Ruuti 3:1-18
3 Hakkiinni ballose Naaoomi togo yituse: “Beettoꞌya, teesse heeꞌratta gede atera minaanna* hasa hasiissannoe.
2 Booeezi fiixanke diꞌꞌikkino? Seennu soqqamaanosi ledo xinqiꞌrattara fajjinohehu isooti. Isi techo hawarro ayiddummete hayxe gaꞌnanno.
3 Konnira hayishshidhe suꞌnaado zayte buudhi; hakkiinni uddano uddidhe* ayiddumme mari. Manchu itenna age kaꞌꞌa geeshsha hakko noottata afoonkehe.
4 Goxanno woyte goxanno baycho seekkite lai; hakkiinni marte diphanosi fante lekkaallosiinni goxi. Isino assa hasiissannohere kulannohe.”
5 Iseno, “Yiittaere baala asseemma” yite qoltu.
6 Konnira ise ayiddumme hadhe ballose assi yitinosere baala assitu.
7 Booeezino itenna age kaihu gedensaanni hagiidhi. Hakkiinni isi haꞌre minde duunnoonni gidi mule goxi. Hakkunni gedensaanni ise yaassanni dagge uddanosi fante lekkaallosiinni goxxu.
8 Manchuno hashshu taaloote goxinowiinni huxiꞌranni kai; midaado higanno woyte mitte mancho lekkaallosiinni goxxe noota afi.
9 Isino, “Ati ayeti?” yee xaꞌmise. Iseno, “Ani soqqamaanchokki Ruutiiti. Ragiꞌrate qoosso noohehu ate ikkootto daafira, ane soqqamaanchokkira uddanokki diwie” yitusi.
10 Hatte yannara isi togo yiise: “Beettoꞌya, Yihowa maassiꞌrohe. Konni albaanni leellishoottahu ammanamino baxillinni xaahu rooranno; korkaatuno buxicho woy dureessa ikkirono qeedhichunniwa dihaꞌrootta.
11 Konnira beettoꞌya, waajjitooti. Katamaho noo manni baalu* ati dancha beetto ikkoottata afino daafira yiittare baala asseemmohe.
12 Garaho anera ragiꞌrate qoosso nooe; kayinni anenni roore ragiꞌrate qoosso noosihu muli fiixi no.
13 Techo hashsha kowiicho gali; soodiro isi ragiꞌreemmohe yiiro danchaho! Ragiꞌrannohe. Kayinnilla ragiꞌrate maahoyye yaa giwiro, heeshshote Magani Yihowanni xaareemmona, ani umiꞌya ragiꞌreemmohe. Sooda geeshsha kowiicho goxi.”
14 Konnira ise sooda geeshsha lekkaallosiinni goxxu; hakkiinni mittuno afannosekki gede tunse heeꞌreenna kaꞌu. Isino, “Mitte mancho ayiddumme dagginota mittuno afoonke” yii.
15 Booeezino, “Uddanokki qoꞌli” yiise. Iseno uddanose qoꞌliteenna lee safaraancho* hayxe wore baysiisise; gedensoonni isi katama haꞌri.
16 Iseno ballosewa hadhu; balloseno, “Beettoꞌya haꞌritta haja hiissiritta?”* yite xaꞌmituse. Ruutino manchu assinosere baala kultuse.
17 Iseno ledde, “‘Ballokkiwa mulla anganni hadhooti’ yee konne lee safaraancho hayxe uynoe” yituse.
18 Hatte yannara Naaoomi togo yituse: “Beettoꞌya kuni coy mare fulannowa afatta geeshsha cincite agari; korkaatuno manchu techonni konne coye jeefo ganikki sammi yee diofollanno.”
