Amazwi ku Yavyazi

Uzye upe ci ucindame sana uno mungapeela ana inu? Kwaya ivintu ivingi vino ana yakalonda. Pa vintu vivyo paya nu kuyatemwa, ukuyatungulula, alino nu kuyacingilila. Nomba, upe ucindamisye uno mungayapeela, u kuyasambilizya ukumanya Yeova alino ni cumi ca muli Baibo. (Yoane 17:3) Kucita vivyo kungalenga ana inu kusambilila ukutemwa Yeova alino nu kumuombela nu mwenzo onsi lino yacili anono.​—Mateo 21:16.

Avyazi aingi yazana ukuti ana yakaomba ningo ndi cakuti yakuyasambilizya pa kasita kanono alino nu kuyapeelako tumwi twakucita lino yakuyasambilizya. Acino, tuli nu luzango ukumupangila ulupapulo luu ulukuti Masambililo Yane Amuli Baibo. Sambililo lyonga na lyonga i lyanguke ukusambilizya. Ivikope na mazwi ayamo vyapangilwa ana aali ni myaka itatu nu kucepako. Mwaya ni vyakucita. Akabuku kaa asi kakuti ana yacinya, lelo a kakuti mwayawelengela pakuti mwalanzyanya nayo ningo.

Tukutaila ukuti lupapulo luu lwakulamwazwa lino mukusambilizya ana inu icumi ca muli Baibo lino yacili anono sana.​—2 Timoti 3:14, 15.

Sweswe ina inu,

Iumba Ilikatungulula Ilya Nte Zyakwe Yeova

[Cikope api’ fwa 3]