Kuna kwa Esi Roma 11:1-36
11 Ozevo, edi ngiuvuidi: Nga Nzambi obembwele nkangu andi e?+ Ke wau ko! Kadi omono mpe i Nyisaele wa mbongo a Abarayama, musi kanda dia Benyamini.
2 O Nzambi kabembwele nkangu andi ko una kateka sola.+ Nga ke nuzeye wo ko una uvovele e sono muna diambu dia Eliya, vava kadodokela Nzambi mu kuma kia Isaele?
3 “E Yave,* bavondele ngunza zaku, babangwidi maziku maku, mono mosi kaka nsidi, owau moyo ame bevavanga.”+
4 Kansi, o Nzambi adieyi kamvutula? “Yakinu ye 7.000 ma wantu ana ke bafukamene Bale ko.”+
5 Diau adimosi mpe omu tandu kiaki, vena ye nsadiswa,+ ana basolwa muna nsambu za Nzambi.
6 Muna nsambu zandi basolelwa,+ ke mu mavangu ko;+ kele vo mu mavangu, e nsambu zandi ke zadi kala diaka nsambu ko.
7 Ozevo, aweyi tuvova? Kina Isaele kavavidinge, kabakidi kio ko, kansi awana basolwa,+ babakidi kio. Vo i akaka babadisi e ntima miau,+
8 wauna wasonama vo: “Nzambi ubavene mwand’a wosola kia tulu+ yo meso ke mamoni yo matu ke mawe yamu unu kiaki.”+
9 Davidi mpe wavova vo: “Yambula o meza mau makituka se sokolo, ntambu, sakuba ye tumbu kuna kwa yau.
10 Yambula o meso mau mabukama e tombe kimana balembi mona ye kubakoveka nima zau ntangwa zawonso.”+
11 Edi ngiuvuidi: Nga batá sakuba yo bwa emvimba? Ke wau ko! Kansi, wau basumuka, o luvuluzu lwizidi kwa esi zula muna kubamwesesa e nsongo.+
12 Avo e sumu diau i nsambu kwa nza, e nkuluk’au i nsambu kwa esi zula,+ ekwe nsambu zayingi zikala vava lutangu lwau lulunga!
13 Owau, kwa yeno esi zula mpovele. Wau vo i ntumw’a esi zula,+ nkembele uselo wame,+
14 kimana yamwesa nkangu ame* nsongo yo vuluza akaka muna yau.
15 Kadi avo e mbembolwa ina babembolwa+ yavutulwisa ngwizani a nza yo Nzambi, ozevo, e ntambulwa betambulwa isonga vo bakatukidi muna mafwa yo kwiza oku moyo.
16 Avo ndambu a mbumba ibadikilwanga se ntomoni* yavauka, o mbumba wawonso mpe wavauka; avo mwanzi wavauka, e ntayi mpe zavauka.
17 Kansi, avo ezaka ntayi zavasunua, ongeye, kana una vo u olive a mfinda, wasomekwa mo yo tambula e ntwadi umvuama wa mwanzi a olive,
18 kuyisani ko kuna kwa ntayi. Avo uyisanini kwa yau,+ sungamena vo ke ngeye ko osimbidi o mwanzi, kansi mwanzi kaka usimbidi.
19 Ozevo, edi ovova: “E ntayi zavuzua kimana omono yasomekwa mo.”+
20 Dialudi, bavuzua wau bakondwa lukwikilu,+ kansi ongeye osikidi muna lukwikilu.+ Kukadi nkwa lulendo ko, kala kaka yo vumi.
21 Kadi, avo Nzambi wazenga e ntayi za nti wauna, ongeye mpe olenda zengwa.
22 Dianu vo, badika e ngemba+ ye makasi ma Nzambi. Makasi kw’awana babwidi,+ kansi kuna kwa ngeye o Nzambi usongele ngemba, ozevo, sikila kaka muna ngemba zandi; avo ke wau ko, ongeye mpe ozengwa.
23 Oyau mpe, avo bakwikidi, besomekwa mo,+ kadi Nzambi olenda kubasomeka mo diaka.
24 Avo ngeye ozengelo muna olive a mfinda yo somekwa muna olive yakunua muna mpatu, kana una vo ke wau ko difwete vangamena, ozevo e ntayi zakimbenena nga ke ziluta vutulwa ko muna olive zatuka e?
25 Ampangi, kizolele ko nualembi zaya e mbumba yayi yavauka,+ yo kuyibadikila vo nu akwa ngangu: akaka muna Isaele babâdisi ntima yavana kilunga o lutangu lwa esi zula,
26 muna mpila yayi e Isaele yawonso+ ivuluzilwa, wauna wasonama vo: “O mvuluzi muna Zione+ kevaikila, okatula mavangu ma umpumbulu muna Yakobo.
27 Ediadi i kangu diame nkangidi yau,+ vava ikatula masumu mau.”+
28 Dialudi, wau babembola e nsangu zambote, bakituka atantu a Nzambi muna wete dieno; kansi muna kuma kia nsilu kasia o Nzambi kwa mase mau,+ wasola ankaka muna yau se akundi andi.
29 Kadi Nzambi ke kuyibanza ko muna tukau twandi ye nsol’andi.
30 Wauna nuateka kala akolami a Nzambi,+ kansi owau nufwidilu e nkenda+ muna kuma kia ukolami wau,+
31 awaya mpe bakolamene, kimana nuafwilwa e nkenda, oyau mpe bafwilw’e nkenda owau.
32 Kadi Nzambi wayambula vo yau awonso babundunua kwa ukolami+ kimana kafwila awonso e nkenda.+
33 Ekwe sina kwa kimvuama, ngangu yo zayi wa Nzambi! Kavena muntu ko olenda bakula mfundisa zandi ye kavena muntu ko olenda zaya e nzila zandi.
34 Kadi, “nani ozeye nyindu a Yave? yovo, nani i nludiki andi?”+
35 Yovo, “nani wateka kayila Nzambi, kimana kamvutulwila?”+
36 Kadi lekwa yawonso muna yandi yatuka, muna yandi inina ye muna kuma kiandi. Kuna kwa yandi, nkembo yakwele mvu. Amen.
