Leza waumvile antu ukuti yapanga icupo ndi cakuti sile yatwalana kuli kuti umonsi nu mwanaci. (Utandiko 1:27, 28; Aina Levi 18:22; Mapinda 5:18, 19) Baibo yalesya antu asi ya iya nanti aci ukupanga icupo, nanti ukulalana kwa yonsi yatupu nanti anaci yatupu. (1 Kolinto 6:18) Pa vintu vivyo paya na ukulemoola ivya nzwalo vya muntu muze pakuti auvwe insuna, kufyompa ivya nzwalo alino nu kulaalana kwa pa matako.

 Nanti icakuti Baibo yalesya ukulalana kwa yonsi yatupu nanti anaci yatupu, isizumilizya ukupata antu akacita vivyo. Lelo Aina Klistu yakakomeleziwa ‘ukucindika antu yonsi.’—1 Petulo 2:17.

 Uzye muntu angavyalwa ni miyele ya kulonda ukulala nu monsi muze nanti umwanaci muze?

Baibo italandapo umukulungatika pa antu akavyalwa ni miyele yakulondesya ukulala nu monsi muze nanti mwanaci, nomba ikalanda ukuti swensi twavyalwa umu nzila yakuti twatama masunde yakwe Leza. (Loma 7:21-25) Ukucila ukwika amano uku vintu ivikalenga umuntu alondesya ukucita vivyo, Baibo yalesya ukulalana kwa yonsi yatupu na anaci yatupu.

 Ivyakucita pakuti mwazanzya Leza nanti icakuti umwili lyonsi ukalondesya ukulalana nu monsi muzo nanti umwanaci muzo.

Baibo ikati: “Mutaleka mili inu yamutungulula. Mulinzile kukoma vilondwa viipe vya mwili vino vikuomba munomuli, wakwe . . . kulongozya [kuli kuti ulalelale].” (Kolose 3:5) Pakuti mukome ivilondwa iviipe ivya mwili ivingalenga mucite iviipe, mulinzile ukuzifya imyelenganyizizye inu. Ndi cakuti ilingi mukaelenganya pa vintu ivisuma, mungataluka uku vicitwa iviipe. (Filipi 4:8; Yakobo 1:14, 15) Nanti icakuti pa kutandika mungacula sana, ndi papita insita cinganguka. Leza walaya ukuti alamwazwa ukulenga “imyenzo inu nga na ya kampingu inu viye vipya.”—Efeso 4:22-24.

 Vivyo kwene ivikacitikila na antu aingi akalonda ukupanga icupo ica monsi nu mwanaci nomba akalonda ukulondela vino Baibo ikalanda. Asimbe asilondesya ukutwala nanti ukutwalwa nanti yano yatwalana nu muntu asikwanisya ukucita ivintu vya mu cupo yakaezya ukuikanya asi mulandu na mezyo yano yangapitamo. Yaya ni nsansa, nupya yayo akalonda ukulala nu monsi muze nanti umwanaci muze yangacita vivyo kwene ndi cakuti yakulonda yazanzya Leza.—Malango 30:19.