Ruuti 4:1-22
4 Hakkiinni Booeezi katamu waalchiwa haꞌre hakko ofolli. Hatte yannara Booeezi hakkuyra albaanni ragiꞌrate qoosso noosi yii manchi hakkaanni hige saꞌꞌanna lai. Hakkiinni Booeezi, “Jaalaꞌya, amo kawira! Kowiicho ofolli” yiisi. Manchuno daye ofolli.
2 Hakkiinni isi katamu geerri giddonni tonne doore, “Kowiicho ofolle” yii. Insano ofoltu.
3 Booeezino ragiꞌranno mancho togo yii: “Moaabi gobbanni higginoti Naaoomi, rodiinke Elimeleeki baatto hirtaraati.
4 Konne coye atera kulammoranna togo yaammohera hedoommo: ‘Kowiicho noo manninna geerri albaanni gatisiꞌri. Ragiꞌrattoha ikkiro ragiꞌri. Ragiꞌrattokkiha ikkiro kayinni kulie; korkaatuno raggete gamba yoottohu ateeti; ani atenni aaneemmoho.’” Manchuno, “Maahoyye ragiꞌreemmo” yee qoli.
5 Hakkiinni Booeezi togo yii: “Baatto Naaoomiwiinni hidhatto barra, ragge rey manchi suꞌminni woshshantanno gede, rey manchi galte Ruutiwiinnino hidhattota afi.”
6 Ragiꞌranno manchino togo yii: “Umiꞌya ragge hoogammora dandeemmo daafira, ragiꞌra didandeemmo. Ani ragiꞌra dandeemmokki daafira, ane baycho ati umikki ragiꞌri.”
7 Hundi waro Israeelete noo budi garinni, ragiꞌrate qoossono ikko tenne qoosso wolu manchira sayinse uynoonnita leellishate, mittu manchi woleho caammasi fushshe aanno; Israeelete giddo togoo coy* kaajjannohu konni garinniiti.
8 Konnira ragiꞌranno manchi Booeezi “Ati ragiꞌri” yee caammasi fushshi.
9 Hakkiinni Booeezi geerranna manna baala togo yii: “Elimeleeki jajja baala hattono Kiliyooninna Mahilooni jajja baala Naaoomiwiinni hidhaꞌyara techo kiꞌne naqaashshete.
10 Qoleno reyno manchi suꞌmi roduuwisi mereerinninna heeꞌranno katami waalchinni baꞌꞌannokki gede, reyno manchi suꞌmi wirro raggesinni woshshamanno gede, Mahilooni galte Moaabitte Ruuti galteꞌya assiꞌre adhoommo. Techo kiꞌne tennera naqaashshete.”
11 Hatte yannara katamu waalchiwa noo manni baalunna geerru togo yitu: “Ee, ninke naqaashshete! Yihowa minikkira eꞌanno galte Israeelete mine mininori Raaheelinna Liya gede assose. Atino Efiraataho dureessa ikki; Beetelihemeteno suꞌmikki suꞌnaado ikko.*
12 Qoleno Yihowa tenne aja beettonni aannohe sirchi widoonni, minikki Tiimaari Yihudara iltinohu Faareesi mini gedeeha ikko.”
13 Konnira Booeezi Ruuti adhi; iseno galtesi ikkitu. Isino ledose goxi; Yihowa maassiꞌreennase ise godobbe labbaa qaaqqo iltu.
14 Meentuno Naaoomi togo yii: “Techo ragiꞌrannohe mancho afiꞌratta gede assinohe daafira, Yihowa galatamo. Konni qaaqqi suꞌmi Israeelete maccaha ikko!
15 Baxxannohetinna lamala labballi oosonni roortannoheti beettikki beetto iltinoha ikkino daafira, isi* heeshshokki* haaroonsanno; hattono geedhimmakki yannara towaatannohe.”
16 Naaoomino qaaqqo haadhe hanqafidhu; hakkiinni towaaxxa hanaffu.*
17 Olluu meentino suꞌma fushshisi. Insa, “Naaoomira labbaa qaaqqi ilaminose” yee qaaqqoho suꞌma Iyyoobeedi yee fushshi. Isi, Daawiti anna Issey ilinoho.
18 Faareesihu sirchu kali* aane nooho: Faareesi Esirooni ilino;
19 Esirooni Raami ilino; Raami Aminaadaabi ilino;
20 Aminaadaabi Neaasooni ilino; Neaasooni Selmooni ilino;
21 Selmooni Booeezi ilino; Booeezi Iyyoobeedi ilino;
22 Iyyoobeedi Issey ilino; Issey Daawiti ilino.
