Tala mambu

Tala ntu mia mambu

 NTU A DIAMBU WA FUKWA | NGA OLENDA BAKULA NKAND’A NZAMBI?

Lusadisu Muna Bakula Nkand’a Nzambi

Lusadisu Muna Bakula Nkand’a Nzambi

Yindula vo ku nsi ya kinzenza wele mu nkumbu antete. Mawonso ma nzenza mekala kwa ngeye, nze fu ya kisi nsi, madia ye nzimbu besadilanga. Kieleka, ediadi dilenda kukendeleka.

Avo otangidi Nkand’a Nzambi mu nkumbu antete, i wau mpe omona. Kadi otanga mambu ma nz’ankulu mana kuzeye ko, nze wantu bayikilwanga vo Afelesetia, fu kia ‘tiazuna mvuatu, madia mayikilwanga vo mana ye nzimbu zayikilwanga vo drakima.’ (Luvaiku 16:31; Yosua 13:2; 2 Samuele 3:31; Luka 15:9) Diampasi dikala mu bakula mawonso mama. Nze nona kia muntu wele ku nsi ya kinzenza mu nkumbu antete, nga kuyangalala ko avo mwene muntu ozolele kusasila mawonso?

ASADISI KUNA NZ’ANKULU

Tuka kiasonekenwa e sono yavauka mu nkumbu antete muna mvu wa 1513 vitila tandu kieto, vakala yo wantu basadisanga nkangu mu babakula Diambu dia Nzambi. Muna bonga e nona, Mose wa mfidi antete a Aneyisaele ‘wayantika kiesesa’ e sono.—Nsiku 1:5.

Alongi a Diambu dia Nzambi bakwamanana vioka tandu 10. Muna mvu wa 455 vitila tandu kieto, Ayuda kumosi yo wan’akete bakutakana vana yanzala kia mbanz’a Yerusaleme ekolo alongi a Diambu dia Nzambi ‘babatangilanga muna nkanda [avauka].’ Alongi ke batanganga kaka ko, kansi basadisanga mpe nkangu mu bakula e sono yatangwanga.—Nekemiya 8:1-8.

Vioka tandu 5, Yesu Kristu wasala mpe e salu kiaki kia longa. Muna kuma kiaki, wazayakana kwa nkangu vo nlongi. (Yoane 13:13) Walonganga wantu kiakala muna buka yovo muntu mosi. Lumbu kimosi, vava kalonganga nkangu vana Mongo, “e ndonga isivikidi e mpil’andi ya longela.” (Matai 5:1, 2; 7:28) Muna mvu wa 33 wa tandu kieto, Yesu wamokena ye alongoki andi wole ekolo bayendanga ku vata diakala lukufi ye Yerusaleme, ‘watoma kubasasila e Sono.’—Luka 24:13-15, 27, 32.

Alongoki a Yesu mpe alongi a Diambu dia Nzambi bakala. Lumbu kimosi, nzimba mosi wa Ntiópia watanganga sono kia Nkand’a Nzambi. Selo kia Nzambi wayikilwanga vo Filipi wamfinama yo kunyuvula vo: “Nga ozeye mana otanganga?” Wavutula vo: “Aweyi ndenda mo zayila, wau vo ke vena muntu ko olenda mo kunsasila?” I bosi, Filipi wansasila mana katanganga.—Mavangu 8:27-35.

ASADISI MU LUMBU YETO

Nze una bavanganga alongi a Diambu dia Nzambi kuna nz’ankulu, Mbangi za Yave o unu besalanga e salu kia longa Diambu dia Nzambi mu nsi 239. (Matai 28:19, 20) Konso lumingu, Mbangi za Yave besadisanga vioka 9.000.000 ma wantu mu bakula Diambu dia Nzambi. Ayingi muna awana belongokanga, ke betukanga mu mabundu ma Kikristu ko. Ke belombanga nzimbu ko muna salu kiaki, belongelanga wantu muna nzo zau yovo muna konso fulu bazolele. Akaka belongokelanga muna telefone, video yovo muna komputador.

Muna zaya una olenda bakila nluta mu nkubika yayi, mokena ye Mbangi za Yave. Obakula vo Nkand’a Nzambi ulenda bakulwa, ‘wamfunu muna longa, muna tumba, muna singika mambu, muna ludika kuna unsongi, kimana muntu a Nzambi kakala watoma fwana, watoma kubama muna mavangu mawonso mambote.’—2 Timoteo 3:16, 17.