Yangalela yo Vwa Nluta Mun’elongi Diaku

Aweyi tulenda kadila ye kiese vava tulongokanga Nkand’a Nzambi? Aweyi tulenda vwila nluta vava tulongokanga? Yambula twabadika mambu matatu malenda kutusadisa mu vwa nluta mun’elongi dia Nkand’a Nzambi dia yeto kibeni.

1 SAMBU: E sambu i diambu diantete tufwete vanganga. (Nku. 42:8) Ekuma? Tufwete badikilanga elongi dia Nkand’a Nzambi vo dimosi muna mawonso mevavwanga muna nsambil’eto. Muna kuma kiaki, tufwete lombanga kwa Yave muna sambu kimana twakala ye ngindu zasikila yo kutuvana mwand’andi avelela. (Luka 11:13) Barbara osalanga se missionario mu mvu miayingi, wavova vo: “Muna yantika tanga yovo longoka Nkand’a Nzambi, yiteka sambanga. I bosi, imonanga vo Yave okalanga yame yo yangalela dina ivanganga.” Oteka samba vava tulongokanga Nkand’a Nzambi dilenda ziula ngindu ye ntima mieto mu toma bakula eludi.

2 BADIKA: Muna lembi vaulanga ntangwa yafwana, akaka nzaki betanganga Nkand’a Nzambi. Muna kuma kiaki, ke bevwanga nluta ko mun’elongi dia Nkand’a Nzambi. Carlos osadilanga Yave vioka mvu 50, wabakula mfunu wavaula e ntangwa ya badika mana kelongokanga. Wavova vo: “Owau konso lumbu makaya makete kaka ma Nkand’a Nzambi itanganga. I bosi, ivaulanga ntangwa muna badika dina ntangidi ye dina ndenda sadila muna zingu kiame.” (Nku. 77:12) Vava tuvaulanga ntangwa muna badika, tuwokesanga zayi ye umbakuzi weto wa luzolo lwa Nzambi.—Kol. 1:9-11.

3 SADILA MANA TULONGOKELE: Avo tubakwidi o mfunu wa konso salu, dilenda kututwasila nluta. Diau adimosi mpe muna longoka ludi kia Nkand’a Nzambi. Gabriel wa nleke una ye nkubika yasikididi ya longoka Nkand’a Nzambi wavova vo: “Elongi dia Nkand’a Nzambi dikunsadisanga mu zizidila mpasi za lumbu ke lumbu yo sadisa akaka.” Wakudikila vo: “Yisianga ngolo za sadila mawonso ilongokanga muna zingu kiame.” (Nsi. 11:18; Yos. 1:8) Kieleka, vena ye mambu mayingi mu kuma kia Nzambi tulenda longoka yo sadila.—Nga. 2:1-5.

LUFIMPU: Ekwe elau tuvwidi diavwa zayi wa Yave una vo i Nto a ngangu zawonso! (Roma 11:33) Muna kuma kiaki, vava olongokanga, teka samba kwa Yave kimana wakala ye ngindu zasikila yo kuvana mwand’andi avelela. I bosi, vaula ntangwa mu badika dina otangidi. Vanga mawonso mu sadila mana olongokele muna zingu kiaku kia lumbu ke lumbu. Avo osadidi luludiku lwalu lwamfunu, otoma yangalela yo vwa nluta mun’elongi diaku dia Nkand’a Nzambi.