“Oonzapo ndhoka odha li hadhi ungaunga nombili naantu nosho wo nuumbwa wandje. Esiku limwe, Elaine, ngoka a li a thikama pokatemba kiileshomwa, okwa pe uumbwa wandje uyali uumbiskiti. Okuza mpono, oshikando kehe tatu ya popepi nokatemba hoka, uumbwa wandje owa li hawu kala wa hala okuya po wu ka pewe uumbisikiti.

“Uule woomwedhi dhontumba, uumbwa wandje owa kala hawu yi pokatemba hoka wu ka lye uumbisikiti, nangame onda kala handi popi paufupi nOonzapo ndhoka. Ihe kanda li nda hala okukala handi popi nadho unene. Onda li ndi na omimvo 70 nasha, nokanda li ndi shi kutya Oonzapo odhi itaala shike. Molwaashoka kanda li ndi uvitile ombili oongeleka dhUukwakriste, onda mono kutya oshi li hwepo ndi konakone Ombiimbeli kungaye mwene.

“Pethimbo ndyoka, onda li wo handi mono Oonzapo dhilwe miitopolwa yi ili noyi ili yoshilando, dha thikama puutemba wadho. Nadho odha li wo aluhe dhi na ohamu naantu. Odha li aluhe hadhi yamukula omapulo gandje gi ikolelela kOmbiimbeli, naashono osha ningitha ndje ndi kale nde dhi inekela.

“Esiku limwe, Elaine okwa pula ndje a ti: ‘Owu shi ngaa kutya iinamwenyo omagano twe ga pewa kuKalunga?’ Onde mu yamukula nda ti: ‘Eeno, osho lela!’ Elaine okwa leshele ndje Jesaja 11:6-9. Okuza esiku ndyoka onda kala nda hala okwiilonga kombinga yOmbiimbeli, ihe kanda li natango nda hala okulesha iileshomwa yOonzapo.

“Momasiku ga ka landula ko, otwa li twa kundathana iinima tayi tungu naElaine nomusamane gwe, Brent. Oya lombwele ndje ndi leshe Mateus sigo Iilonga ndi uve ko kutya okukala Omukriste gwashili okwa kwatela mo shike. Osho nda ningi. Konima yethimbo efupi, onda tameke okukonakona Ombiimbeli pamwe naBrent naElaine. Shono osha ningwa pokwenye mo 2016.

“Onda li ndi hole ekonakonombiimbeli lyandje ndyoka lya li hali ningwa oshiwike kehe nosho wo okukala pokugongala kehe kOshinyanga shUukwaniilwa. Onda li nda nyanyukwa lela sho tandi ilongo Ombiimbeli. Konima yomumvo lwaampono, onda ninginithwa e tandi ningi Onzapo yaJehova. Ngashingeyi sho ndi na omimvo 79, ondi shi kutya ondi li melongelokalunga lyashili. Jehova okwa kwathela ndje ndi ninge oshitopolwa shuukwanegumbo we womuuyuni awuhe.”