Ruuti 1:1-22
1 Ejjeetto yoo yitanni noo yannara gobbate hude ubbu; mittu manchi galtesinna lame labballi oososi ledo wole gobba mancho ikke heeꞌrara Yihudaho Beetelihemetenni kae Moaabi gobba* haꞌri.
2 Manchu suꞌmi Elimeleekiiti;* galtesi suꞌmi Naaoomiiti;* lame labballi oososi suꞌmi Mahilooniitinna* Kiliyooniiti.* Insa Yihudaho Beetelihemete katamira Efiraata heedhannoreeti. Insa Moaabi gobba dagge hakko heeꞌra hanaffino.
3 Yannate gedensaanni, Naaoomi minaanni Elimeleeki rey; hakko daafira ise lame oosose ledo calla gattu.
4 Gedensoonni oosose Moaabi gobba seenne adhitu; mittete suꞌmi Orfaati; mitteehu Ruutiiti. Insa hakko tonnu diri geeshsha heeꞌri.
5 Hakkiinni lame labballi oosose Mahilooninna Kiliyoonino reytu; Naaoomino lame oososenna minaannase shiidhe calla gattu.
6 Naaoomi Moaabi gobbara heedhe Yihowa mannisira sagale* ee alba higinonsata macciishshitu; hakko daafira ise oosose seenni ledo Moaabinni gobbase higgara kaꞌu.
7 Ise lamente oosose seenni ledo heedhanno basenni agurte hadhu. Insa Yihudu gobba higanni doogote heeꞌreenna,
8 Naaoomi lamenta oosose seenne togo yitu: “Amme, lamenti ama amaꞌne minira higge. Reytu minaannuwiꞌneranna anera ammanamino baxille leellishshininte gede, Yihowa kiꞌnerano ammanamino baxille leellishoꞌne.
9 Yihowa kiꞌne lamenta, minaanniꞌne mine teessine* heedhinanni gede assoꞌne.” Hakkiinni sunqitunsa; insano qoonqonsa naggi asse wiꞌli.
10 Insa kayinni, “Deeꞌni, ate ledo mannikkiwa haꞌneemmo” yiise.
11 Ikkollana Naaoomi togo yitunsa: “Higge seenneꞌya. Ane ledo mayra hadhinanni? Xa ani kiꞌnera galte ikkitanno ooso ila dandeemmani?
12 Higge seenneꞌya. Ani lowo geeshsha geedhoomma daafira xaate mine assiꞌra didandeemma. Techonni minaanna afiꞌratenna ooso ilate hexxo heedhuero nafa,
13 insa lophita geeshsha agadhitinannini? Insa agadhitinanni mine assidhinikkinni keeshshitinannini? Seenneꞌya, kuni ikkannokki coyeti; Yihowa alba shawwu yiinoe* daafira kiꞌnere hedeemma woyte lowo geeshsha xissiisiꞌreemma.”
14 Xaano insa qoonqonsa naggi asse wiꞌli; hakkiinni Orfa ballose sunqite agurte higgu. Ruuti kayinni isewiinni baxxa hoogate murcidhu.
15 Konnira Naaoomi togo yitu: “Kuneeti! Gunnitte mateekki dagasewanna magannasewa higgino. Atino ledose higi.”
16 Ruuti kayinni togo yitu: “Atewiinni baxxe agure haꞌreemmahe gede huuccitootie; ati haꞌrittawa haꞌreemma; galittawa galeemma. Mannikki mannaꞌya ikkanno; Maganikkino Maganoꞌya ikkanno.
17 Reyattawa reyeemma; hakko madaarameemma. Reyo agurranna wolu aye coyno atewiinni badiero Yihowa qorichishoe; hakkiinni sainoreno assoe.”
18 Naaoomi, Ruuti ise ledo haꞌrate murcidhe kaꞌinota affuti, agurte higganno gede ise huucca agurtu.
19 Konnira lamenti mitteenni Beeteliheme haꞌri. Beeteliheme iillanni heeꞌrennanni, insanni kainohunni katamu woꞌmu shaaꞌmali; meentuno, “Tini Naaoomi diꞌꞌikkitino?” yii.
20 Iseno meento togo yitu: “Naaoomi* yitine woshshitinoonteꞌꞌe. Woꞌmanka Dandaanno Magani heeshshoꞌya lowo geeshsha qaraartinota assino daafira Maara* yitine woshsheꞌꞌe.
21 Kawiinni haꞌrumma waro lowori nooe; Yihowa kayinni mulla anganni higeemma gede assinoe. Naaoomi yitine woshshitinoonteꞌꞌe; korkaatuno Yihowa alba shawwu yiinoe; Woꞌmanka Dandaanno Magani qarra abbinoe.”
22 Naaoomi Moaabitte beettise beetto Ruuti ledo Moaabi gobbanni higginohu konni garinniiti. Insa Beeteliheme iillinohu hayxu mido woggaraati.
Lekkaalliidi Qaagiishshuwa
^ Woy “qoqqowo.”
^ “Maganiꞌya Mootete” yitanno tiro afiꞌrino.
^ “Hagiirreꞌya” yitanno tiro afiꞌrino.
^ “Gelfa; xiwamaancho” yitanno tiro afiꞌrinohu Ibiraawootu qaalinni daynoha ikkikkinni digatino.
^ “Uwannoho; Isiri Kainoho” yitanno tiro afiꞌrino.
^ Noo gedeenni tirriro, “daabbo.”
^ Noo gedeenni tirriro, “fooliishshidhine.”
^ Noo gedeenni tirriro, “Yihowa anga ane aana kaꞌino.”
^ “Hagiirreꞌya” yitanno tiro afiꞌrino.
^ “Qaraaro” yitanno tiro afiꞌrino.
