Egano ‘euvaneko lya kwata miiti, moka omuntu ha uvaneke kutya ota ningi oshinima shontumba, nolundji oha tumbula Kalunga oye e li onzapo.’ Omuntu ohashi vulika e li popye nenge e li nyole.

Aantu yamwe otashi vulika ya tye osha puka okugana, molwaashoka Jesus okwa ti: “Inamu gana nando okuli . . . Onkee oohapu dheni nadhi tye: ‘Eeno, eeno,’ nenge ‘aawe, aawe,’ oondhoka tadhi gwedhwa ko, otadhi zi muMwiinayi.” (Mat. 5:33-37) Eeno, Jesus okwa li e shi kutya mOmpango yaMoses aantu oya li ya pitikwa ya gane miinima yontumba nosho wo kutya aapiya yamwe yaKalunga aadhiginini nayo oya li haya gana. (Gen. 14:22, 23; Eks. 22:10, 11) Okwa li wo e shi kutya Jehova naye okwa li a gana. (Heb. 6:13-17) Onkee Jesus sho a popi oohapu ndhoka ka li ta ti kutya katu na nando okugana. Pehala lyaashono, okwa li ta londodha aantu kaaya gane miinima mbyono inaayi simana nenge kaayi na oshilonga. Otu na okukala aluhe hatu gwanitha po shoka twa popya nenge tu uvaneka, oshoka shono osho Jehova a hala.

Ongiini nduno ngele owa pulwa wu gane? Shotango, shilipaleka kutya oto ka gwanitha po shoka to gana wu ninge. Ngele ku shi wo nawa, oshi li hwepo kuu ninge egano ndyoka. Oohapu dhaKalunga otadhi ti: “Okukala inoo uvaneka sha hwepo, shi vule okuuvaneka ngoye ito tompola sha.” (Omuuv. 5:5) Oshikwawo, tala omakotampango gOmbiimbeli ngono taga tsu kumwe naashoka to pulwa wu uvaneke, e to ningi etokolo li ikolelela keiyuvo lyoye lya dheulwa kOmbiimbeli. Omakotampango gamwe geni gomOmbiimbeli tage ku kwathele moshinima shoka?

Okugana kumwe oku li metsokumwe nehalo lyaKalunga. Pashiholelwa, uuna Oonzapo dhaJehova tadhi hokana, ohadhi gana. Euvaneko ndyoka hadhi ningi nalyo oli li oludhi lwokugana. Ombushiki nomufuko ohaya gana komeho gaKalunga nogaantu kutya otaya ka kala ye holathane noya simanekathana “manga ye li momwenyo.” (Aaihokani yamwe otashi vulika kaaya popye oohapu ndhoka ngaashi dhi li, ihe natango otaya gana kuKalunga.) Okuza mpono ohaya ningi omusamane nomukulukadhi, noye na okukala pamwe onkalamwenyo yawo ayihe. (Gen. 2:24; 1 Kor. 7:39) Egano lyondjokana oli li mondjila noli li metsokumwe nehalo lyaKalunga.

Okugana kumwe kaku li metsokumwe nehalo lyaKalunga. Pashiholelwa, Omukriste gwashili ke na okugana a longithe iikondjitho a gamene oshilongo shawo nenge e ethe po eitaalo lye muKalunga. Ngele osho a ningi ngawo, nena ota yono oompango dhaKalunga. Aakriste yashili kaye na okukala “oshitopolwa shuuyuni,” onkee katu na okukutha ombinga momahilathano nosho wo miita. — Joh. 15:19; Jes. 2:4; Jak. 1:27.

Okugana kumwe okwa kwatela mo eiyuvo. Omathimbo gamwe otwa pumbwa okudhiladhila  muule kombinga yomayele gaJesus ngoka taga ti: “Shono shomupangeli, shi peni omupangeli, naashoka shaKalunga, shi peni Kalunga.” — Luk. 20:25.

Pashiholelwa, natu tye andola Omukriste ota ningi eindilo lyuukwashigwana nenge lyo-passport, ihe okwa uvu kutya okwa pumbwa okugana, opo a kale omudhiginini moshinima shoka. Ngele moshilongo mono okugana hono okwa kwatela mo okuninga euvaneko a ninge oshinima shono shi li ompinge nompango yaKalunga, eiyuvo lye lya dheulwa kOmbiimbeli itali ke mu pitika. Ihe epangelo moshilongo shoka ohashi vulika li mu pitike a lundulule iitya yomegano ndyoka, opo eiyuvo lye li mu pitike a gane.

Okuninga egano lyokukala omudhiginini, ndyono li na iitya ya lundululwa, otaku vulu okukala ku li metsokumwe nekotampango ndyono li li mAaroma 13:1, ndyoka tali ti: “Omuntu kehe na vulike kaapangeli mboka taye mu pangele.” Onkee Omukriste ota vulu okutokola kutya inashi puka a gane kombinga yoshinima shoka Kalunga a tegelela nale Aakriste ya ninge.

Osha simana wo wu vulike keiyuvo lyoye ndyoka lya dheulwa kOmbiimbeli, ngele owa pulwa wu longithe oshinima shontumba nenge wu ninge eudhi lyontumba sho to gana. Aaroma yopethimbo lyonale nosho wo Aascytia oya li haya gana kegongamwele ndyono lya li endhindhiliko lyoshikalunga shiita, negano ndyoka olya li euvaneko kutya omuntu ota ka kala omudhiginini. Aagreka oya li haya yelutha iikaha yawo mombanda uuna taya gana. Kungawo, oya li haye shi ulike kutya opu na oonkondo dhopakalunga dhi uvite ko nodhi wete shoka tashi ningwa nosho wo kutya aantu otaye ki ihokolola koonkondo ndhoka.

Odhoshili kutya kapu na omupiya gwaJehova ta ka gana koshinima nenge kendhindhiliko li na ekwatathano nomalongelokalunga giifundja. Ihe ongiini nduno ngele owa pulwa mompangu wu tule oshikaha shoye kOmbiimbeli sho to gana, opo wu gandje uumbangi wu li paushili? Moshinima shi li ngawo, oto vulu okutokola osho wu ninge, oshoka mOmbiimbeli omu na iiholelwa yaapiya yaJehova yamwe aadhiginini mbono ya li ya ningi eudhi lyontumba sho taya gana. (Gen. 24:2, 3, 9; 47:29-31) Osha simana wu dhimbulukwe kutya sho to gana ngawo, nena oto gana kuKalunga kutya oto ka popya oshili. Onkee owa pumbwa okukala wi ilongekidha wu ka yamukule paushili epulo kehe ndyoka tashi vulika wu ka pulwe.

Molwaashono otwa lenga ekwatathano lyetu naJehova, natu kale hatu galikana nokudhiladhila muule kombinga yegano kehe twa pulwa tu ninge, nokushilipaleka kutya eiyuvo lyetu itali ke tu nyenyetela nenge tu yone omakotampango gOmbiimbeli. Ngele owa tokola okugana, shilipaleka kutya egano ndyoka oto ke li gwanitha po. — 1 Pet. 2:12.