Batyibi 18:1-31
18 Mu mene mafuku’a kekwadipo mulopwe mu Isalela.+ Kadi mu mene mafuku’a kisaka kya bene Dani+ kyadi kikimba kifuko kwa kushikata, mwanda kufika ne mu kine kitatyi’kya badi kebapelwe bupyani mu bisaka bya Isalela.+
2 Bene Dani batuma bana-balume batano ba mu bisaka byabo, bana-balume bankanka ba mu Zola ne Eshetaole,+ kukabela ntanda ne kutala moikadile. Bebanena’mba: “Endai mukatale mwikadile ntanda.” Abo pa kufika mu ntanda ya Ngulu ya Efelaimi, ku njibo ya Mika,+ balāla konka.
3 Pobadi kubwipi na njibo ya Mika, bajingulula diwi* dya nsongwalume mwine Levi, baenda kwadi kebamwipangula’mba: “Le i ani wakuletele kuno? I bika byolonga ku kino kifuko? Ne i kika kyoshikatyile kuno?”
4 Webalondolola’mba: “Mika waunongele nenki ne nenki, kadi waumpele kaji ka kumwingidila bu kitobo.”+
5 Kupwa bamunena’mba: “Ipangula’po bidi Leza shi lwendo lwetu lusa kwikala biyampe.”
6 Kitobo webasapwila’mba: “Endai mu ndoe. Yehova udi nenu mu lwendo lwenu.”
7 Ebiya bana-balume batano’ba baenda, bafika ku Laishe.+ Bamona mwadi mushikatyile’mo bantu mu bwanapabo na mushikatyilanga bene Shidona. Badi talala kutupu kyobalanga,+ kekwadipo mushindañani wa kasusu wa kwibavutakanya mu ntanda’ya. Badi kulampe na bene Shidona, kadi kebadipo bapwene na muntu nansha umo.
8 Pobajokēle kudi banababo ku Zola ne ku Eshetaole,+ banababo bebepangula’mba: “Le byadi namani?”
9 Balondolola’mba: “Tukandei kukalwa nabo, mwanda tubamone amba ntanda i milumbuluke’po kashā. Kyomwikakila i kika? Kemwakilejalejai kutwela kukayata ntanda’ya.
10 Pomukafika, mukatana bantu kebadipo na kyobalanga,+ kadi ntanda i mikatampe. Leza wapāna’yo mu kuboko kwenu, kifuko kekibudilwe kintu nansha kimo kya pano pa ntanda.”+
11 Ebiya bana-balume 600 belumbile byabulwi ba mu difu dya bene Dani bataluka mu Zola ne mu Eshetaole.+
12 Bakanda batūla nkambi ku Kidiata-Yeadimi+ mu Yuda. O mwanda kine kifuko’kya kidi dya kushika kwa Kidiata-Yeadimi kitwanga bu Mahane-Dani*+ kufika ne dyalelo.
13 Batamba kwine’kwa kebenda mu ntanda ya ngulu ya Efelaimi bafika ku njibo ya Mika.+
14 Penepa bana-balume batano baendele kukabela ntanda ya Laishe+ basapwila banababo amba: “Le muyukile amba mu ano mobo mudi efoda, ne bankishi ba batelafimi,* ne nkishi musōnge, ne nkishi wa kyuma?*+ Langai kala byomufwaninwe kulonga.”
15 Ebiya baimana kwine’kwa baiya dya ku njibo ya nsongwalume mwine Levi+ ku njibo ya Mika, kebepangula mwaikadile.
16 Papo bana-balume 600 ba Dani,+ belumbile byabulwi, bemene ku ntwelelo ya kibelo.
17 Bana-balume batano baendele kukabela ntanda’ba+ batwela kusela nkishi musōnge, ne efoda,+ ne bankishi ba batelafimi,*+ ne nkishi wa kyuma.*+ (Kitobo+ wadi wimene pa ntwelelo ya kibelo na bana-balume 600 belumbile byabulwi.)
18 Batwela mu njibo ya Mika, basela nkishi musōnge, ne efoda, ne bankishi ba batelafimi,* ne nkishi wa kyuma.* Ino kitobo webepangula’mba: “I bika le byomulonga?”
19 Nabo bamulondolola’mba: “Uba talala. Tūla kuboko pa kyakanwa kyobe, twaya wikale tata* ne kitobo wetu. Le kipite buya i kyepi—i abe kwikala kitobo mu njibo ya muntu umo’ni+ nansha i kwikala kitobo wa kisaka ne difu dituntulu mu Isalela?”+
20 Ponkapo kitobo waitabija, wasela efoda, bankishi ba batelafimi,* ne nkishi musōnge+ waenda na bantu’ba.
21 Penepa baalamuka kebenda, batangidija bana, bimunanwa ne bintu bya mvubu kumeso.
22 Badi ke bende kyaba kampanda na njibo ya Mika pekongakenye pamo bana-balume badi bashikete mu mobo a kubwipi na njibo ya Mika kwenda kukalonda bene Dani.
23 Abo pa kwela bene Dani mabila, nabo baalamuka bebatala, kebanena Mika amba: “Le i bika?” Mwanda waka mubekongakanya?”
24 Nandi wanena’mba: “Mubasela baleza bami bonalongele, kadi mubaenda ne na kitobo mwine. Le i bika byonashala nabyo? Penepa i kika kyomungipangwila’mba, ‘Le i bika le?’”
25 Bene Dani balondolola’mba: “Kokitunena na diwi dikande; shi bitupu, bana-balume balobe’ba* basa kukulonga kibi, ujimije būmi bobe* ne būmi bwa* ba mu njibo yobe.”
26 Penepa bene Dani baenda, Mika pa kumona’mba badi bakomo kumupita, waalamuka kajokela kwandi.
27 Pa kupwa kusela bintu byalongele Mika, ne kitobo mwine kumo, baenda ku Laishe,+ ku bantu badi talala, bampikwa kyobalanga.+ Bebatapa na kipete ne kusōka kibundi’kya na mudilo.
28 Kekwadipo muntu nansha umo wa kwikikūla, mwanda kyadi kulampe na Shidona kadi kebadipo bapwene na muntu nansha umo, kibundi kyadi mu dilungu dya musanza dya Bete-Lehobe.+ Kupwa baubakulula kibundi bashikata’mo.
29 Ne kadi, bainikile kibundi’kya bu Dani mungya dijina dya shabo Dani,+ wabutwilwe na Isalela.+ Ino Laishe dyo dyadi dijina dibajinji dya kibundi.+
30 Kupwa papo bene Dani beimikila nkishi musōnge,+ kadi Yonafane+ mwanā Ngelashoma,+ mwanā Mosesa ne bandi bana baikala babitobo ba kisaka kya bene Dani kufika ne difuku dyaselelwe bekadi ba ntanda’ya bu misungi.
31 Baimika nkishi musōnge walongele Mika’wa, waikala ponka’pa mafuku onso adi njibo ya Leza wa bine mu Shilo.+
Kunshi kwa Dyani
^ Nansha’mba “muneneno.”
^ Ko kushintulula’mba “Nkambi ya Dani.”
^ Nansha’mba “baleza ba mu njibo; bilezaleza.”
^ Nansha’mba “nkishi musungululwe.”
^ Nansha’mba “baleza ba mu njibo; bilezaleza.”
^ Nansha’mba “nkishi musungululwe.”
^ Nansha’mba “baleza ba mu njibo; bilezaleza.”
^ Nansha’mba “nkishi musungululwe.”
^ Nansha’mba “mudingidi.”
^ Nansha’mba “baleza ba mu njibo; bilezaleza.”
^ Nansha’mba “bana-balume ba muya wa bululu.”
^ Nansha’mba “muya obe.”
^ Nansha’mba “myuya ya.”
