Uzye Tulinzile Ukutiina Satana?
LYASI LYAKUTANDIKILAKO | UZYE SATANA AKUNO WAYA?
Uzye Tulinzile Ukutiina Satana?
Catala sana ukumanya umuza uno yakati Kaboni monokusaidi, usiloleka nupya usinunka, limwi antu yangafuuta umuza uu ukwaula ukumanya. Limwi antu aingi pali yaayo aakafwa kuli sumu umu nsi yonsi, a pamulanda nu kusalangana kwa muza kwene uu wakwe Kaboni monokusaidi. Nomba, tutalinzile ukutiina. Kwaya inzila zya kumanyilamo umuza uwo na vino mungaicingilila mweineco. Antu aingi yakaika vimwi ivya kuyacelula nupya yakasumbako sana amano lino vyayacelula.
Satana waya wakwe Kaboni monokusaidi, asiloleka, watala sana ukumanyikwa uku yantunze, napya wipa wakwe cimwi. Lelo Leza akatwazwa. Ndi cakuti mwalondela vino Leza watupela ivitantiikwe apisika, ale na Satana mutanga mwamutiina.
Amaka yakuisoolwela. Pali Yakobo 4:7 pa katunena ukuti: “Mwakanya ciwa, nawe aluutuka kufuma kunomuli.” Nanti cakuti Satana wakwata amaka, atanga amupatikizye ukucita ivintu vino musikulonda. Mwakwata amaka yakuisoolwela. Pali 1 Petulo 5:9 pakati: “Mukome mu utailo winu nu kukanya Ciwa.” Iusyini ukuti, Satana wasile Yesu papo kwene sile, lino Yesu wakanyile amezyo yatatu. (Mateo 4:11) Namwe kwene mungasoolola ukukana amezyo yakwe Satana.
Uucuza na Leza. Pali Yakobo 4:8 pakatukomelezya ukuti ‘twapalama kuli Leza.’ Yeova umwineco akumwama ukuti muye cuza wakwe. Uzye mungacita uli vivyo? Inzila isuma sana ino mungatandikilako, u kusambilila ivingi pali Leza ukupitila muli Baibo. (Yoane 17:3) Vino mukusambilila pali Yeova vilaleenga mumutemwe, nupya ukutemwa kuuko, kulaleenga mwacita ukulonda kwakwe. (1 Yoane 5:3) Uzye nga mwapalama kuli Tata winu uwa mwiyulu, nga wene alacita uli? Yakobo nupya watwalilila ukulanda ati: “[Leza] amapalama kuno muli.”
Leza walaya ukuti alaacingilila antu yakwe. Pa Mapinda 18:10 paya mazwi aakuti: ‘Izina lyakwe Yeova ulupungu ulukome. Umuntu akacita vyaololoke akautukilamo nu kucingililwa.’ Nomba, cisikupiliula ukuti izina lyakwe Leza lyaya wa cizimba icingamuletela isyuko. Lelo, cikupiliula ukuti yaayo aakacindika izina lyakwe Leza umu cumi yangapepa kuli aliwe insita iliyonsi pakuti ayacingilile.
Vino yamwi yacisile ivingatwazwa. Pa Milimo 19:19 pakatwiusyako pali yamwi amu Efeso aizile yaya Aina Klistu, ukuti: “Aingi muli yano acitanga malele yaleta impapulo zyao apali pamwi yazyoca pa manso ya antu. Lino yapenda yazana vino mutengo wakwezyo wali impiya zyakwe siluva mazimbi makumi yasano [50,000].” a Aina Klistu yaayo yononyile ivintu vyonsi ivyaomviwanga umu vya mipasi, nanti cakuti yavikazile pa mutengo ukome. Viivi vino yacisile vingatwazwa naswe ndakai. Insi ii yazulamo ivya mipasi. Vintu vimwi ivya mipasi ivikaloleka kwati vitaipa navyo kwene vingaleenga ukuti iviwa vyatucuzya. Cati-cicindama ukuti mwataluka uku vintu vivyo, nanti vingaaloleka kwati vyaya sile ningo.—Malango 18:10-12.
Rogelio, uwatalumbulwa umwilyasi lyakutandikilako, ataazumiile ukuti kwaya Satana mpaka lino wafisizye imyaka 50 iyakuvyalwa. Nomba wizile atandika ukwelenganyapo. U mulandu ci? Walanzile ukuti: “Nizile nkwata Baibo umuku wakutandikilapo umu umi wane. Vino nasambiliile muli Baibo, i vyalenzile nsininkizye ukuti fwandi Satana akunowaya. Viivikwene vino nasambiliile, i vikancingilila ukuti ntaatungululwa na Satana.”
Uzye mungatemwa ukwizaikala umu nsi lino kutalaya Satana? I cumi kwene cintu cico cingacitika. Amalembelo yakasoowela pa nsita ya kunkoleelo lino Ciwa, aakaponzya antu aingi cuze, ‘alasuumbwa muli yemba wa moto na maluti.’ (Umbwilo 20:10) Kwene, umoto na maluti vitanga vikome iciumbwa ca mupasi. Fwandi, yemba wa moto akaimililako uononesi wa pe. Satana alononwa nupya atalatala ayeko amanda pe. Ala ilaya insita isuma cuze kuli yaayo aatemwa Leza!
Pali ino nsita, twalililini ukusambilila ivingi pali Yeova na vino akalonda. b Elenganyini ukuti muli nu umi lino cilalandwa ukwaula nu kutwisika ukuti, “Satana ataayako!”
[Mafutunoti]
a Ndi cakuti impiya zyakwe siluva aziizi zino aina Loma yaomvyanga, zyonsi pamwi zyali nu kulingana na malipilo yano aomvi 50,000 yangafola pa wanda onga—zyali impiya izingi wakwe cimwi!
b Pakuti mumanyilepo navyuze pali Satana na vino Leza akalola ukutaila imipasi, lolini icipande 10 umwibuku lyakuti Uzye Baibo Ikasambilizya Ukuti Uli? Mungaleenga ibuku lii kuli Nte Wakwe Yeova aliwensi nanti mungaliwelengela apa Intaneti pa www.jw.org.
[Cisinka icili umu vilembo vikulu apifwa 6]
“Vino nasambiliile umu Malembelo vyalenzile nsininkizye ukuti Ciwa akuno waya. Viivikwene vino nasambiliile vikangazwa ukuti ntatungululwa na Satana”
[Cikope api’fwa on page 6]
Yeova akaatusambilizya ivingatwazwa ukucingililwa
