“A le ngarngii a soal lokiuellek, e le chitii a klechad er ngii e . . . loltirakl er ngak ra bek el sils.”​—LUKAS 9:23.

1, 2. Ngerang me ngklou a ultutelel a dolatk er sel uchul me ngkired el oltirakl er “a Kristus”?

 NGULTEREKOKL el kmal dmeu a rengul a Jehovah el omes er kemiu el dirk mlo mesuub me kemiu el ngeasek el mla me teloi er a cheldebechelel el ngar er tia el chutem! Me sel molemolem el mesuub er a Biblia, e mo er aike el bek el miting er a Rekristiano, e molengeriakl er a klemedengei er kau el kirel a klemerang el ngar er a Tekingel a Dios, e ngkirem el melebedebek er sel okedongel a Jesus el kmo: “A le ngarngii a soal lokiuellek, e le chitii a klechad er ngii e le chelngii a kerus er ngii loltirakl er ngak ra bek el sils.” (Lukas 9:23) A belkul a tekingel a Jesus a kmo ke mo choitii a klechad er kau e mo oltirakl er ngii. Me ngklou a ultutelel a bo dolatk er a uchul e ngkired el mo oltirakl er “a Kristus.”​—Matteus 16:13-16.

² E kuk mekerang el kired kid el mla mo betok el rak el doltirakl er a Jesus Kristus? Kede muklatk el “mengal melemolem er sel mngarngii er chelechang.” (1 Thesalonika 4:1, 2) Me a dirk blo dodengelii a mera el omengull me a demeketeketang el ngar er ngii, e a bo dolebedebek aike el uchul e kede oltirakl er a Jesus a ngosukid el mo oltaut er sel uleklatk er a Paulus e mo oltirakl er a Jesus er a bek el sils. Kede mo mesaod a eim el uchul e ngkired el oltirakl er a Kristus.

Olekes er a Deluill er Kid me a Jehovah

3. Ngoeak a ngera el eru el rolel e ngsebeched el mo medengelii a Jehovah?

³ A apostol el Paulus er a longedecheduch er a rechad er a Athen e ng “mlo dechor ra blngel a Areopagus,” e dilu el kmo: “[A Dios a] ulelterekokl a blingelel a taem ma sakai ra le kiei er ngii, e rirelleterir el bo le blak a rengrir losiik ra Dios, el leko di bo lolechesuar e te metik er ngii. E merang, ngii a diak le cheroid ra di derta er kid.” (Rellir 17:22, 26, 27) Ngsebeched el osiik er a Dios e mera el mo medengelii. El ua tiang, sel domes a blebelel a Dios e ngsebeched el suub a betok el kirel a blekerdelel me a omerellel el rullid el mo mereng a sulel ngika el Ulemeob. (Rom 1:20) Ngdirrek el sebeched el mesuub a betok el tekoi el kirel a Jehovah el ngar er a Tekingel el Biblia. (2 Timoteus 3:16, 17) Me sel deblechoel el ‘melebedebek a rokui el urerel’ me a ‘mesisiich el omerellel,’ e ngsebeched el kmal mo ungil el medengelii a Jehovah.​—Psalm 77:12.

4. Ngmekerang a doltirakl er a Kristus er a bek el sils a ngosukid el mo kmes a deluill er kid me a Jehovah?

⁴ A kmal ungil el rolel e kede mengal mo kmeed er a Jehovah a sel doltirakl er a Kristus. Ka di molatk er sel klebkall el lulebang a Jesus er a lengar er a bita er a Demal “er uchei ra le meruul a belulechad”! (Johanes 17:5) Ngii a “uchelel a ikel ulebeob ra Dios.” (Chocholt 3:14) E “ulemuchel el mechell loeak uchei ra rokuil bleob” me ngkiliei el kmal kemanget el taem el ngar er a eanged el obengkel a Demal el Jehovah. Me a uchei er a lemei er tia el chutem, e ngmle dmeu a rengul el oureor el obengkel a Demal el mlo uchul a kmal kmes el deluill er tir el terung. A Jesus a dimlak di lomes a rolel a Demal a loruul a tekoi e lomtab a tekoi el ngar er a rengul me a blekerdelel e lemerekong, e ngdirrek el silechedekl er a rengul  aike el tekoi el lesiluub er a Demal e mlo oltirakl er Ngii. Sei a uchul, me ngika el bekongesenges el Ngalek a kmal di mlo ua Demal​—me a Biblia a melekoi el kirel el kmo ng “chokesiul a diak le meues el Dios.” (Kolose 1:15) Me a doltirakl er a Jesus er a bek el sils, e ngsebechel el mo er ngii a kmes el deluill er kid me a Jehovah.

Molemolem el Oukerebai er a Jehovah

5. Ngerang a mo ngosukid el melemolem el oukerebai er a Jehovah, e ngera uchul?

⁵ A Dios a rirellid ‘el ua teletelel’ el sebeched el olecholt aike el blekerdelel. (Genesis 1:26) A apostol el Paulus a ulemeklatk er a Rekristiano el kmo: “Bo mteletelir ar ngalek el le betik a rengul er tir a Dios, el oltirakl ra Dios.” (Efesus 5:1) A doltirakl er a Kristus a ngosukid el mo oukerebai er a Demad el ngar er a eanged. Tiang a uaisei e le Jesus a mle sebechel el olecholt a uldesuel me a tekoi el ngar er a rengul me a blekerdelel a Dios el kuk ngar er a uchei er a ngii di el chad. Me a Jesus er a lengar er tia el chutem, e ngdimlak el di lolecholt er a ngklel a Jehovah e lemerekong, e ngdirrek el ulemeketakl er sel mera el blekerdelel a Dios. (Monguiu er a Matteus 11:27.) A Jesus a mirruul el uaisei el oeak a tekingel me a omerellel me a osisecheklel me a kerebai er ngii.

6. A osisecheklel a Jesus ngomeketakl a ngerang el kirel a Jehovah?

⁶ A Jesus a olisechakl er kid er aike el tekoi el soal a Dios a doruul me a uldesuel el kirir tirke el mengull er ngii. (Matteus 22:36-40; Lukas 12:6, 7; 15:4-7) El ua tiang, uriul er a lolekoi er a ta er aike el Teruich el Llach el kmo​—“lak bo le melaok a rengum”—​e a Jesus a milsaod er a osengel a Dios el kirel aike el tekoi el ngar er a rengul a chad er a uchei er a lrebet er a klengit. Ngdilu el kmo: “Ngikel mo nguibes e omes ra redil a mla rullii a laokerreng ra chelsel a rengul.” (Exodus 20:14; Matteus 5:27, 28) Uriul er a lolekoi er sel cheleuid el tekingir a Refarisee el kirel tia el tekoi el ngar er a Llach el kmo​—“bo le betik a rengum ra ngar bita er kau e mouketui ra cherrouem”—​e a Jesus a mileketeklii a uldesuel a Jehovah el kmo: “Bo le betik a rengmiu rar cherrouiu e moluluuch el kirir ar uldechelakl er kemiu.” (Matteus 5:43, 44; Exodus 23:4; Levitikus 19:18) A bo dodengelii a uldesuel a Dios el kirel aike el soal a bo doruul a ngosukid el melemolem el oukerebai er ngii.

7, 8. Ngera el blekerdelel a Jehovah a desuub er a kerebil a Jesus?

⁷ A Jesus a dirrek el ulechotii a teletelel a Demal el oeak a kerebai er ngii. Me sel donguiu er a chisel a Jesus el ngar er a Evangkelio el kmo ngmlo chubteterir a remechebuul me a rengar er a ringel, e miltirm a rengul er a rechapostol er ngii e le tir el ulekebai er a rengalek, e ngsebeched el mesa osengel a Demal el kirel aika el tekoi. (Markus 1:40-42;  10:13, 14; Johanes 11:32-35) Molatk er a omerellel a Jesus el mle sebechel el omeketakl aike el meklou el blekerdelel a Dios. Aike el mengasireng el tekoi el lurruul a Jesus a olecholt er sel klou el klisiich el mle sebechel el ousbech er ngii. Engdi ngdimlak el ousbech er sel klisiich el di mo uchul a klungiolel me a lechub e lousbech er ngii el melemall er a rebebil. (Lukas 4:1-4) Me sera loldik er a remerechorech a rengrir el chad er a siobai el ngar er a templo, e ngulechotii a uldesuel el kirel a llemalt! (Markus 11:15-17; Johanes 2:13-16) A osisecheklel me a ungil el cheldechedechal el olekar a rengrir a rechad a ochotii el kmo a llemesel a rengul a Jesus a “kuk ngaruchei ra Salomo.” (Matteus 12:42) A bltikerreng el lulechotii a Jesus er a letengetengii a klengar er ngii el kirir a rebebil a kmal ungil a omesodel el ngar er a Biblia el kmo “ngdiak a chad el oba guk kloul bltikerreng” el uai tiang.​—Johanes 15:13.

⁸ A Ngelekel a Dios a mle cherrungel el omtechei er a Demal er a rokui el tekoi me ngmle sebechel el melekoi el kmo: “Ngikel mla mesekak a mla mesa Chedam.” (Monguiu er a Johanes 14:9-11.) Me a doltirakl er a Kristus e ngdi ua doukerebai er a Jehovah.

A Jesus a Ngike el Ngellitel er a Jehovah

9. Ngmilekerang e oingerang e a Jesus a mlo Ngellitel er a Dios?

⁹ Ka molatk a tekoi el dilubech er a Ongetruich el buil er a 29 C.E. er sel taem er a le 30 a rekil a Jesus e bo lomes er a Johanes el Techolb. “Ma Jesus er a le metechelbang, e ngdimlemereched el tokerekl ra ralm, e mesang, ngulebkais a eanged e ngmesa Reng ra Dios el ua belochel el me metengel er a bebul.” Seikid el taem e ngmlechilt el Kristus, me a lechub e ng Messias. E a Jehovah a ulterekeklii el kmo a Jesus a Ngellitel er Ngii er a ledu el kmo: “Ngikang a betik ra renguk el Ngelekek, el odeuir a renguk.” (Matteus 3:13-17) Tiang a meskid a ungil el uchul e ngsoad el mo oltirakl er a Kristus!

10, 11. (a) Ngoeak a ngera el rolel e a dui el “Kristus” a lousbech er ngii el obengkel a ngakl el Jesus? (b) Ngera uchul me ngkired el oltirakl er a Jesus Kristus?

¹⁰ Ngar er a Biblia, e a dui el “Kristus” a lousbech er ngii el mesaod a kakerous el deruchellel a Jesus: el Jesus Kristus me a Kristus Jesus me a Kristus. Me ngii el Jesus a uluusbech er sel kot el dial el “Jesus Kristus”​—el ngakl a okiu uchei er a dui. Me a loluluuch el mo er a Demal, e ngdilu el kmo: “A diak a ullebengelel klengar tiakid el bo lodengelkau el dital meral Dios, ma Jesus Kristus el ngikel mulderchii.” (Johanes 17:3) Tiang a meketeklii el kmo ngii a mlodurech er a Dios e mlo Ngellitel er Ngii. E sel sekum a dui a oeakuchei er a ngakl, el ua “Kristus Jesus,” e a omelisiich a ngar er a deruchellel a Jesus. (2 Korinth 4:5) E sel dousbech er a tekoi el “a Kristus,” e tiang a ta er a rolel e kede melisiich er a deruchellel a Jesus el ngike el Messias.​—Rellir 5:42.

¹¹ Me a ngii di el ngera el usbechel tia el dui el “Kristus” el obengkel a ngakl el Jesus, e ngomeketakl er tia el klou a ultutelel el klemerang el tekoi el kmo: A Ngelekel a Dios alta ngmlodurech el me er tia el chutem el ua chad e ulemerk er a soal a rengul a Demal el me er kid, engdi ngii a dimlak el di el hutsu el chad me a lechub e di ble leprofet  e lemerekong, ngii a Ngike el Ngellitel er a Jehovah. Me ngkmal kired el mo oltirakl er Ngii.

A Jesus a Di Ta el Rael el Mo er a Osobel

12. A uchei er a kodellel a Jesus, e ngera el klou a ultutelel el tekoi a ledillii el mo er a apostol el Thomas?

¹² A ta er a klou el uchul e kede melemolem el oltirakl er a Messias a mlocholt er a tekingel a Jesus el mo er a reblak a rengrir el apostol er ngii er a uchei er a kodellel. Me a longer er a keril a Thomas el kirel sel tekingel el mo cheroid er tir e mo mengetmokl er a delengcheklir, e a Jesus a dilu el kmo: “Ngak a rael, e klemerang, e klengar; me ngdiak a chad el mora Chedam a lak lokiu ngak.” (Johanes 14:1-6) A Jesus a milengedecheduch el mo er tirke el 11 el blak a rengrir el apostol er ngii. Ngtilbir el mo mesterir a delengcheklir er a eanged, me nguaisei aika el tekingel a dirrek el ngar er ngii a ultutelel el mo er tirke el melatk el mo kiei er tia el chutem el mo cherechar. (Chocholt 7:9, 10; 21:1-4) Ngmekerang e uaisei?

13. Ngoeak a ngera el rolel e a Jesus a “rael”?

¹³ A Jesus Kristus a “rael,” el belkul a kmo ngdi ngii el tang a kired el okiu ngii el mo er a Dios. Me a doluluuch el di oeak a ngklel a Jesus el oltirakl er a soal a rengul a Jehovah, e ngulterekokl a rengud el kmo a Chedam a mo meskid sel ongtid. (Johanes 15:16) A Jesus a dirrek el “rael” el ngar er a kuk ta er a rolel e le a klengit a mla eklii a klechad er a Dios. (Isaia 59:2) A Jesus a mlo “mengkengkii a klengar er ngii el ngbetir ar betok.” (Matteus 20:28) Sei a uchul me a Biblia a mesaod el kmo: “Ma rsechel a Jesus . . . a kikidid ra bek el klengit.” (1 Johanes 1:7) A Ngalek a mla kutmeklii a rolel a budech er a delongeled kid me a Dios. (Rom 5:8-10) Me a dotuil a klaumerang er kid er a Jesus e dolengesenges er ngii, e ngsebechel el mo er ngii a ungil el deluill er kid me a Dios.​—Johanes 3:36.

14. Ngmekerang a Jesus e “klemerang”?

¹⁴ A Jesus a “klemerang” e le ngmle blechoel el melekoi a klemerang, e uleltaut er a klemerang er a klengar er ngii, e a betok el ulaoch el kirel a Messias a mlotaut er a Jesus. A apostol el Paulus a milluches el kmo: “Ele rokuil telbilel a Dios a di mlo Choi er ngii.” (2 Korinth 1:20) Ngmo lmuut er a “chungel a ikel mereku lungil tekoi” el ngar er a Llach er a Moses a mlo klemerang el tekoi el okiu a Kristus Jesus. (Hebru 10:1; Kolose 2:17) A Jesus a ngike el uchul a rokui el ulaoch, e aike el ulaoch a omeketakl er sel deruchellel el oltaut er a moktek er a Jehovah. (Chocholt 19:10) Me a bo el sebeched el ngmai a klungioled er a otutel a moktek er a Dios, e ngkired el oltirakl er a Messias.

15. Ngoeak a ngera el rolel e a Jesus a “klengar”?

¹⁵ A Jesus a “klengar” e le ngulsebelii a klechad el oeak a rsechel, e a diak a ulebengelel el klengar a sengk el mla er a Dios el mo er a klechad el okiu a “Kristus Jesus el Rubak er kid.” (Rom 6:23) A Jesus a dirrek el “klengar” el mo er tirke el ulekoad. (Johanes 5:28, 29) Ka di molatk el kirel aike el bo loruul sel bo le Ngar er a Bab el Prist er a chelsel a Omengederederel el Ta el Telael el Rak. Nguaisei, ngmo mesterir a rechederdellel el ngar er tia el chutem a diak a ulebengelel el ngubet er a klengit me a kodall!​—Hebru 9:11, 12, 28.

16. Ngera uchul me ngkired el oltirakl er a Jesus?

¹⁶ A nger er a Jesus el mo er a keril a Thomas a ngar er ngii a ultutelel el me er kid. A Jesus a  rael e klemerang e klengar. A Dios a uldureklii el me er a beluulechad me a beluulechad bo el sobel el oeak ngii. (Johanes 3:17) E diak a chad el sebechel el mo er a Dios a lak lokiu a Jesus. A Biblia a meketeklii el kmo: “Ngdiak cholsobel el ngara ngodech, ele ngdiak a ngodech el ngakl el ngar cheungel a eanged el le bilsterir ar chad el bo de sobel er ngii.” (Rellir 4:12) Me a ngii di el ngera el tekoi el duluumerang er ngii er a ngar er a mong, e ngrolel a llomeserreng a doumerang er a Jesus e doltirakl er ngii me bo el sebeched el mo nguu a klengar.​—Johanes 20:31.

A Dios a Mellach er Kid el Mo Orrenges er a Kristus

17. Ngera uchul me ngklou a ultutelel el dolengesenges er a Ngelekel a Dios?

¹⁷ A Petrus me a Johanes me a Jakobus a milsang a Jesus er a lemengodech a teletelel. Ngar er seikid el taem, e te rirengesii a ngor el mla er a eanged el melekoi el kmo: “Ngika Ngelekek, el kngileltii, morrenges er ngii!” (Lukas 9:28, 29, 35) Ngklou a ultutelel a doltirakl er sel llach el mo olengesenges er a Messias.​—Monguiu er a Rellir 3:22, 23.

18. Ngmekerang a dorrenges er a Jesus Kristus?

¹⁸ A dolengesenges er a Jesus e ngkired el “melanges” er ngii e ‘melatk’ er a kerebil. (Hebru 12:2, 3) Misei e “ngkired el lmuut el mo blak a rengud el melelem” aike el tekoi el bla dechuiu el kirel el ngar er a Biblia me aike el babier el mla er “ngikel blak a rengul e mellomes a rengul mesiou” me aike el tekoi el dorrenges el kirel el ngar er aike el miting er a Rekristiano. (Hebru 2:1; Matteus 24:45) Kid el sib er ngii a soad el mo orrenges e oltirakl er a Jesus.​—Johanes 10:27.

19. Ngera mo ngosukid el melemolem el oltirakl er a Kristus?

¹⁹ Ngsebeched el melemolem el oltirakl er a Kristus er a chelsel a ngii di el ringel? Chochoi, ngsebeched a lsekum e kede “oukerebai a diak a rekdel losisechakl” el oltaut a tekoi el bla desuub el “ngara kloumerang ma bltikerreng ra Kristus Jesus.”​—2 Timoteus 1:13.

Ngera Ke Siluub?

• Ngera uchul me a doltirakl er “a Kristus” e ngmo kmes a deluill er kid me a Jehovah?

• Ngera uchul me a doukerebai er a Jesus e ngdi ua doukerebai er a Jehovah?

• Ngmekerang a Jesus e “rael, e klemerang, e klengar”?

• Ngera uchul me ngkired el orrenges er Ngike el Ngellitel er a Jehovah?

[Aike el Ker er a Suobel]

[Siasing er a 29 el llel]

A osisecheklel a Jesus a ulemeketakl er sel ngar er a bab el uldesuel a Jehovah

[Siasing er a 30 el llel]

Ngkired el mo blak a rengud el oltirakl er Ngike el Ngellitel er a Jehovah

[Siasing er a 32 el llel]

A Jehovah a dilu el kmo: “Ngika Ngelekek . . . morrenges er ngii”