Uzye pali vino mukacita ivyakumwazwa ukupalama kuli Yeova, paya nu kusambila ilembelo lyakwe cila wanda ilikaya mu kabuku kakuti Twasambilila Malembelo Cila Wanda? Ndi cakuti asi vino mukacita, uzye mutanga mutantike ukuti cila wanda mwasambilila ilembelo? Antu aingi yakasambilila ilembelo lya wanda katondo pakuti yangaelenganya pa vyeo vivyo lino yakuomba imilimo uwanda kwene uwo. (Yoswa 1:8; Masa. 119:97) Uzye mungacita uli pakuti mwaipakizya ilembelo lyakwe cila wanda? Mwawelenga amazwi ali mu cikomo pakuti mumanye icikulandwapo. Mwaezya ukwelenganya api lyasi lya muli Baibo ilikulondolola icisinte cisunde icili umwi ilembelo. Lyene mwaomvya icisinte cico umu umi winu. Ndi cakuti mukuomvya izwi lyakwe Leza muli vino mukupingulapo, lilaamutungulula nupya lilaamwazwa sana.—Masa. 119:105.

Amu lupwa lwa pa Betele yakasambilila ilembelo lyakwe cila wanda pa nsita ya cakulya ca katondo. Umu myaka inono iyatipitapo, amalyasi aingi akayako pa mapepo ya katondo yaika pa JW Broadcasting^® pa ciputulwa cakuti MASAMBILILO NU KUKONGAANA. Uzye alilaci lino mwasyalikizye ukutambako mavidyo yamwi pali yayo? Alino ivyeo vimwi vikaya ukulingana na vino mukulonda. Wakwe, ndi cakuti mukulonda ukupingulapo pali vimwi, uzye ilyasi ilikalanda pali Loti lingamwazwa uli?

TAMBISYINI VIDYO YAKUTI MUTATEMWA INSI (1 YOA. 2:15), LYENE, MWASUKE MAUZYO ALONDELELAPO:

• Uzye i cisinte ci ica muli Baibo apafumile amapepo ya katondo?

• Uzye ilyasi lyakwe Loti likalangilila vyani pa uyi uwaya umu kutemwa insi nanti ivintu ivyayamo?—Utan. 13:12; 14:12; 19:3, 12, 13, 24-26

• Uzye tukalanga uli ukuti twatemwa Yeova ukucila ukutemwa insi nanti ivintu ivyayamo?