Batyibi 12:1-15
12 Kupwa baityija bana-balume ba Efelaimi, batyibuluka bafika ku Zafone* kebanena Yefeta amba: “Mwanda waka kwetwityilepo powatyibulukile kukalwa na bene Amone?+ Tusa kusōka yobe njibo ne abe mwine monka.”
2 Ino Yefeta webatentulula’mba: “Ami pamo ne bantu bami, nalwile bulwi bukatampe na bene Amone. Nemwabije, ino kemwampadijepo mu makasa abo.
3 Ponamwene amba kemusapo kumpandija, nami natūdile būmi bwami mu kyaka* nakalwa na bene Amone,+ Yehova nandi waumpa’bo. Penepo kyomwaila dyalelo kulwa nami i kika?”
4 Kupwa Yefeta wabungila pamo bana-balume bonso ba Ngileade,+ nabo balwa na Efelaimi; bana-balume ba Ngileade banekenya Efelaimi wadi unena’mba: “Banwe mwi bantu banyemakana’tu mu Efelaimi, banwe bene Ngileade badi mu Efelaimi ne mu Manase.”
5 Ngileade wakwata byabu bya lwa ntobwa* bya Yodano+ kumeso kwa Efelaimi; kadi padi pasaka bana-balume ba Efelaimi kunyema, badi banena’mba, “Ndekei ntyibuluke”; kupwa bana-balume ba Ngileade badi bepangula muntu ne muntu amba, “Lelo wi mwine Efelaimi?” Shi walondolola’mba, “Aa!”
6 badi bamunena’mba, “Nenapo bidi amba Shibolete.” Ino aye wadi unena’mba, “Sibolete,” mwanda kadipo ubwanya kutela kishima senene. Penepa badi bamukwata bamwipaila pa byabu bya lwa ntobwa* bya Yodano. Enka nenki bene Efelaimi 42 000 bapona mu kine kitatyi’kya.
7 Yefeta watyibīle Isalela mambo mu myaka isamba, kupwa papo Yefeta mwine Ngileade wafwa, bamujīka mu kibundi kyandi mu Ngileade.
8 Ibezane wa mu Betelema watyibila Isalela mambo kupwa aye.+
9 Wadi na bana bana-balume 30 ne bana bana-bakaji 30. Watumine bandi bana bana-bakaji bakasongwe na bana-balume ba panja pa kisaka kyandi, kadi wasela bana-bakaji 30 basongwe na bandi bana bana-balume. Watyibila Isalela mambo mu myaka isamba-ibidi.
10 Kupwa Ibezane wafwa, bamujīka mu Betelema.
11 Kupwa aye, Elona mwine Zebuluna watyibila Isalela mambo; watyibīle Isalela mambo mu myaka dikumi.
12 Kupwa Elona mwine Zebuluna wafwa, bamujīka mu Aiyalone mu ntanda ya Zebuluna.
13 Kupwa aye, Abedone mwanā Hilele mwine Pilatoni watyibila Isalela mambo.
14 Wadi na bana bana-balume 40 ne bankana 30 badi bakanda pa bampunda 70. Watyibīle Isalela mambo mu myaka mwānda.
15 Kupwa Abedone mwanā Hilele mwine Pilatoni wafwa, bamujīka mu Pilatoni mu ntanda ya Efelaimi mu lūlu lwa bene Amaleke.+
Kunshi kwa Dyani
^ Bibwanika padi i, “kutyibuluka dya kungala.”
^ Nansha’mba “natūla muya wami mu dikasa dyami.”
^ Byabukwa lwa nshi.
^ Byabukwa lwa nshi.
