Ya injiniya yatandika ukupanga iviombelo ivyakwavwilizya ya dokota ukuombela pa mulwale wino yangalepula sile panono kucila kumulepula sana. Pakuti yacite vivyo yakakolanya ukutontekana kwi kasa nanti lupembe lwakwe Oktopasi

Elenganyini pali cii: Oktopasi angafumbata, kulema nu kusezya ivintu kuomvya makasa yakwe 8 atontekane nupya yano yakanyumvuluka, angacita vivyo nanti sile apa kacende kanono sana. Kulunda pa kukonesya impembe ukuli konsi, oktopasi akakomya ni viputulwa vimwi vya makasa yano wakwata nga calondekwa ukucita vivyo.

Aakalondelezya pa vintu yazumila ukuti ukukwata ikasa ilya kupanga ilingatontena wi kasa lyakwe oktopasi kungaomba ningo sana pa kuombela pa kulepula ukwaula nu kuti kuye ukulepulisya umulwale. Ciombelo ca musango uwo cingalenga kuye ukuombela alwale aakuti cingatala sana ukuyalepula ndi cakuti kutali ciombelo cico.

Lolini vino impembe izitontekane zyakwe oktopasi zikaomba

Ndakai yapanga ikasa ilyakolana ni lyakwe oktopasi nupya likaomviwa wakwe vivi kwene vino lyakwe oktopasi likaomba. Ciputulwa conga icikasa lilyo icingatalimpa kufika ku mamilimita 135 cingaombela mu vilundwa vya mukasi ka mwili ivitontekane kupitila mukuvikatusya nu kuvilema ukwaula ukuti vyononeke nupya pa nsita yonga kwene ale ciputulwa cuze icikasa cikuombela pa kulepula ukunzi. Dokota uwi zina lyakwe Tommaso Ranzani , uwaya umwi umba lyakwe yano yapanzile makasa aakolana na yakwe oktopasi, walanzile ati, “ituzumila ukuti inzila ii iilatandikilapo ukuya ipya nupya iyaticila inzila zyonsi izikaomviwa.”

Uzye mukwelenganyapo uli? Uzye ikasa lyakwe oktopasi lyasangwike sile nanti kwaya uwalipanzile?