawete giddo loossannori lowo geeshsha waajjitino daafira, mittu mittunku kaaꞌlote maganonsa woshshiꞌra hanaffu. Qoleno markaawete hogowo shaashshate, gama uduunne fushshite baaru giddora tuggu. Yoonaasi kayinni markaawete giddiidi kifile* dirre natare goxe no.
6 Markaawete hajajaanchi isiwa mare togo yiisi: “Mayra goxootto? Kaꞌe maganikkiwa higge raari! Miteekke halaalaanchu Magani marare gatisannonkeha ikkannona.”
7 Hakkiinni insa mimmito togo yitu: “Konne qarra abbinonkehu ayetiro anfeemmo gede, amme hixa tuqqinona.” Konnira hixa tuqqitu; hixuno Yoonaasira fuli.
8 Insano togo yitusi: “Konne qarra abbinonkehu ayetiro eeggatena kulinke. Loosikki maati? Mamiinni dayottoho? Gobbakki mamaati? Gosakki hiitteeti?”
9 Isino togo yee qolinsa: “Ani Ibiraawichaho; baaranna moola baatto kalaqinoha gordu Magano Yihowa waajjeemmoho.”*
10 Hatto yiita mannootu roore waajjitu; hakkiinni, “Assoottori maati?” yite xaꞌmitusi. (Insa Yoonaasi kulinonsa daafira, isi Yihowawiinni xooqanni noota affu.)
11 Baaru dambali roore lexxanni haꞌranni noo daafira, “Baaru sammi yaannonke gede ate ma assinummoro woyyanno?” yitusi.
12 Isino togo yee qolinsa: “Kayissine baaru giddo tuggeꞌꞌe; baaruno sammi yaannoꞌne; kuni jawu dambali kainoꞌnehu anenni kainohunni ikkinota afoommona.”
13 Mannootu kayinni ikkituta ikkite laaqidhanni markaawe baaru qacce qolate* woꞌnaaltu; ikkollana dambalu roore lexxanni haꞌrino daafira didandiitino.
14 Hakkiinni Yihowawa higge raartanni togo yitu: “Yihowa, konni manchi lubbo daafira huntootinke ballo! Yihowa, ati baxoottore assoottona, eeggatena keeraanchu manchi mundeera xaꞌmitootinke!”
15 Hakkunni gedensaanni Yoonaasi kayisse baaru giddo tuggu; baaruno shafama aguri.
16 Hakkiinni mannootu Yihowa lowo geeshsha waajjitu; qoleno Yihowara kakkalo shiqishshu; xanono xaꞌnitu.
17 Yihowa Yoonaasi egemmitanno gede mitte jawa qulxuꞌmicho soy; Yoonaasino qulxuꞌmichote godowira sase barranna sase hashsha keeshshi.
