Ruuti 2:1-23
2 Naaoomira, minaannisera fiixa ikkannohu mittu dureessu manchi no; suꞌmisi Booeeziiti; isi Elimeleeki ayiddeeti.
2 Mitto barra Moaabitte Ruuti Naaoomi togo yitu: “Gatta haꞌre shaqqille leellishannoe mancho afiꞌrummaro fishsha xinqiꞌreemmana fajjie ballo.” Naaoomino, “Beettoꞌya haꞌri” yituse.
3 Iseno hadhe gate gide middannori hoode hadhanni xinqiꞌra hanaffu. Maganu assa gede, ise martinohu Elimeleeki fiixa ikkinohu Booeezi gatiraati.
4 Hatte yannara Booeezi Beetelihemetenni day; isi gide middannore, “Yihowa ledoꞌne ikko” yii. Insano, “Yihowa maassiꞌrohe” yite qoltu.
5 Hakkiinni Booeezi gide middannorira roorricha ikkino wedellicha, “Tini aja beetto ayete?” yee xaꞌmi.
6 Gide middannorira roorricha ikkino wedellichino togo yee qoli: “Tini aja Moaabitte beetto Naaoomi ledo Moaabi gobbanni dagginote.
7 Ise, ‘Middannori hoode haꞌranni giggilinore* xinqiꞌroni ballo?’ yite xaꞌmidhinoe. Soodo kawira daggu yannanni kayisse shiima geeshsha hallo hiiqqidhara daase eꞌuta agurranna xaa geeshsha gaffi diassitino.”
8 Hakkiinni Booeezi Ruuti togo yii: “Beettoꞌya, macciishshi. Fishsha xinqiꞌrate wole gate hadhooti; wolewa mittowano martooti; soqqamannoe seenniwiinnino faffooti.
9 Gide middannori hadhanno gate laꞌanni hoodensa haꞌri. Wedelluno kissannohekki gede* hajajoommo. Gooꞌrittaro way gambayibbawa marte wedellu xorshite wortinoha agi.”
10 Iseno albasiinni ubbe kumbuulte togo yitu: “Hanni anera kageeshshi elle mayra assittoe? Ani wole gobba mancho ikke heeꞌreenna anera togo mayra qarramitto?”
11 Booeezino togo yee qolise: “Minaannikki reyhu gedensaanni, ballokkira assoottare baala hattono annakki, amakkinna fiixikki heeꞌranno gobba agurte konni albaanni afoottakki dagawa dayootta gara macciishshoommo.
12 Assoottarira Yihowa maassiꞌrohe; qoolisi giddo amadahera isiwa dayottahu Israeelete Magani Yihowa baꞌraaꞌra duushshohe.”
13 Iseno qolte togo yitu: “Mootichaꞌya, soqqamannohe seenni giddo mitte ikka hoogummarono, ane soqqamaanchokki sheshifachishoottoenna jawaachishoottoe daafira assoottoe ellera galaxxeemmahe.”
14 Barra sagalete yanna iillituta Booeezi ise, “Amo kawira, daabbo adhite shiishshino woynenni qasidhe iti” yiise. Konnira ise gide middannori ledo ofoltu. Isino xoxxoo cuꞌme uyse; iseno itte duubbeenna boodu gati.
15 Ise xinqidhara kaꞌuta, Booeezi soqqamaanosi togo yii: “Mindoonni hunduruurro* giddonni nafa xinqidhona qarrissinoontese.
16 Usurroonni nadalla giddonni nafa xinqidhona luqqissine tuttugge; mittuno hooloonkese.”
17 Iseno xinqidhanni hashshi geeshsha keeshshitu. Xinqidhino hayxe gantuta mitto iifete* safaraancho ikki.
18 Hakkiinni gide adhite katama hadhu; balloseno xinqidhino fishsha laꞌu. Ruutino itte duubbe gatisse abbitino sagale uytuse.
19 Balloseno togo yituse: “Techo mama xinqidhanni hositta? Hiikko loossanni hositta? Togoo elle assihe mancho Maganu maassiꞌrosi.” Ruutino, “Techo loosanni hosoommahu Booeezi yinanni manchi gateeti” yite ayewa loossanni hossinoro ballosera kultu.
20 Hatte yannara Naaoomi beettise beetto togo yitu: “Noorirano reytinorirano ammanamino baxille leellishannohu Yihowa maassiꞌrosi.” Naaoomino ledde, “Manchu fiixankeeti. Isi ragiꞌrate qoosso noonsa fiixinke giddo mittoho” yitu.
21 Hakkiinni Moaabitte Ruuti togo yitu: “Qoleno isi, ‘Gideꞌya baala minde gunda geeshsha middannoriwiinni faffooti’ yiinoe.”
22 Naaoomino beettise beetto Ruuti togo yituse: “Beettoꞌya, wole gate hadhe qarramattantenni seennu soqqamaanosi ledo xinqiꞌrittaro woyyannohe.”
23 Konnira ise, hayxenna sinde minde gunda geeshsha Booeezihu seennu soqqamaanowiinni xeertidhukkinni xinqidhu. Ballosewiinnino baxxitukkinni heedhu.
Lekkaalliidi Qaagiishshuwa
^ “nadalla” yaano ikkara dandaanno.
^ Woy “qarrissannohekki gede.”
^ Woy “nadalla” yaano ikkara dandaanno.
^ Mitte iife 22 litire ikkitanno. Guwuursha B14 lai.
