Jesus okwa li a fa peni?
Shoka Ombiimbeli tayi ti
Kapu na ngoka e shi lela kutya Jesus okwa li a fa peni, molwaashoka Ombiimbeli inayi popya olupe lwe. Shika otashi ulike kutya olupe lwaJesus halwo lwa li lwa simana. Nonando ongawo, Ombiimbeli oya popya ngaa kutya okwa li ha monika ngiini.
Olupe lwe: Jesus okwa li Omujuda notashi vulika a li a thigulula olupe lwayina. (Aahebeli 7:14) Osha yela kutya ka li e na olupe lwi ikalekelwa. Pompito yimwe, okwa li a vulu okuya kuJerusalem meholamo okuza kuGalilea, noka li a dhimbululwa. (Johannes 7:10, 11) Osha fa shi li ngeyi nokuli kutya ka li hi imonikila nuupu mokati kaalongwa ye. Dhimbulukwa kutya Jesus sho a li a kwatwa po kongundu ya homata, oya li ye mu ulukilwa kuJudas Iskariot. — Mateus 26:47-49.
Uule womafufu ge: Osha yela kutya omafufu gaJesus kaga li omale, molwaashoka Ombiimbeli otayi ti kutya “inashi opala, omulumentu a kale e na omafufu omaleeleka.” — 1 Aakorinto 11:14.
Oombenzi dhe: Jesus okwa li e na oombenzi. Okwa li a landula ompango yOshijuda, ndjoka ya li yi indika aalumentu ‘kaaya kulule oombenzi dhawo omapalu.’ (Levitikus 19:27; Aagalati 4:4) Shimwe ishewe, Ombiimbeli oya popya oombenzi dhaJesus mehunganeko li na ko nasha nokuhepekwa kwe. — Jesaja 50:6.
Olutu lwe: Omauyelele agehe otaga ulike kutya Jesus okwa li e na olutu lwu na uukolele. Pethimbo lyuukalele we, okwa li e ende iinano iile. (Mateus 9:35) Okwa li a opaleke otempeli yAajuda iikando iyali, oku undulile pevi iitaafula yawo yiimaliwa nokwa li a tidha mo iimuna nongola. (Lukas 19:45, 46; Johannes 2:14, 15) Embo lyo-Cyclopedia, lyaMcClintock naStrong, olya ti: “Evaangeli alihe li na ko nasha nondjokonona yaJesus, otali ulike kutya okwa li e na olutu lwu na uukolele.” — Embo 4, epandja 884.
Omainyengo ge gokoshipala: Omainyengo gaJesus gokoshipala oga li haga ulike kutya omunambili nomunalukeno. (Mateus 11:28, 29) Aantu yomaludhi agehe oya li haye mu kongo, opo e ya kwathele noku ya hekeleke. (Lukas 5:12, 13; 7:37, 38) Nokuli naanona oya li haya mono oshipu okukala pamwe naye. — Mateus 19:13-15; Markus 9:35-37.
Omitotolombo kombinga yeholokopo lyaJesus
Omutotolombo: Yamwe ohaya tompathana kutya Jesus oku na okukala a li Omuafrika, molwaashoka embo lyEhololo olya yelekanitha omafufu ge nomafufu goonzi nosho wo kutya oompadhi dhe odha fa “osheela oshikushu sha hanyekwa.” — Ehololo 1:14, 15.
Oshili: Embo lyEhololo olya popya ‘pathaneko.’ (Ehololo 1:1) Omafufu noompadhi dhaJesus oya popiwa pathaneko, tayi ulike komaukwatya ge konima sho a yumuka, ihe hakeholokopo lye sho a li kombanda yevi. Sho taku tiwa “omafufu gokomutse gwe omatokele ga fa goonzi nenge ngaashi omahegele gomongwa,” Ehololo 1:14 otayi popi olwaala lwomafufu, ihe hamafufu go genegene. Shoka otashi ulike kuunongo we, oshoka okwa kala ko nale. (Ehololo 3:14) Ovelise ndjika itayi yelekanitha omafufu gaJesus nomafufu goonzi, ihe otayi ga yelekanitha nomahegele gomongwa.
Oompadhi dhaJesus odha li dha “fa osheela oshikushu sha hanyekwa nosha yelithwa meziko.” (Ehololo 1:15) Shimwe ishewe, oshipala she osha li hashi “adhima ngaashi etango lyopokati komutenya.” (Ehololo 1:16) Molwaashoka kapu na omuhoko gu na olwaala lwa tya ngaaka, emoniko ndika olyopathaneko, notali ulike kuJesus omuyumudhwa ngoka ha “kala muuyelele itaau wapa okuyiwa.” — 1 Timoteus 6:16.
Omutotolombo: Jesus okwa li oshimbembe.
Oshili: Jesus okwa li omulumentu e na omikalo omiwanawa. Pashiholelwa, okwa li i igandja kongundu yaantu ya homata mboka ya li ye ya oku mu kwata po. (Johannes 18:4-8) Jesus oku na wo okukala a li e na oonkondo palutu, opo a vule okukala omuhongi gwiipilangi ta longitha iilongitho yokomake. — Markus 6:3.
Omolwashike nduno Jesus a li a pumbwa ekwatho a humbatelithwe ko komuti gwe gomahepeko? Omolwashike oye a si tango kwaamboka ya alelwa pamwe naye? (Lukas 23:26; Johannes 19:31-33) Omanga Jesus inaa alelwa komuti, olutu lwe olwa li lwe ehamekwa noonkondo. Okwa lalele uusiku awuhe inaa kotha, molwaashoka okwa li lela a nika oluhodhi. (Lukas 22:42-44) Uusiku mboka Aajuda oya li ye mu monitha iihuna, nongula sho kwa shi Aaroma oya li ye mu hepeke noonkondo. (Mateus 26:67, 68; Johannes 19:1-3) Oonkalo ndhoka otashi vulika odho dha li dhe mu ningitha a se nziya.
Omutotolombo: Jesus ka li ha yolo nomuntu.
Oshili: Jesus okwa li e na omaukwatya ga fa gaHe gwomegulu, Jehova, ngoka Ombiimbeli tayi mu popi kutya ‘oKalunga Omunyanyukwi.’ (1 Timoteus 1:11, yelekanitha NW; Johannes 14:9) Shimwe ishewe, Jesus okwa li a longo yalwe nkene taya vulu okukala ya nyanyukwa. (Mateus 5:3-9; Lukas 11:28) Shoka otashi ulike kutya olundji enyanyu lyaJesus olya li hali imonikila moshipala she.
Opu na ishewe uuyelele mbuka
ESSENTIAL BIBLE TEACHINGS
Ongiini tatu vulu okukala nuushili kutya shoka shi li mOmbiimbeli oshoshili?
Ngele Ombiimbeli oya nyolithwa kuKalunga, nena itayi vulu okuyelekanithwa nando onembo limwe.
KOMBINGA YETU
Pula ekonakonombiimbeli
Kundathaneneni epulo lyopaMbiimbeli nenge wu ilonge oshindji kombinga yOonzapo dhaJehova.