Daniel 10:1-21
10 Kinsa wataña Persia rey Ciro kamachikushaqtinmi,+ Beltsasar+ sutiyoq Danielqa juj rijuriyta rikurqan. Chay rijuriyqa cheqaqmi karqan, jatun atipanakuy kananmantataqmi karqanpas. Danielqa allintan entienderqan chay rikusqan imaninanchus chayta, chayta entiendenanpaqqa yachaytan chaskirqan.
2 Chay p’unchaykunan noqa Danielqa kinsa semana junt’a sinchi llakisqa kasharqani.+
3 Chay p’unchaykunapiqa manan sumaq mijunakunata mijurqanichu, manan aychatapas mijurqanichu ni vinotapas ujarqanichu, kinsa semana junt’an aceitewanpas mana cuerpoyta llusikurqanichu.
4 Ñaupaq kaq killapi iskay chunka tawayoq p’unchaypin Tigris* jatun mayu+ patapi kasharqani.
5 Chaypi kashaqtiymi qonqaylla rijuriruwan juj runa, payqa lino p’achayoqmi kasqa,+ chumpintaq kasqa Ufaz lado ch’uya qorimanta.
6 Cuerpontaq crisólito rumi jina kasqa,+ uyantaq rayoq llifllikisqan jina k’anchasqa, ñawinkunapas nina rauray jinan kasqa, chakinkunawan makinkunawantaq llusk’allaña cobre jina kasqa,+ rimasqanpas askha runakunaq rimasqan jinan kasqa.
7 Noqallan chaytaqa rikurqani, noqawan kaq runakunaqa manan rikurqankuchu.+ Chaywanpas chay runakunaqa manchakuymantan khatatatarqanku,* jinaspa pakakunankupaq ayqekurqanku.
8 Jinan noqaqa sapallay qhepakurqani. Chay rijuriyta rikuqtiymi kallpayraq chinkaripurqan, uyaypas q’ellullañan kasharqan. Manapunin kallpayqa kapurqanchu.+
9 Chay runata rimaqta uyarishaspan noqaqa pampaman wijch’ukuspa uyanpamanta misk’ita puñurapusqani.+
10 Chayllamanmi payqa makinwan aysariwaspa rijch’arichiwarqan,+ jinan yanapawarqan makiywan taunaykukuspa qonqoriykukunaykama.
11 Chaymantataq niwarqan:
“Daniel, Diospa ancha munasqan runa,+ uyariway imatachus nisayki chayta. Sayariy, Diosmi qanman kachamuwan”, nispa.
Chayta niwaqtinmi noqaqa khatatataspa sayarirqani.
12 Jinan payqa niwarqan: “Daniel, ama manchakuychu,+ chaykunata entiendenaykipaq kallpachakusqaykimantapachan, Diosniykiq ñaupanpi k’umuykukusqaykimantapachan imachus mañakusqaykiqa uyarisqa karqan. Mañakusqaykiraykun noqaqa kaypi kashani.+
13 Manaraq kayman jamushaqtiymi ichaqa Persia nación umalli+ iskay chunka jujniyoq p’unchayta jark’amuwan. Ichaqa jatun umallikunamanta jujnin umalli Miguelmi*+ jamuspa yanapamuwan; noqaqa Persia reykunaq kasqanpin kasharqani.
14 Tukukuy p’unchaykunapi imachus llaqtaykita pasanqa chayta allinta entiendechiqmi jamushani.+ Imakunachus rikusqaykiqa jamuq tiempopiraqmi junt’akunqa”,+ nispa.
15 Chay niwasqanta uyarispan noqaqa pampata qhawaspa mana rimariytapas atirqanichu.
16 Jinan runaman rijch’akuqqa simiyta llamiykuwarqan,+ chaymi noqaqa ñaupaypi sayashaqta nirqani: “Señorníy, kay rijuriyta rikuspan manchakuymanta khatatatashani, manan kallpaypas kanchu.+
17 Señorníy, kallpawañun kashani, manañan samariytapas atishanichu.+ Chhaynaqa, ¿imaynatataq kay kamachiykiri señorniywanri rimayman?”,+ nispa.
18 Jinan runaman rijch’akuqqa jujmanta llamiykuwaspa kallpachawarqan.+
19 Jinaspa niwarqan: “Diospa ancha munasqan runa,+ ama manchakuychu.+ Allillanmi kanki.+ Kallpachakuy, arí, kallpachakuy”, nispa. Chayta niwaqtinmi noqaqa kallpayoq kapurqani, jinaspa nirqani: “Señorníy, kallpacharuwankin, kunanqa rimapayaway”, nispa.
20 Paytaq niwarqan: “Kunanqa Persia nación umalliwan maqanakuqmi kutisaq.+ Ripuqtiyqa Grecia nación umallin jamunqa. ¿Yachankichu imarayku qanman jamusqayta?
21 Noqan willasayki cheqaqta willaq qelqapi imachus qelqasqa kashan chayta. Kaykunapiqa manan pipas yanapawaqniy kanchu, aswanpas umalliykichis+ Miguel-llan.+
