Batyibi 3:1-31
3 Ino yo mizo yashile’ko Yehova mwanda wa itompe bantu bonso ba Isalela badi kebalwile nansha dimo mavita a mu Kenani+
2 (byadi namino mwanda wa nkongo ya bene Isalela ilonda’ko iyuke divita, boba badi kebemwenine bino bintu dibajinji):
3 bamfumu batano ba bene Fidishitia,+ ne bonso bene Kenani, bene Shidona,+ ne bene Hivi+ bekalanga mu Lūlu lwa Lebanona+ tamba ku Lūlu lwa Bāla-Helemone kutūla ne ku Lebo-Hamata.*+
4 Baikele ke ba kutompa Isalela mwanda wa kuyuka shi Isalela ukakōkela mbila ya Yehova yaapele bashabo kupityila kudi Mosesa.+
5 Penepa bene Isalela bashikata mu bene Kenani,+ bene Hiti, bene Amole, bene Pedizi, bene Hivi, ne bene Yebushi.
6 Kadi badi bayata bana bana-bakaji ba ino mizo ke babo bakaji, ino babo bana bana-bakaji bebapāna kudi bana bana-balume ba ino mizo, kadi bashilula kwingidila baleza babo.+
7 Penepa bene Isalela balonga bibi ku meso a Yehova, bailwa Yehova Leza wabo kebengidila’ko Babāla+ ne bipanda bikola.*+
8 Pa kino bulobo bwa Yehova bwaakila Isalela, webapoteja mu makasa a Kushana-Dishataimi mulopwe wa Mesopotemya.* Bene Isalela baingidila Kushana-Dishataimi myaka mwānda.
9 Bene Isalela pa kwabija Yehova,+ Yehova waleta umpandiji wa kukūla bene Isalela,+ Oteniele+ mwanā Kenaza, nkasandya Kalebu.
10 Mushipiditu wa Yehova wamutūkila,+ waikala ke mutyibi wa Isalela. Aye pa kwenda ku divita, Yehova wapāna Kushana-Dishataimi mulopwe wa Mesopotemya* mu kuboko kwandi enka ne byaatādile Kushana-Dishataimi.
11 Kupwa papo ntanda yakōkolokwa* mu myaka 40. Penepa Oteniele mwanā Kenaza wafwa.
12 Bene Isalela bashilula kulonga monka bibi ku meso a Yehova.+ Ebiya Yehova waleka Engelone mulopwe wa Moabu+ atādile Isalela, mwanda balongele bibi ku meso a Yehova.
13 Kupwa webetyila bene Amone+ ne bene Amaleke bebalwe.+ Batamba Isalela bulwi, bakwata ne kibundi kya tunkindu.+
14 Bene Isalela baingidila Engelone mulopwe wa Moabu myaka 18.+
15 Kupwa bene Isalela baabija Yehova,+ Yehova nandi webaletela umpandiji,+ Ehuda+ mwanā Ngela, mwine Benjemani+ wa kinkuso.+ Mwenda mafuku bene Isalela bamutuma kukatūla mulambu kudi Engelone mulopwe wa Moabu.
16 Mu kine kitatyi’kya Ehuda wepungila kipete kya bui kubidi, kya bula bwa kuboko,* wesomeka’kyo munshi mwa bivwalwa byandi dya pa ditangatanga dya lundyo.
17 Kupwa watūla mulambu kudi Engelone mulopwe wa Moabu. Ino Engelone wadi muntu munune bininge.
18 Ehuda pa kupwa kutūla mulambu, wanena bantu badi baselele mulambu bende.
19 Ino pa kupwa kufika pa bankishi basōnge* pa Ngilengale,+ wajoka bunka bwandi kanena’mba: “A mulopwe, ndi na musapu mufyame wa kukusapwila.” Ebiya mulopwe wanena’mba: “Ubai!” Penepa bengidi bandi bonso bamutaluka.
20 Ebiya Ehuda waiya kwadi paadi ushikete bunka mu kyumba kyandi kya pangala mudi nyā. Penepo Ehuda wanena’mba: “Ndi na musapu wa kukusapwila utamba kudi Leza.” Nandi waimana mu lupona* lwandi.
21 Kupwa Ehuda wasomona na kuboko kwa lunkuso kipete kyadi ku ditangatanga dyandi dya lundyo wamutunga’kyo munda.
22 Bui pa kupwa kutwela ne umpini mwine watwela, māni alambakana ku bui konso, mwanda kakulumwinepo kipete mu difu dyandi, ne tuvwi twamutamba.
23 Ehuda watambila pa kibidi kya pa kibelo,* aye pa kutamba washita bibelo bya kyumba kya pangala, webishita na mfungulo.
24 Aye pa kupwa kutamba, bengidi bajoka, bamona’mba bibelo bya kyumba kya pangala i bishite na mfungulo. Penepa banena’mba: “Padi ye uno wendalala* mu kyumba kyandi kya munda mudi nyā.”
25 Badi bakungila’nka kukungila enka ne byobafwile bumvu, ino pa kumona’mba kashitwile bibelo bya kyumba kya pangala, bayata mfungulo bebifungula, bamona mfumwabo ulēle panshi* mufwe!
26 Ehuda wanyema pobadi bakilejaleja, wapityila dya ku bankishi basōnge,*+ wanyemena ku Seīla.
27 Aye pa kufika waila lusengo+ mu ntanda ya ngulu ya Efelaimi;+ penepa bene Isalela batūka mu ntanda ya ngulu’ya, aye papo wibatangidile kumeso.
28 Penepa webanena’mba: “Nondei, mwanda Yehova wapāna balwana nenu, bene Moabu, mu kuboko kwenu.” Nabo bamulonda, bakwata byabu bya lwa ntobwa* bya Yodano bya bene Moabu, kadi kebalekelepo muntu nansha umo atyibuluke.
29 Mu kine kitatyi’kyo baonakanya bene Moabu kintu kya 10 000,+ bana-balume bonso bakomo kadi bankomokomo; kekudipo nansha umo wanyemene.+
30 Ponkapo Moabu wanekenibwa mu makasa a Isalela tamba mu dine difuku’dya; kadi ntanda yakōkolokwa* mu myaka 80.+
31 Kupwa aye, kwaiya Shamakale+ mwanā Anate, waonakenye bana-balume 600 bene Fidishitia+ na kamusungu ka bañombe;+ nandi wapandije Isalela.
Kunshi kwa Dyani
^ Nansha’mba “kibelo kya Hamata.”
^ Tala Nshintulwilo ya Bishima.
^ Kishima pa kishima i, “Alami-Nahalaimi.”
^ Kishima pa kishima i, “Alami.”
^ Nansha’mba “yaikala mu ndoe.”
^ Padi i kuboko kwipi kwa kintu kya masantimetele 38. Tala Mbwejo B14.
^ Bibwanika padi i, “mukolwa mabwe.”
^ Nansha’mba “kishikatwa.”
^ Bibwanika padi i, “patwelela luvula.”
^ Kishima pa kishima i, “upūta binyantyilo byandi.”
^ Kishima pa kishima i, “ntanda.”
^ Bibwanika padi i, “mukolwa mabwe.”
^ Byabukwa lwa nshi.
^ Nansha’mba “yaikala mu ndoe.”
