1, 2. ¿Kenon okiteititi Pablo ika kitlasojkamatiya iteiknelilis toTajtsin?

PABLO, itlatitlankauj Cristo, kintlaueltokaya akin kichiuaj ken Cristo. Ika yejon kuajli kimatiya ika xnonekiya makikneli toTajtsin. Noijki okijto itech iteiknelilis toTajtsin: “Xsan ijki onikuajkau [iteiknelilis]” (xpoua 1 Corintios 15:9, 10).

² Pablo okijkuilouili Timoteo yejuin tlajtoltin ijkuak imikiskia: “Nikmaka tlaxtlauijli toTeko Jesucristo yejuan onechmakak poder, pampa yejua onechititij ika kitlalia iyojlo notech ijkuak onechtlajlij ipan itekiu”(1 Timoteo 1:12-14). ¿Tlenon katka yejon tekitl? Ipan ueyi kalpan Éfeso, Pablo okimijli tlayekankej ipan tlanechikojli: “Maski ijkon, xnikmaluiya nonemilis, tlen nikneki nikchiuas, nonkisas yejuin ojtli niman nitlamis notekiyo tlen onechmakak toTeko Jesús, ika kuajli niktetomilis yejon kuajli tlajtoltin itech iueyiteiknelilis toTajtsin” (Hechos 20:24).

3. ¿Tlenon kualtsin tekitl okimakakej Pablo? (Xkita tlaixkopinajli kampa peua tlen tomachtijtokej).

³ ¿Itech tlenon otenojnots Pablo? ¿Tleka itech tlen otenojnots kiteititiaya iteiknelilis Jehová? Pablo okimijli tlaneltokakej itech  Cristo itech Éfeso: “Nenkimatstokej ken Dios onechmaktilij in tekitl para nemechijlis nemejuamej yejuan xnenhebreos ika iteiknelilis” (Efesios 3:1, 2). Jesús yokimakaka Pablo se tekitl. Yejuin tekitl nonekiya makinnojnotsa tlaltikpakchanejkej akin xkatkaj judíos niman kinnojnotsaskia itech tekiuajyotl tlen kiyekanaskia Jesucristo (xpoua Efesios 3:5-8). Pablo otenojnots ika nochi iyojlo niman ipan yejuin tonajli noijki ijkon noneki matikchiuakan ken yejua. Ijkon okiteititi ika iteiknelilis toTajtsin tlen yokititijka kuajli okitekitilti.

4, 5. ¿Tleka uelis tikijtoskej kuajli tlajtoltin itech Tekiuajyotl noijki kijtosneki “kuajli tlajtoltin itech iueyiteiknelilis toTajtsin”?

⁴ Ipan yejuin tonaltin, Jehová yotechmakak se tekitl, titenojnotsaskej “kuajli tlajtojli [...] nochiuiyan ipan in tlaltikpaktli” (Mateo 24:14). Yejon kuajli tlajtoltin itech tekiuajyotl noijki kijtosneki “kuajli tlajtoltin itech iueyiteiknelilis toTajtsin”. ¿Tleka? Pampa nochi tlateochiualistin tlen kuajkuis iTekiuajyo toTajtsin san uelis nochiuas ipampa iteiknelilis Jehová (Efesios 1:3). Pablo okiteititi ika kitlasojkamatiya iteiknelilis toTajtsin ijkuak tenojnotsaya ika pakilistli. ¿Noijki ijkon tikchiujtokej? (Xpoua Romanos 1:14-16).

⁵ Itech tlamachtijli tlen yotiuajpanokej otikitakej ika uelis topaleuiskej ika iteiknelilis toTajtsin maski titlajtlakolejkej. Noijki otikitakej ika iteiknelilis toTajtsin techmaka miyek tlateochiualistin. Ika yejon noneki tikinnojnotsaskej sekimej itech itlasojtlalis Jehová niman itech tlen noneki kichiuaskej niman ijkon makinpaleui itlasojtlalis. ¿Kenon uelis tikinpaleuiskej oksekimej noijki makitlasojkamatikan iteiknelilis toTajtsin?

6, 7. ¿Kenon titenojnotsaj kuajli tlajtoltin itech iteiknelilis toTajtsin ijkuak tiktetomiliaj tlaxtlauijli tlen onotemakak?

⁶ Ipan yejuin tonajli, miyekej tlaltikpakchanejkej xnomachiliaj tla kipiyaj tlajtlakojli ijkuak kichiuaj tlen xkuajli. Ika yejon xkasikamatij tleka nonekiya mamiki Jesús topampa. Niman oksekimej peuaj kitaj ika xuelij yolpakij ken nemij. San ika, ijkuak tlajtouaj imiuan iteixpantijkauan Jehová, sekimej kasikamatij tlenon kichiua tlajtlakojli, kenon kimijtlakoua niman tlenon noneki kichiuaskej ika makisaskej itech tlajtlakojli. Tla kipiyaj kuajli inyojlo, melak kitlasojkamatij ijkuak nomachtiaj ika toTajtsin okuajtitlan iKonetsin ipan tlaltikpaktli matechmakixtiki itech tlajtlakojli niman itech mikilistli. Noijki kasikamatij ika Jehová okichiuj yejon pampa kipiya ueyi tlasojtlalistli niman iteiknelilis topampa (1 Juan 4:9, 10).

⁷ Matikitakan tlen Pablo okijto itech iKoneuj Jehová akin melak kitlasojtla: “ItlajsojkaKonetsin okitlaxtlau ikan iyesyo totlajtlakoluan, niman aman Dios yotechtlapojpoluilij ikan iueyi teiknelilis” (Efesios 1:7). Ika imikilis Cristo onoteititi ika toTajtsin melak techtlasojtla niman kiteititia ika melak ueyi iteiknelilis. Techpaktia tikmatiskej ika tla tikteititiaj totlaneltokil itech imikilis Jesús, toTajtsin uelis kitlapopoluis totlajtlakoluan niman tikpiyaskej chipauak totlamachilis (Hebreos 9:14). ¡Yejuin melak kualtsin tlajtoltin tlen tiknekij tikimijliskej oksekimej!

8. ¿Tleka noneki ika tlaltikpakchanejkej tlajtlakolejkej manoyolseuikan iuan toTajtsin?

⁸ Akin xtlaneltokaj itech imikilis Jesús nemij ken itlauelikniuan toTajtsin. Ika yejon noneki tikimijliskej ika uelis nouikaskej iuan  toTajtsin. Juan, itlatitlankauj Cristo, okijkuilo: “Yejuan kineltoka iKonetsin Dios kipia nemilistli para nochipa, pero on yejuan xkitlakamati xkipias yejua in nemilistli, yej kiselis on temojtij itlauel Dios” (Juan 3:36). Tipakij tikmatiskej ika ipampa imikilis Cristo uelis kuajli touikaskej iuan toTajtsin. Pablo ijkin okijto: “Ipan okseki tonaltin katkaj, xonenyajkej itech Dios niman nemoyojlo tlauelonkatka iuan Dios pampa nenkichiuayaj tlajtlamach tlen xkuajli. Pero aman Dios omechtlalij yejua itech ikan yolseuilistli itechkopa imikilis” (Colosenses 1:21, 22).

9, 10. a) ¿Tlenon tekitl yokinmakak Cristo ikniuan tlapejpeniltin? b) Akin kichiaj nemiskej ipan tlaltikpaktli, ¿kenon kinpaleuiyaj tlapejpeniltin?

⁹ Cristo yokinmakak ikniuan tlapejpeniltin se tekitl itech “yolseuilistli”. Pablo okimijli: “Niman nochi yejua on kichiua Dios yejuan itechkopa Cristo otlauelseu touan niman otechselij ikan yolseuilistli. Niman Dios no yejua otechtekiutij para itech ma tikinuikakan nochimej oksekimej, para [...] kinselis ikan yolseuilistli. [...] Dios [...] otlauelseu inuan on tlaltikpaktlakamej, [...] yejua xkichiuilijtikatka cuenta on intlajtlakol. Niman tejuamej otechtlalij para tiktemachiltiskej on temachtijli yejuan kijtoua ken ijki Dios [...] kinselia itech ikan yolseuilistli. [...] Niman aman sa no Dios mechnojnotsa totechkopa. Aman, tej, sanoyej temechtlajtlaniliaj ken technauatia Cristo: xkauilikan Dios ma tlauelseui nemouan, niman mechselis ikan yolseuilistli” (2 Corintios 5:18-20).

¹⁰ Akin kichiaj nemiskej ipan tlaltikpaktli kitaj se tlateochiualistli kinpaleuiskej tlapejpeniltin ipan tenojnotsalistli (Juan 10:16). Yejuamej kinpaleuiyaj tlapejpeniltin matenojnotsakan. Kichiuaj melak ueyi tekitl ijkuak tenojnotsaj niman temachtiaj tlen melauak itech Biblia. Noijki kinpaleuiyaj kuajli manouikakan iuan toTajtsin. Yejuin ueli nochiua san pampa notenojnotsa “kuajli tlajtoltin itech iueyiteiknelilis toTajtsin”.

11, 12. ¿Tleka melak kuajli ika tlaltikpakchanejkej nomachtiaj kenon noneki kichiuiliskej teoyotl Jehová?

¹¹ Miyekej tlaltikpakchanejkej kichiuaj teoyotl san pampa kuajli nomachiliaj. San ika, xkineltokaj tla toTajtsin kinkaki inteoyouan. Yejuamej noneki kimatiskej ika toTajtsin yemelak kinkaki toteoyouan. David okijkuilo yejuin tlajtoltin: “Tejua Akin tijkaki teoyotl, motech uajlaskej nochimej tlaltikpakchanejkej. Itech tlen yoninopopolo melak nechtekipachoua, san ika, tejua tikintlapachoua totlajtlakoluan” (Salmo 65:2, 3).

¹² Jesús okimijli inomachtijkauan: “San tlinon yejuan nemejuamej nentlajtlaniskej ikan notoka” yejua kichiuas (Juan 14:14). Yejuin kijtosneki ika uelis tiktlajtlaniskej “san tlinon” ijkon ken kineki Jehová. Juan noijki okijkuilo: “Tiktlaliaj toyojlo itech Dios ika san tlinon tejuamej tiktlajtlaniliskej ijkon ken yejua kineki, yejua techkakis” (1 Juan 5:14). Melak kuajli ika tikinpaleuiyaj tlaltikpakchanejkej makasikamatikan ika teoyotl xsan itlaj tlen kichiua kuajli manomachilikan. Teoyotl uelis ika nonisiuiskej itech toTajtsin (Hebreos 4:16). Ijkuak tikinmachtiaj tlaltikpakchanejkej kenon kinamiki makichiuakan teoyotl, ken akinon kinamiki kichiuiliskej teoyotl niman tlenon kitlajtlaniskej, tikinpaleuiyaj kuajli manouikakan iuan Jehová niman makinextikan yolseuilistli ijkuak tlajyouiyaj (Salmo 4:1; 145:18).

13, 14. a) ¿Tlenon melak kualtsin kiseliskej tlapejpeniltin ika tlayekapan? b) ¿Tlenon melak kualtsin kichiuaskej tlapejpeniltin ipampa akin nemiskej ipan tlaltikpaktli?

¹³ Jehová melak kuajli kiteititis iteiknelilis ijkuak yotlan ken nochiua ipan yejuin tlaltikpaktli. ¿Kenon kichiuas? ToTajtsin  kichiuas ika 144,000 akin tlanauatiskej iuan Cristo ipan iluikak makiselikan se tlateochiualistli. Pablo okijto tlenon yeskia yejon tlateochiualistli ijkuak okijkuilo: “Dios ikan iueyi teiknelilis niman miyek tetlajsojtlalistli okinyolitij toalmas san sekan iuan Cristo, maski toalmas miktoyaj ixpan ipampa totlajtlakol. Dios omechmakixtij ikan iteiknelilis. No ijki Dios otechketsteu iuan Cristo Jesús, niman otechseuij ne iluikak kampa sa no Cristo yeuatikaj. Okichiu yejua in para kiteititia para nochipa ken sanoyej ueyi iteiknelilis yejuan xueli tikitaj kech ika ueyi niman on tetlajsojtlalistli yejuan techmaka itechkopa Cristo” (Efesios 2:4-7).

¹⁴ Nion xueli tiknemiliaj kenon melak kualtsin yes tlen toTajtsin kinmakas tlapejpeniltin ijkuak tlanauatiskej iuan Cristo ipan iluikak (Lucas 22:28-30; Filipenses 3:20, 21; 1 Juan 3:2). Jehová melak kualtsin ken kimititis “ueyi iteiknelilis yejuan xueli tikitaj kech ika ueyi”. Yejuamej yeskej “yenkuik Jerusalén” niman ken akin iuan “nonamiktia” Cristo (Apocalipsis [Revelación] 3:12; 17:14; 21:2, 9, 10). Yejuamej tekitiskej iuan Jesús ijkuak nochiuas ika nochimej tlaltikpakchanejkej mapopoliui intlajtlakol. Yejuamej kinpaleuiskej tlaltikpakchanejkej mamakisakan itech tlajtlakojli niman mikilistli niman kinpaleuiskej manochiuakan ken akin xkipiyaj tlajtlakojli (xpoua Apocalipsis 22:1, 2, 17).

15, 16. ¿Kenon kiteititis Jehová iteiknelilis ipampa tlaltikpakchanejkej ika tlayekapan?

¹⁵ ToTajtsin kiteititis iteiknelilis ipan “ken nochiuas tlemach ika tlayekapan” (Efesios 2:7, TNM). Ipan yejon tonaltin, nochimej ipan tlaltikpaktli kitaskej “ueyi iteiknelilis [toTajtsin] yejuan xueli tikitaj kech ika ueyi” (Lucas 18:29, 30). Se ken Jehová kiteititis iueyi iteiknelilis yes ijkuak kinyolitis tlaltikpakchanejkej (Job 14:13-15; Juan 5:28, 29). ¿Akinomej oksejpa uajnemiskej? Tlakamej niman siuamej yolmelaujkej akin omijkej ijkuak xmikiya Cristo niman akin omijkej oyolmelaujkanenkej itech Jehová ipan sa itlamiyan tonaltin. Nochimej yejuamej oksejpa uajnemiskej niman nochipa kitekichiuiliskej Jehová.

¹⁶ Melak miyekej tlaltikpakchanejkej akin omijkej niman xokixmatkej toTajtsin noijki oksejpa uajnemiskej. Juan okijkuilo: “Niman  kemaj onikintak ixpan Dios majmantikatkaj on mimikej yejuan uejueyixtokej niman yejuan xuejueyixtokej. Kemaj okintlapojkej on tlajkuilolamamej niman no okitlapojkej oksen tlajkuilolamatl yejuan kijtoua akinon kipia yenkuik nemilistli para nochipa. On mimikej okinyolkuitij niman okintlaxtlauilij ken kitocaroua  ika on tlen okichijkej nochi kech tlajkuilolnestikaj. On mimikej yejuan nemiyaj ijtik on mar okiskej, niman on mikilistli okintemakak on mimikej niman ipan intlalkon okiskej. Nochi on mimikej niman cada sesentemej okinyolkuitijkej niman okintlaxtlauilijkej ken kitocaroua on tlen okichijkej” (Apocalipsis 20:12, 13). Akin yoliuiskej noijki uelis kixmatiskej toTajtsin niman kiseliskej yejua makinyekana. Yejuamej noneki nomachtiskej niman kitlakamatiskej tlajtolyekanalistin itech Biblia niman yejuin tlanauatiltin tlen uajlaskej ipan “tlajkuilolamamej”. Yejon yenkuikej tlanauatiltin okse ken Jehová kiteititis iteiknelilis.

17. ¿Tlenon noneki tikilnamikiskej ijkuak titenojnotsaj?

¹⁷ Aman melak noneki matitenojnotsakan kuajli tlajtoltin itech Tekiuajyotl, pampa sa achijtsin poliui ika yejkos tlapopolouilistli (Marcos 13:10). Noneki matikilnamikikan ika ijkuak titenojnotsaj tikchiuaj pampa tiknekij tikueyichiuaskej Jehová. ¿Kenon tikchiuaj yejuin? Ijkuak tikimijliaj tlaltikpakchanejkej ika nochi tlateochiualistin tlen tikseliskej ipan yenkuik tlaltikpaktli nochiuas san ipampa iteiknelilis Jehová.

18, 19. ¿Kenon tikueyiteneuaj iteiknelilis Jehová?

¹⁸ Ijkuak titenojnotsaj, uelis tikimijliskej ika ijkuak Cristo tlayekanas, tlaltikpakchanejkej kiseliskej tlateochiualistin ipampa imikilis Cristo niman ika yolik peuas xok kipiyaskej tlajtlakojli. Biblia kijtoua: “Tlen onochijchiuj [noso tlaltikpakchanejkej] noijki makisaskej itech tlen teijtlako niman kipiyaskej kualtsin makixtilistli ken ikoneuan toTajtsin” (Romanos 8:21, TNM). Yejuin uelis nochiuas san ipampa iteiknelilis Jehová.

¹⁹ Techyolpaktia ika tikinnojnotsaj tlaltikpakchanejkej itech tlen kualtsin toTajtsin yokijto kichiuas tlen uajnestiuj ipan Apocalipsis 21:4, 5: “Dios kimpopolouilis nochi ajmantli, niman xok onyas mikilistli, nion chokistli, nion ajmantli, nion kokolistli, pampa nochi tlen achtoj onkatka yopanok”. Niman Jehová, akin nemij kampa tlanauatia, kijtoua: “Xkita, nejua nikyenkuilia nochi on tlajtlamach”. Noijki kijtoua: “Xkijkuilo [...] tlen nimitsijlijtikaj yejua tlen melauak niman nochimej kuajli para kineltokaskej”. Ijkuak titenojnotsaj ika nochi toyojlo yejuin kuajli tlajtoltin, ijkon tikueyiteneuaj iteiknelilis Jehová.