A REBETOK el chad a oumerang el kmo ngkired el mechell el beches me bo el sebeched el nguu a diak a ulebengelel el osobel. Engdi ka momtab aike el ledilung a Jesus el kirel a moktek er a tekoi el mechell el beches. Ngdilu el kmo: “A chad a lak le mechell el beches, e ngdiak el sebechel mesa rengedel a Dios.” (Johanes 3:3) Me a chad a kirel el mechell el beches me bo el sebechel el soiseb er a Rengedel a Dios, el diak el mechell el beches el mo nguu a osobel. Engdi a rebebil a locha mo outekangel el kmo, ‘Aika el eru el tekoi​—el mo soiseb er a Renged me a nguu a osobel—​ngkora melutk el kirel a osisiu el nguked?’ Ngdiak. A bo dodengelii a klekakerous er ngii, e a kot e bo dosaod er a belkul sel tekoi el “rengedel a Dios.”

A renged a ta er a bedengel a kabelment. Me sel tekoi el “rengedel a Dios” a belkul a kmo “kabelment er a Dios.” A Biblia a olisechakl el kmo a Jesus Kristus, el “Ngelekel a chad,” a King er a Rengedel a Dios e ngar er ngii a remo mengedereder el obengkel. (Daniel 7:1, 13, 14; Matteus 26:63, 64) Me a lmuut el tang, a ues el lilsang a apostol el Johanes a ochotii el kmo a Kristus a mo mengedereder el obengterir a rengellitel el chad el mengai er a “chelsel a bek el kebliil rar chad, ma chomelekoi, ma bliongel rar chad, ma renged” el “mo mengedereder ra belulechad.” (Chocholt 5:9, 10; 20:6) A Tekingel a Dios a ochotii el kmo tirke el mo mengedereder el king a “kekerel delebechel,” el 144,000 a ildisir el chad, “el mlengubet ra belulechad.”​—Lukas 12:32; Chocholt 14:1, 3.

Ngar er ker a Rengedel a Dios? “A rengedel a Dios” a dirrek el okedongall el “rengedel a eanged,”  el olecholt el kmo a Jesus me a tirke el kldemel el king a mo mengedereder el ngar er a eanged. (Lukas 8:10; Matteus 13:11) Me a leuaisei, a Rengedel a Dios a kabelment el ngar er a eanged el bo lorrurt er ngii a Jesus Kristus me tirke el mo mengedereder el obengkel el mlengai er a delongelir a rechad.

Engdi, ngera mle belkul a tekingel a Jesus er a ledu el kmo a chad a kirel el mechell el beches me bo el sebechel el “soiseb er a rengedel a Dios”? Ngmillekoi el kmo a chad a kirel el mechell el beches me bo el sebechel el mo mengedereder el obengkel a Kristus el ngar er a eanged. Me a beot el omesodel tiang a kmo, a moktek er a tekoi el mechell el beches a mo mengetmokl er a ulterekokl el ildisir a rechad el mo mengedereder el ngar er a eanged.

Me kede mla mesa el kmo ngklou a ultutelel a tekoi el mechell el beches, e a Dios a melilt e mengetmokl er tirke el ngellitel el chad el mo mengedererder el ngar er a eanged. Engdi, tia el tekoi el kirel a omengedereder a mekedbechii a ta er a ker. A lsekum e tirke el mechell el beches a mo mengedereder el king el ngar er a eanged, e te rua techang a bo longedereder er tir? Tia el ker a mo soadel er a ongingil el suobel.

[Blurb er a 6 el llel]

A moktek er a tekoi el mechell el beches a mo mengetmokl er a ulterekokl el ildisir a rechad el mo mengedereder el ngar er a eanged

[Siasing er a 6 el llel]

A Rengedel a Dios a bo lorrurt er ngii a Jesus Kristus me tirke el mo mengedereder el obengkel el mlengai er a delongelir a rechad