Batyibi 7:1-25

  • Ngideoni ne bantu bandi 300 (1-8)

  • Kibumbo kya divita kya Ngideoni kibanekenya Midyana (9-25)

    • “Kipete kya Yehova ne kya Ngideoni!” (20)

    • Kavutakanya mu nkambi ya bene Midyana (21, 22)

7  Kupwa Yelubale, ko kunena’mba Ngideoni,+ ne bantu bonso baadi nabo babūka lubanga futwi batūla nkambi ku Nsulo ya Haloda, papo nkambi ya Midyana yadi kungala kwandi pa mukuna wa Mole mu dilungu dya musanza.  Ebiya Yehova wanena Ngideoni amba: “Bantu bodi nabo i bangi bininge pa kusaka’mba mpāne Midyana mu makasa abo.+ Shi bitupu, Isalela ukeanya ku meso ami amba, ‘I kuboko kwa ami mwine kwampandija.’+  Shi ke pano, nena’po bidi ku meso a bantu amba: ‘Yewa ense udi na moyo ne luzakalo, ajokele kwandi.’”+ Penepo Ngideoni webatompa. Ponkapo bantu 22 000 bajokela kwabo, kwashala bantu 10 000.  Nansha nankyo Yehova wanena Ngideoni amba: “Bantu bakidi bangi bininge. Tūkila nabo ku mema amba nkutompele’bo kwine’kwa. Shi nakunena’mba, ‘Uno ukenda nobe,’ nandi ukenda nobe, ino shi nakunena’mba, ‘Uno kakendapo nobe,’ nandi kakendapo nobe.”  Ebiya wasela bantu batūkila ku mema. Kupwa Yehova wanena Ngideoni amba: “Muntu ense ulaka mema na ludimi lwandi mulakilanga mbwa musansanye mu boba bazunzama mu manwi pa kutoma.”  Bungi bwa boba badi balaka mema, badi batūla makasa abo ku byakanwa byabo i bana-balume 300. Ino bantu bakwabo badi bazunzama mu manwi pa kutoma.  Penepo Yehova wanena Ngideoni amba: “Nsa kwimupandija na bana-balume 300 badi balaka mema, kadi nsa kupāna Midyana mu makasa enu.+ Ino leka bantu bakwabo bonso bajokele kwabo.”  Ebiya basela byakudya ne masengo mu bantu’ba, kupwa wajokeja bana-balume bakwabo bonso ba Isalela kwabo, walama enka bana-balume 300. Nkambi ya Midyana yadi kunshi kwandi mu dilungu dya musanza.+  Mu bwine bufuku’bwa, Yehova wamunena’mba: “Imana, tamba nkambi bulwi, mwanda neipāna mu kuboko kobe.+ 10  Ino shi ubaivwana moyo wa kutamba bulwi, tūkila mu nkambi na Pula mwingidi obe. 11  Teja byobasa kunena, kupwa usa kwikala na bukankamane* bwa kutamba nkambi bulwi.” Ponkapo aye ne Pula mwingidi wandi batūkila kufula kwa kibumbo kya divita kyadi kitūdile nkambi. 12  Ino Midyana ne Amaleke ne Bantu ba Kutunduka+ bonso bayula mu dilungu dya musanza pamo bwa bitānda bya njie, bangamedia babo badi bangi kebabadika,+ bavule pamo bwa musenga wa ku mukunko wa dijiba. 13  Ebiya Ngideoni wafika, kwadi muntu wadi usekunwina mukwabo kilotwa, kanena’mba: “Kino kyo kilotwa kyonalota. Kwadi mukate mujokoloke wa mebele a buluba wadi ukunkulumuka mu nkambi ya Midyana. Ubafika ku pema ubamuteme bininge nandi walakata.+ Bine, wafulamika pema panshi, kupwa pema wapone mubatalale.” 14  Penepo mukwabo wamunena’mba: “Kyakyo’tu i enka kipete kya Ngideoni+ mwanā Yoashe, muntu wa Isalela. Leza wapāna Midyana ne nkambi yonso mu kuboko kwandi.”+ 15  Ngideoni pa kumwivwana’tu usekununa kilotwa ne nshintulwilo yakyo,+ wevukwila panshi katōta. Kupwa wajokela ku nkambi ya Isalela kanena’mba: “Imanai, mwanda Yehova wapāna nkambi ya Midyana mu kuboko kwenu.” 16  Ebiya waabanya bana-balume 300 mu bibumbo bisatu, webapa bonso masengo+ ne milondo mikatampe yambulwa’mo kintu poso’nka byenge byadi mu milondo’mwa. 17  Kupwa webanena’mba: “Ntalei ne kulonga enka monongela. Shi nafika kufula kwa nkambi, mufwaninwe kulonga monka monongela. 18  Shi naile kimpungidi, ami ne bonso bondi nabo, nenu mufwaninwe kwila masengo kufulakufula konso kwa nkambi ne kutūta kyungwe amba, ‘Kipete kya Yehova ne kya Ngideoni!’” 19  Ngideoni ne bana-balume 100 baadi nabo bafika kufula kwa nkambi ku ngalwilo ya kilo kya pa bukata bwa bufuku,* kupwa’tu kutūla balami pa byaba byabo. Ebiya baila masengo+ ne kulala milondo mikatampe ya mema yadi mu makasa abo.+ 20  Penepa bibumbo bisatu’bya byaila masengo ne kuboyola milondo mikatampe’ya. Bakwata byenge ku makasa abo a lunkuso koku bēla masengo adi mu makasa abo a lundyo kebatūta kyungwe amba: “Kipete kya Yehova ne kya Ngideoni!” 21  Mu kine kitatyi’kya muntu ne muntu wadi wimene pa kifuko kyandi kufulakufula konso kwa nkambi, penepo kibumbo kyonso kya divita kyanyema, bela ñanji koku banyema lubilo.+ 22  Boba 300 baila’nka kwila masengo, kadi Yehova watadija kipete kya muntu ne muntu ku mukwabo mu nkambi yonso;+ kibumbo kya divita kyanyema kutūla ne ku Bete-Shita, ne ku Zelela, kutūla ne kufula kwa Abele-Mehola+ dya ku Tabata. 23  Penepa baityila bana-balume ba Isalela pamo tamba ku Nafatale, ne ku Ashela, ne bonso ba ku Manase,+ kebalonda Midyana lubilo. 24  Ngideoni watuma mikendi mu ntanda yonso ya ngulu ya Efelaimi amba: “Tūkai mutambe Midyana bulwi, ne kukwata mashinda enda ku mema kutūla ne ku Bete-Bala ne Yodano.” Ponkapo bana-balume bonso ba Efelaimi bebungila pamo, bakwata mema kutūla ne ku Bete-Bala ne Yodano. 25  Kadi bakwata ne bamfumu babidi ba Midyana, ba Olebe ne Zebe; batapila Olebe pa dibwe dya Olebe,+ Zebe nandi bamutapila pa kyengelo kya vinyu kya Zebe. Badi balonda’nka kulonda Midyana,+ kadi baselela Ngideoni mitwe ya ba Olebe ne Zebe mu ntanda ya ku Yodano.

Kunshi kwa Dyani

Kishima pa kishima i, “makasa obe asa kukomena’ko.”
Tamba kubwipi na nsá 10 ya kyolwa kutūla kubwipi na nsá 2 ya lubanga.