1-2. (a) Omolwashike ihaatu kala twa kumwa sho tu na omaupyakadhi? (b) Oshike tatu ka kundathana moshitopolwa shika?

 TU LI oshigwana shaJehova, ihatu kala twa kumwa uuna tu na omaupyakadhi. Oshoka Ombiimbeli oya ti kutya “mokuya moshilongo shaKalunga otu na okupitila muudhigu owindji.” (Iil. 14:22) Otu shi wo kutya omaupyakadhi getu gamwe itaga kandulwa po thiluthilu ngashingeyi, ihe otaga ka kandulwa po owala muuyuni uupe waKalunga, moka itaamu “ka kala we eso, oluhodhi, elilo nenge uuwehame.” — Eh. 21:4.

² Jehova ihe tu gamene komaupyakadhi, ihe ohe tu kwathele tu ga idhidhimikile. Ndhindhilika shoka omuyapostoli Paulus a li a lombwele Aakriste mboka ya li muRoma. Tango okwa popi omaudhigu ngoka ye naamwahe ya li yi iyadha mugo. Opo nduno okwa nyola a ti: “Mumbika ayihe otatu sindi nokusindilila omolwaangoka e tu hole.” (Rom. 8:35-37) Shoka osha hala okutya Jehova ota vulu oku ku kwathela nuuna nokuli wu li muupyakadhi wontumba. Natu ka taleni nkene Jehova a li a kwathele Josef a pondole nosho wo nkene ta vulu oku ku kwathela.

3. Elunduluko lini lya li lya ningwa ombaadhilila monkalamwenyo yaJosef?

³ Tatekulululwa Jakob okwa li e shi ulike montaneho kutya oku hole omwanamati Josef, noonkondo. (Gen. 37:3, 4) Omolwoshinima shoka, oyanamati yaJakob aakuluntu oya tameke okukala ya tsila ondumbo omumwayina ngoka. Esiku limwe sho ya mono ompito, oya li ya landitha po Josef kongundu yaahalithi Aamidiana. Aahalithi mboka oya ende naJosef ookilometa omathele sigo okuEgipiti, hoka Josef a ka landithwa po ishewe, oshikando  shoka kuPotifar, omukuluntu gwaalangeli yaFarao. Onkalamwenyo yaJosef kaya li tuu ya lunduluka mepathimo lyeho, okuza sho a kala e holike kuhe noonkondo e ta ningwa omupika muEgipiti! — Gen. 39:1.

4. Oshike tashi vulu oku tu ningilwa, shoka tashi vulu oku tu ningitha tu iyadhe momaupyakadhi ngaashi gaJosef?

⁴ Ombiimbeli otayi ti kutya “iinima iiwinayi ohayi adha kehe gumwe.” (Omuuv. 9:11, Holy Bible — Easy-to-Read Version) Omathimbo gamwe ohatu adhika komaupyakadhi ngoka haga “adha aantu ayehe.” (1 Kor. 10:13) Nenge tashi vulika tu mone iihuna molwaashoka owala tu li aalongwa yaJesus. Pashiholelwa, otashi vulika tu shekwe, tu patanekwe, nenge nokuli tu hepekwe omolweitaalo lyetu. (2 Tim. 3:12) Kutya nduno owu iyadhe momaupyakadhi ga tya ngiini, Jehova ota vulu oku ku kwathela wu pondole. Okwa li a kwathele ngiini Josef?

5. Potifar okwa li a thiki pehulithodhiladhilo lini sho Josef a li e na elago mwaashihe te shi longo? (Genesis 39:2-6)

⁵ Lesha Genesis 39:2-6. Potifar okwa li e shi ndhindhilike kutya Josef omulumentu omugundjuka e na owino noha longo nuudhiginini. Okwa li wo e shi kutya omolwashike Josef e li ngaaka. Potifar okwa li a mono kutya “Omuwa okwa pe Josef elago ewanawa mwaayihe te yi ningi.” b Hugunina, Omuegipiti ngoka okwa ningi Josef elenga lye lyomekolo. Okwa pe wo Josef epitikilo a tonatele egumbo lye alihe. Oshizemo? Potifar okwa yambapala.

6. Josef otashi vulika a li e uvitile ngiini onkalo ye?

⁶ Dhiladhila kunkene Josef a li e uvite. Oshike a li a halelela unene? Mbela okupandika nokupewa ondjambi kuPotifar? Otashi vulika lela Josef a li a hala okumangululwa, opo a shune kuhe. Kakele kaashono, nonando Josef okwa li e na iinakugwanithwa megumbo lyaPotifar, Josef natango okwa li omupika gwomuntu ngoka ihaa longele Jehova. Jehova ka li a ningitha Potifar a mangulule Josef, nonkalo yaJosef oya li pokunayipala unene.

7. Omomukalo guni onkalo yaJosef ya nayipala? (Genesis 39:14, 15)

⁷ Ngaashi sha popiwa muGenesis ontopolwa 39, omukulukadhi gwaPotifar okwa li a hala Josef nokwa li e mu heke lwiikando a lale naye. Ihe oshikando kehe, Josef okwa li e mu tindi.  Hugunina, omukulukadhi ngoka okwa geele Josef noonkondo, e te mu lundile nokuli kutya okwa li ta kambadhala oku mu kwata koonkondo. (Lesha Genesis 39:14, 15.) Sho Potifar e shi uvu, okwa tula Josef mondjedhililo, moka a kala omimvo dhontumba. (Gen. 39:19, 20) Mondjedhililo moka omwa li mwa tya ngiini? Oshitya shOshihebeli sha longithwa kuJosef shoshitya ondjedhililo, otashi vulu wo okutolokwa “omuthima” nenge “elambo,” shoka tashi ulike kutya mehala moka a li omwa li mu na omilema nokwa li e li mo e uvite kee na etegameno lyasha. (Gen. 40:15) Ombiimbeli otayi ulike wo kutya uule wethimbo lyontumba, oompadhi dhaJosef odha kala dha tulwa momalyenge nokwa li a tulwa olinga yosheela mothingo. (Eps. 105:17, 18) Onkalo yaJosef oya li tayi ende tayi nayipala. Okwa zi pondondo yokukala omupika a inekelwa, e ta ningi omunandholongo.

8. Nonando omaudhigu getu oga nayipale, otatu vulu okukala tu na uushili wuni?

⁸ Mbela owi iyadhele nale monkalo tayi yemateke ndjoka ya nayipala owala nonando owa kala to galikana neitulomo? Shoka otashi vulu okuningwa. Jehova ihe tu keelele komaupyakadhi gomuuyuni mbuka tawu pangelwa kuSatana. (1 Joh. 5:19) Nonando ongawo, oto vulu okukala wu na uushili mbuka kutya Jehova oku wete thiluthilu onkalo yoye, noku na ko nasha nangoye. (Mat. 10:29-31; 1 Pet. 5:6, 7) Shimwe ishewe, oku uvaneka a ti: “Itandi ku etha nando; itandi ku thigi po.” (Heb. 13:5) Jehova ota vulu oku ku kwathela wu idhidhimike nokuli nonando onkalo yoye otayi monika kaayi na esiku yi ye kondjila. Natu ka taleni nkene a li a kwathele Josef.

9. Oshike tashi ulike kutya Jehova okwa li naJosef sho a li mondholongo? (Genesis 39:21-23)

⁹ Lesha Genesis 39:21-23. Nokuli nopethimbo edhigu ndyoka Josef a li mondholongo, Jehova okwa li e mu kwathele a pondole. Ngiini mbela? Mokweendela ko kwethimbo, Josef okwa ka kala a inekelwa nokwa simanekwa komukuluntu gwondjedhililo, ngaashi a li a ningile Potifar. Hugunina, omukuluntu ngoka gwondjedhililo okwa langeke po Josef a ninge omukuluntu gwoonkwatwa adhihe. Nokuli Ombiimbeli otayi ti kutya “omukuluntu gwondjedhililo ka li we e na oshimpwiyu shasha, oshoka ayihe oya li miikaha yaJosef.” Josef ngashingeyi okwa li e na shoka ta dhiladhila kusho, ano iilonga tayi ti sha. Elunduluko ndyoka inali ya po tuu ombaadhilila! Ongiini omunandholongo ngoka a li a lundilwa kutya okwa li ta kambadhala okukwata koonkondo omukulukadhi gwelenga lyomukwaniilwa a pewa ondondo ndjoka ya simana? Opu na owala etompelo limwe kutya omolwashike. Genesis 39:23 otayi ti: ‘Omuwa okwa pe Josef elago ewanawa mwaayihe e yi longo.’

10. Yelitha kutya omolwashike Josef tashi vulika a li kee uvite ta pondola mwaashihe te shi longo.

¹⁰ Kambadhala ishewe okudhiladhila kombinga yankene Josef a li e uvite. Konima sho a lundilwa e ta tulwa mondholongo, mbela sho to tala okwa li ngaa e uvite kutya ota pondola miinima ayihe? Josef okwa li a hala shike komeho gaayihe? Mbela okukala a hokiwa komukuluntu gwondjedhililo? Otashi vulika shoka Josef a li hala lela, okumangululwe mo mondjedhililo. Nokuli okwa li a pula omunandholongo omukwawo ngoka a li e li pokumangululwa e mu popile ko kuFarao e mu kuthe mo mondjedhililo. (Gen. 40:14) Ihe omulumentu ngoka okwa dhimbwa owala okulombwela Farao. Omolwoshinima shoka, Josef okwa kala ishewe mondholongo omimvo mbali. (Gen. 40:23; 41:1, 14) Ihe Jehova okwa li a tsikile okuningitha Josef a pondole. Ngiini mbela?

11. Jehova okwa li a pe Josef oonkondo dhi ikalekelwa dhokuninga shike, nonkandangala yini Josef a dhana mokugwanitha po elalakano lyaJehova?

¹¹ Sho Josef e li mondholongo, Jehova okwa li a ningitha omukwaniilwa gwaEgipiti a yagume  oondjodhi mbali oombwinayi. Farao okwa li a halelela okutseya kutya otadhi ti ngiini. Sho omukwaniilwa ngoka a uvu kutya Josef oha vulu okufatulula oondjodhi, okwa tumu a ka talwe. Kekwatho lyaJehova, Josef okwa li a fatulula oondjodhi dhe, na Farao okwa li a kuminwa omayele ngoka e mu pe. Sho a mono kutya Jehova oku li pamwe nomugundjuka Josef, Farao okwe mu langeke po a ninge omutonateli gwiikulya muEgipiti alihe. (Gen. 41:38, 41-44) Lwanima, ondjala yekomba oya tukuka muuyuni nokaya li owala ya dhenge Egipiti, ihe naKaanan wo, moshilongo shoka mwa li mwa kala yaandjaJosef. Nonando ongawo, Josef ngashingeyi okwa li pondondo yokuhupitha yaandjawo nokukaleka po ezimo moka mwa li tamu ka za Mesiasa.

12. Omomikalo dhini Jehova a li a ningitha Josef a pondole?

¹² Dhiladhila kombinga yiiningwanima mbyoka ya li inaayi ningwa nando onale monkalamwenyo yaJosef. Olye a li a ningitha Potifar a gandje eitulomo li ikalekelwa kuJosef, ngoka a li owala omupika? Olye a li a ningitha omukuluntu gwondjedhililo a kale a hokwa Josef ngoka a li owala omunandholongo? Olye a li a ningitha Farao a yagume oondjodhi oombwinayi nokwa pe Josef uunkulungu woku dhi fatulula? Olye a li a inyengitha Farao a langeke po Josef e li omutonateli gwiikulya muEgipiti alihe? (Gen. 45:5) Osha yela kutya Jehova oye a li a ningitha Josef a pondole mukehe shimwe. Nonando aamwahe yaJosef oya li ya hala oku mu dhipaga, Jehova okwa lundulula onkalo ndjoka, opo a vule okugwanitha po ehalo Lye.

13. Mbela Jehova oha yi mo olunyala monkalo kehe tatu iyadha muyo? Shi yelitha.

¹³ Oshike tatu ilongo mehokololo lyaJosef? Mbela Jehova ohayi mo olunyala monkalo kehe tatu iyadha muyo? Mbela oha inyengitha oshiningwanima kehe monkalamwenyo yetu, opo iinima ayihe mbyoka iiwinayi hayi holoka, ohayi ningwa nelalakano ewanawa? Hasho nando. Ombiimbeli hasho tayi longo ngaaka. (Omuuv. 8:9; 9:11) Nonando ongawo, otu shi kutya uuna tu li muudhigu, Jehova oha kala e shi wete nohe tu uvu uuna tatu mu kugile ekwatho. (Eps. 34:15; 55:22; Jes. 59:1) Shimwe ishewe, ota vulu oku tu kwathela tu idhidhimikile omaudhigu nomupondo. Ngiini mbela?

14. Jehova ohe tu kwathele ngiini uuna tu li muudhigu?

 ¹⁴ Omukalo gumwe moka Jehova he tu kwathele omoku tu hekeleka nomoku tu tsa omukumo, olundji pethimbo naanaa lya opala. (2 Kor. 1:3, 4) Shoka osho sha li sha ningilwa Eziz, omumwatate gumwe gwokoTurkmenistan, ngoka a li a tokolelwa omimvo mbali mondholongo omolweitaalo lye. Okwa ti: “Ongula yesiku ndyoka nda ka pangulwa, omumwatate gumwe okwa li a ulukile ndje Jesaja 30:15 ndjoka tayi ti: ‘Inekela ndje meimweneneno, noto ka kala wu na oonkondo.’ Ovelise ndjika oya kala aluhe nokukwathela ndje ndi kale nda ngungumana nokwiikolelela muJehova mukehe shimwe. Okutedhatedha kovelise ndjoka okwa kwathela ndje momukokomoko gwethimbo alihe nda kala mondholongo.” Mbela nangoye owu wete kutya opu na ethimbo limwe monkalamwenyo yoye Jehova a li e ku kwathele moku ku hekeleka nomoku ku tsa omukumo pethimbo naanaa wa li we gu pumbwa?

15-16. Moshimoniwa shaTori oto ilongo mo shike?

¹⁵ Olundji, ohatu ke shi mona owala nale nkene Jehova e tu kwathela tu idhidhimikile uudhigu konima sho wa hula po. Omumwameme Tori okwa mona kutya oshinima shoka oshoshili. Omwanamati Mason, okwa li a lumbu nokankela uule womimvo hamano sigo oosho a mana oondjenda. Oshi shi okuuviwa ko sho Tori a li a dhengwa pomutima noonkondo. Okwa ti: “Kandi wete ngele opu na onkalo ondhigu noonkondo yi vule ndjoka nda li muyo ndi li omuvali.” Okwa gwedha ko a ti: “Ondi na uushili kutya aavali yalwe nayo otaya tsu kumwe nangame kutya ohashi kala oshidhigu okumona omumwoye ta mono iihuna, shi vulithe uuna ongoye to mono iihuna.”

¹⁶ Nonando osha li sha yemateke lela Tori, sho e wete omwanamati ta mono iihuna noonkondo, lwanima okwa dhiladhila kombinga yankene Jehova e mu kwathela i idhidhimike. Okwa  ti: “Uuna nda dhiladhila kethimbo ndyoka omumwandje a li ta ehama, ohandi mono nkene Jehova a kwathela ndje. Pashiholelwa, sho Mason a li ta ehamenene noonkondo noka li ta vulu okutalelwa po, aamwatate naamwameme oya li haya hingi oowili mbali okuya koshipangelo. Aluhe mondunda yokutegelela omwa li hamu kala gumwe i ilongekidha nokwa halelela oku tu kwathela. Shimwe ishewe, aamwatate naamwameme oya kala noku tu sila oshimpwiyu. Nokuli nopethimbo ndyoka edhigu noonkondo, aluhe otwa li tu na shoka twa pumbwa.” Jehova okwa li a pe Tori shoka a pumbwa i idhidhimike nosho wo omwanamati Mason. — Tala oshimpungu “ Jehova okwa li e tu pe naanaa shoka twa pumbwa.”

17-18. Oshike tashi tu kwathele tu ndhindhilike nokuulika olupandu, omolwekwatho ndyoka Jehova he tu pe pomathimbo omadhigu? (Episalomi 40:5)

¹⁷ Lesha Episalomi 40:5. Omuntu ngoka ha londo kondundu, ohe shi ningi nelalakano a ka thike kondungu yayo. Ihe mondjila moka omu na omahala ogendji mpoka ha thikama a tale nawa iinima. Sha faathana, kala ho mwena po pandjigilile nokudhiladhila kombinga yankene Jehova te ku kwathele wu pondole, nonando oto idhidhimikile uudhigu wontumba. Pehulilo lyesiku kehe, kala ho ipula ngeyi: ‘Omomukalo guni Jehova a yambeka ndje nena? Nonando uupyakadhi woye natango opo wu li, Jehova ote ku kwathele ngiini wi idhidhimike?’ Kala ho tala koshinima nando shimwe shoka Jehova a ninga e ku kwathele wu pondole.

¹⁸ Odhoshili kutya otashi vulika ho galikana uudhigu woye wu hule po. Shoka oshi shi okuuviwa ko noshi li mondjila. (Fil. 4:6) Ihe natu kale wo hatu tala komayambeko ngoka tu na ngashingeyi. Shimwe ishewe, Jehova oku uvaneka kutya ote tu pe oonkondo note tu kwathele tu idhidhimike. Onkee kala aluhe wu na olupandu omolwekwatho ndyoka Jehova te ku pe. Kungawo, oto ka mona nkene Jehova te ku kwathele wu pondole, ngaashi a li a kwathele Josef nokuli nopomathimbo omadhigu. — Gen. 41:51, 52.