Batyibi 2:1-23
2 Kupwa mwikeulu+ wa Yehova wakanda tamba ku Ngilengale+ waenda ku Bokimi kanena’mba: “Nemutambije mu Edipito nemutweja mu ntanda yonatyipīle bakulutuba benu.+ Ne kadi nanenene amba, ‘Nkikaketepo nansha dimo kipwano kyonasambile nenu.+
2 Banwe nenu kemufwaninwepo kusamba kipwano na bekadi ba ino ntanda,+ mufwaninwe kupomona bisōkelo byabo.’+ Ino kemwakōkelepo diwi dyami.+ Mwanda waka mwalongele namino?
3 O mwanda mwine nanenene kadi amba, ‘Nkikebapangapo ku meso enu,+ bakemwikadila ke dikinga,+ ne baleza babo bakemongolanga.’”+
4 Mwikeulu wa Yehova pa kunena bino binenwa ku meso a bene Isalela bonso, bantu batulula mawi kebadila.
5 Penepa bainika kifuko’kya bu Bokimi,* balambula konka bitapwa kudi Yehova.
6 Yoshua pa kunena bantu bende, mwine Isalela ense waenda ku bupyani bwandi kuyata ntanda ke yandi.+
7 Bantu baingidile nyeke Yehova mafuku onso adi’ko Yoshua ne mafuku onso adi’ko bakulumpe bashele bōmi kupwa kwa Yoshua, boba bamwene bilongwa bikatampe byonso byobalongēle Isalela kudi Yehova.+
8 Kupwa Yoshua mwanā Nuna, mwingidi wa Yehova, wafwa na myaka 110.+
9 Penepa bamujīka mu ntanda ya bupyani bwandi mu Timinate-Helese,+ mu ntanda ya ngulu ya Efelaimi, kungala kwa Lūlu lwa Ngashi.+
10 Lukongo lonso’lwa lwelungile na bankambo wabo,* ebiya kupwa abo kwatamba lukongo lukwabo kelwadipo luyukile Yehova nansha byobya byaalongēle Isalela.
11 Penepa bene Isalela balonga bibi ku meso a Yehova, baingidila* Babāla.+
12 Enka nenki baleka Yehova Leza wa bashabo webatambije mu ntanda ya Edipito.+ Kebalonda’ko baleza bakwabo, baleza ba bantu badi bebajokolokele,+ kebevukwila kobadi ne kusanshija Yehova mutyima.+
13 Baleka Yehova kebengidila’ko Bāla ne bankishi ba Ashetolete.+
14 Pa kino bulobo bwa Yehova bwaakila Isalela, nandi webapāna mu makasa a bantu ba kwibatūta, nabo bebatūta.+ Webapoteja mu makasa a balwana nabo badi bebajokolokele,+ kebadipo kadi babwanya kwimana ku meso a balwana nabo.+
15 Konso kobadi benda, kuboko kwa Yehova kwadi kwibalwa, kwibaletela kyamalwa,+ monka mwanenene’kyo Yehova ne monka mwebatyipīle’kyo+ Yehova, baikala mu tusua tukatampe.+
16 Ebiya Yehova wadi uleta batyibi ba kwibapandija mu makasa a bantu ba kwibatūta.+
17 Ino bapelele kuteja ne batyibi bene, kebalonga bundumba na baleza bakwabo ne kwivukwila kobadi. Basāsuka bukidi bonka mu dishinda dyaendele’mo bakulutuba babo, boba bakōkele mbila ya Yehova.+ Abo bakomenwa kulonga namino.
18 Ponso padi pebaletela Yehova batyibi,+ Yehova wadi pamo na mutyibi, webapandija mu makasa a balwana nabo mu mafuku onso a mutyibi’wa; mwanda Yehova wadi wibakwatyilwa lusa*+ pa mwanda wa kubinza kwabo kwadi kwibaletela boba badi bebasusula+ ne boba badi bebamwesha malwa.
19 Ino shi mutyibi wafwa, badi balonga monka bya kiboja bininge kupita ne bashabo bene na kulonda baleza bakwabo, bebengidila ne kwivukwila kobadi.+ Kebalekelepo bilongwa ne mwiendelejo wabo wa kūmija mutyima.
20 Mfulo mfulō bulobo bwa Yehova bwaakila Isalela,+ kanena’mba: “Mwanda uno muzo ubajilula kipwano kyami+ kyonasoñenye bakulutuba babo kadi kebankōkelepo,+
21 ami nami nkikapangapo ku meso abo muzo nansha umo mu mizo yashile Yoshua paafwile.+
22 I mwanda wa kutompa Isalela shi ukalama dishinda dya Yehova+ na kunangila’mo mwanangīle’mo bashabo.”
23 Penepa Yehova waleka ino mizo ikale’mo nyeke. Keipangilepo bukidibukidi, kadi keipēnepo mu makasa a Yoshua.
Kunshi kwa Dyani
^ Ko kushintulula’mba “Badila.”
^ Uno i muneneno wa kusāsula ushintulula’mba kufwa.
^ Nansha’mba “batōta.”
^ Nansha’mba “wealakanya.”
