Batyibi 1:1-36
1 Kupwa kwa lufu lwa Yoshua,+ bene Isalela* baipangula Yehova+ amba: “Le i ani motudi’mu usa kukanda dibajinji kukalwa na bene Kenani?”
2 Yehova walondolola’mba: “Yuda ye usa kukanda.+ Talai! Nsa kupāna* ntanda mu makasa andi.”
3 Ebiya Yuda wanena mwanabo Shimioni amba: “Kanda nami mu ntanda*+ yobampele tukalwe na bene Kenani. Kupwa nami nsa kwenda nobe mu ntanda yobakupele.” Penepo Shimioni waenda nandi.
4 Yuda pa kukanda, Yehova wapāna bene Kenani ne bene Pedizi mu maboko abo,+ banekenya bantu 10 000 mu Bezeke.
5 Batana Adoni-Bezeke mu Bezeke, balwila nandi monka, banekenya bene Kenani+ ne bene Pedizi.+
6 Adoni-Bezeke pa kunyema, bamulonda lubilo bamukwata, penepo bamuketa byala ne maná a mukumo.
7 Ebiya Adoni-Bezeke wanena’mba: “Kudi balopwe 70 baketelwe byala ne maná a mukumo, baboyanga byakudya munshi mwa meza ami. Leza waundubwila monka monalongēle.” Kupwa bamuselela ku Yelusalema,+ wakafwila konka.
8 Ne kadi, bana-balume ba Yuda balwa na Yelusalema+ bamukwata; bamukubija yense na kipete basōka ne kibundi.
9 Kupwa bana-balume ba Yuda batūka kukalwa na bene Kenani bekalanga mu ntanda ya ngulu ne mu Nengeba ne mu Shefela.+
10 Ebiya Yuda waenda kukalwa na bene Kenani badi bashikata mu Hebelona (Hebelona wadi witwa dibajinji bu Kidiata-Alāba), baonakanya Sheshai, Ahimana, ne Talamai.+
11 Batamba kwine’kwa baenda kukalwa na bekadi ba Debile.+ (Debile wadi witwa dibajinji bu Kidiata-Sefele.)+
12 Ebiya Kalebu+ wanena’mba: “Yewa ukanekenya Kidiata-Sefele ne kumukwata, nkamupa wami mwana Akesa ke wandi mukaji.”+
13 Penepa Oteniele+ mwanā Kenaza,+ nkasandya Kalebu, wekikwata. Nandi wamupa wandi mwana Akesa ke wandi mukaji.
14 Ino Akesa paadi wenda ku njibo, wamuzenza alombe shandi ntanda. Kupwa Akesa watūka pa wandi mpunda.* Kalebu wamwipangula’mba: “Le usaka bika?”
15 Nandi wamulondolola’mba: “Nakwisāshila ngesele dyese, mwanda waumpele kipindi kya ntanda kunshi;* mpe ne Ngulote-Maime* mwine.” Ebiya Kalebu wamupa Ngulote wa Kungala ne Ngulote wa Kunshi.
16 Penepo lutundu lwa bene Kena,+ muko wa Mosesa,+ lwakanda tamba ku ntanda ya mikoma+ na bantu ba Yuda baenda mu ntanda mutuputupu ya Yuda kunshi kwa Alada.+ Baenda kwine’kwa bashikata mu bukata mwa bantu.+
17 Ino Yuda waenda na mwanabo Shimioni, batamba bulwi bene Kenani bekalanga mu Zefate ne konakanya bekyonakanya.+ Penepo bainika kibundi’kya bu Holama.*+
18 Kupwa Yuda wakwata Ngaza+ ne ntanda yakyo, Ashekelona+ ne ntanda yakyo, ne Ekalone+ ne ntanda yakyo.
19 Yehova wadi na Yuda, bayata ntanda ya ngulu ke yabo, ino kebabwenyepo kupanga bekadi ba mu dilungu,* mwanda badi na makalo a bulwi adi na bikwakwa bya byuma.*+
20 Bapa Kalebu Hebelona, monka mwalaile’kyo Mosesa,+ nandi wapanga’mo bana basatu ba Anaki.+
21 Ino bene Benjemani kebapangilepo bene Yebushi bekalanga mu Yelusalema, o mwanda bene Yebushi bakishikete na bene Benjemani mu Yelusalema kufika ne dyalelo.+
22 Mu kine kitatyi’kya, njibo ya Yosefa+ yakandile kukalwa na Betele, kadi Yehova wadi nabo.+
23 Njibo ya Yosefa yakabelele Betele (papo kibundi’kya kyadi kitwa dibajinji bu Luzi),+
24 ino batubedibedi bamona muntu utamba mu kibundi. Ebiya bamunena’mba: “Witulombole’po bidi dishinda dyenda mu kibundi, netu tusa kukulongela biyampe.”*
25 Penepo muntu’wa webalombola dishinda dyenda mu kibundi, nabo bakubija kibundi kyonso na kipete, ino baleka muntu’wa ende ne kisaka kyandi kyonso.+
26 Muntu’wa waenda ku ntanda ya bene Hiti waubaka’ko kibundi wekinika bu Luzi, kikidi na dino dijina kufika ne dyalelo.
27 Manase kayetepo Bete-Sheane ne bibundi bidi mu bwendeji bwandi,* Tanake+ ne bibundi bidi mu bwendeji bwandi, bekadi ba Dola ne bibundi bidi mu bwendeji bwandi, bekadi ba Ibeleame ne bibundi bidi mu bwendeji bwandi, ne bekadi ba Mekido ne bibundi bidi mu bwendeji bwandi.+ Bene Kenani bakomene baendelela kushikata mu ino ntanda.
28 Bene Isalela pa kwikala bakomo, baalamuna bene Kenani ke ba kwingila mingilo ya kuningilwa,+ ino kebebapangile’mopo bonsololo.+
29 Efelaimi nandi kapangilepo bene Kenani badi bashikete mu Ngezele. Bene Kenani badi bakishikete mu bukata mwabo mu Ngezele.+
30 Zebuluna kapangilepo bekadi ba Kitelone ne bekadi ba Nahalole.+ Bene Kenani badi bakishikete mu bukata mwabo ino baalamwinwe ke ba kwingila mingilo ya kuningilwa.+
31 Ashela kapangilepo bekadi ba Ako ne bekadi ba Shidona,+ ba Alabe, ba Akiziba,+ ba Heleba, ba Afike,+ ne ba Lehobe.+
32 O mwanda bene Ashela badi bakishikete mu bukata mwa bene Kenani bekalanga mu ntanda’ya, mwanda kebebapangile’mopo.
33 Nafatale kapangilepo bekadi ba Bete-Shemeshe ne bekadi ba Bete-Anate,+ ino badi bakishikete mu bukata mwa bene Kenani bekalanga mu ntanda’ya.+ Bekadi ba Bete-Shemeshe ne Bete-Anate baikele ke ba kwibengidila mingilo ya kuningilwa.
34 Bene Amole batyininye bene Dani mu ntanda ya ngulu, mwanda kebebalekelepo batūkile mu dilungu.*+
35 O mwanda bene Amole bakomene bashikata mu Lūlu lwa Helese, Aiyalone,+ ne Shalabime.+ Ino bukomo* bwa njibo ya Yosefa pa kuvudila’ko,* baningilwa kwingila mingilo mikomokomo.
36 Ntanda ya bene Amole yadi tamba ku mukuna wa Akelabimi,+ tamba ku Sēla kokanda.
Kunshi kwa Dyani
^ Kishima pa kishima i, “bana ba Isalela.”
^ Nansha’mba “napēne.”
^ Kishima pa kishima i, “bubale bwami.”
^ Bibwanika padi i, “wakupila makasa andi aye papo pa mpunda.”
^ Nansha’mba “Nengeba.”
^ Ko kushintulula’mba “Masāni (Bibakudi) a Mema.”
^ Ko kushintulula’mba “Konakanibwa.”
^ Nansha’mba “dilungu dya musanza.”
^ Kishima pa kishima i, “makalo a byuma.”
^ Kishima pa kishima i, “kukulombola buswe bwa ndamatyidile.”
^ Nansha’mba “bimujokolokele.”
^ Nansha’mba “dilungu dya musanza.”
^ Kishima pa kishima i, “kuboko.”
^ Kishima pa kishima i, “kulēma.”
