Batyibi 10:1-18
10 Kupwa Abimeleke, kwataluka Tola mwanā Pua, mwanā Dodo, mwana-mulume wa Isakala, kupandija Isalela.+ Wadi ushikata mu Shamilu mu ntanda ya ngulu ya Efelaimi.
2 Watyibīle Isalela mambo mu myaka 23. Kupwa wafwa wajīkwa mu Shamilu.
3 Kupwa aye kwataluka Yaila mwine Ngileade, nandi watyibīle Isalela mambo mu myaka 22.
4 Wadi na bana bana-balume 30 badi bakanda pa bampunda 30, kadi badi na bibundi 30 bikitwa ne dyalelo bu Havote-Yaila;+ bidi mu ntanda ya Ngileade.
5 Kupwa papo Yaila wafwa wajīkwa mu Kamone.
6 Bene Isalela balonga monka bibi ku meso a Yehova,+ kadi bashilula kwingidila Babāla,+ bankishi ba Ashetolete, baleza ba Alami,* baleza ba Shidona, baleza ba Moabu,+ baleza ba bene Amone,+ ne baleza ba bene Fidishitia.+ Baleka Yehova, kadi kebamwingidilepo.
7 Penepa bulobo bwa Yehova bwaakila Isalela, webapoteja mu makasa a bene Fidishitia ne a bene Amone.+
8 Ebiya bapondakanya ne kumwesha bene Isalela malwa bya mwiko mu mwine mwaka’wa—bamwesha bene Isalela bonso malwa mu myaka 18 bobwa bukila bwa Yodano bwadi ntanda ya bene Amole mu Ngileade.
9 Bene Amone nabo badi batyibuluka Yodano mwanda wa kulwa na Yuda, ne Benjemani, ne njibo ya Efelaimi; Isalela waikala mu tusua tukatampe.
10 Kupwa bene Isalela baabija Yehova+ amba: “Tubakupi mambo, mwanda tubaleka Leza wetu ketwingidila’ko Babāla.”+
11 Ino Yehova wanena bene Isalela amba: “Mwene nemupandije mu Edipito+ ne ku bene Amole,+ ku bene Amone, ku bene Fidishitia,+
12 ku bene Shidona, kudi Amaleke, ne kudi Midyana pobadi bemumwesha malwa? Pomwandidile, nemupandije mu makasa abo.
13 Ino banwe mwaundeka kemwingidila’ko baleza bangi.+ O mwanda nkisapo kwimupandija monka.+
14 Endai ku baleza bomwatongele, mwibabije.+ Bemupandije mu kitatyi kyenu kya tusua.”+
15 Ino bene Isalela banena Yehova amba: “Tubapi mambo. Witulonge byonso byomona bu biyampe ku meso obe. Ino tubakwisāshila, abe witupandije’tu mu dino difuku.”
16 Penepo batalula baleza ba kungi mu bukata mwabo kebengidila Yehova,+ nandi kabwenyepo kadi kutala bitupu* masusu a Isalela.+
17 Mwenda mafuku bene Amone+ baitwa kwikongela pamo, batūla nkambi mu Ngileade. Penepo bene Isalela nabo bekongela pamo, batūla nkambi mu Mizipa.
18 Bantu ne bamfumu ba Ngileade kebenena abo bene na bene amba: “I ani usa kubadikila kumeso mu bulwi bwa na bene Amone?+ Nabya ekale mfumu pa bekadi bonso ba Ngileade.”
