SERA taem er a rechapostol el mei, e a Dios a millilt er a delongelir a rechad a ulterekokl el ildisir a reblak a rengrir el Kristiano, el merodel er tir el mo ngelekel. Tirke el Kristiano a mo melechesuar a kmal klou el omelodech er a klengar er tir a uchul e a Tekingel a Dios a mesaod el kmo te mechell el beches. A moktek er tiang a mo mengetmokl er tirke el mla mechell el beches el mesiungel a Dios el mo mengedereder el ngar er a eanged. (2 Timoteus 2:12) Me a bo el sebechir el mengedereder, e ngkirir el mekiis er a kodall el mo nguu a klengar el ngar er a eanged. (Rom 6:3-5) Ngar er a eanged, e “te mo mengedereder ra belulechad” el obengkel a Kristus.​—Chocholt 5:10; 11:15.

Engdi, a Tekingel a Dios a dirrek el melekoi el kmo te ngar er ngii a rebebil el ileakl er tirke el mechell el beches, el mo nguu a diak a ulebengelel el osobel. Ngar er a Biblia (el ngar er a Chuodel el Renged me a Beches el Testament), e ngmeldung el kmo a Dios a mo olsobel er a eru el cheldebechel er a rechad​—el kekerei el cheldebechel a mo er a eanged el mengedereder e a klou el cheldebechel el tir a chederdall er a Renged a mo kiei er tia el chutem. Ka momtab a tekingel a apostol el Johanes el mo er a rekldemel er a klaumerang el mla mechell el beches. Ngmillekoi el kirel a Jesus el kmo: “Ngii a tngakireng el tenget el kirel a kngtid, el diak di le kirel a kngtid [el kekerei el cheldebechel] e le merekong, e ngkirel a kngtil a belulechad el rokir [el klou el cheldebechel].”​—1 Johanes 2:2.

A apostol el Paulus a dirrek el milluches el kmo: “Le bleob a kmal oureng el mengiil ra demiir ar ngelekel a Dios [el kekerei el cheldebechel].” (Rom 8:19-21) Ngera belkul a tekingel a apostol el Johanes me a Paulus? Ngbelkul a kmo: Tirke el mechell el beches a mo chedal sel kabelment el ngar er a eanged. E ngera mo urerir? Te mo mesterir a rebetok el milliol el chad el mo kiei er tia el chutem, el tir a chederdall er a kabelment er a Dios, a diak a ulebengelel el klengeltengat. Sei a uchul, me a Jesus a ullisechakl er a redisaiplo er ngii el mo meluluuch el kmo: “A rengedem le mei, ma uldesuel a rengum le meruul ra belulechad el ua chomerellel ra eanged.”​—Matteus 6:10.

A Chuodel el Renged a melekoi el kirel a eru el cheldebechel er a rechad el tir a mo suobel. Ka momtab er a tekingel a Jehovah el mo er a Abraham, el mle demal a Jesus er a irechar el kmo: “Ma bek el beluu er a beluulchad a mo olengit er ngak el mo omekngeltengat er tir [el klou el cheldebechel] el ua kulemekngeltengat er a ruldidellel a rsechem [el kekerei el cheldebechel].” (Genesis 22:18) Nguaisei, ngoeak a ‘uldidellel a rsechel’ a Abraham, e a rokui el renged a mukngeltengat.

Me ngtechang ngika el ‘uldidellel a rasech’? Ng Jesus Kristus me tirke el mla mechell el beches, el mirrodel el mo ngelekel a Dios. A apostol el Paulus a mesaod el kmo: “Ma lsekum kom chad ra Kristus, e kom rasech ra Abraham.” (Galatia 3:16, 29) E ngera el klengeltengat a mo er a rechad er a rokui el renged el oeak ngika el ‘uldidellel a rasech’? Ngsebechir el mo nguu a kengei er a Dios, e mo dmeu a rengrir er a klengar el ngar er tia el paradis el chutem el mo cherechar. A David a ulemlaoch el ngar er a Psalm el kmo: “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29; Isaia 45:18; Chocholt 21:1-5.

Nguaisei, a omengedereder el ngar er a eanged a di mo er a remekesai el chad, engdi a klungiaol a mei el oeak ngii el omengedereder​—el diak a ulebengelel el klengar el ngar er tia el chutem me a rokui el klengeltengat—​a mo er a rebetok el chad. Me bo el sebechem kau me a telungalek er kau el mo teloi er tirke el mo ngmai aike el diak a ulebengelel el klengeltengat el mei el oeak a Rengedel a Dios.