စီၤဘနါယၤန့ၣ် အကဲဝဲ ပှၤဒူပှၤဃိၤလၢ အအိၣ်ဒီး တၢ်သးဒူ လၢအဒုးန့ၢ်တၢ်လၢ စီၤပၤဒၤဝံး ဒီးစီၤၡလိၤမိၤအဂီၢ်. တကးဒံးဘၣ် အကဲဝဲ ပှၤလုၢ်တၢ်ဒိၣ် အဖိခွါ. ညီနုၢ်န့ၣ် ပှၤလုၢ်တၢ်ဒိၣ် ဒီးပှၤလ့ၤဝံဖိတဖၣ် တသူဝဲတၢ်စုကဝဲၤ ဒီးတဒုးတၢ်ဘၣ်. သနာ်က့ စီၤဘနါယၤန့ၣ် အသူဝဲတၢ်စုကဝဲၤ, အပာ်ဖျါထီၣ် တၢ်သးဒူ ဒီးဒုးန့ၢ်တၢ်လၢ ယဟိဝၤယွၤ အပှၤဂီၢ်မုၢ်အဂီၢ်. အဒိ အဖုလီၤလၢတၢ်ပူၤ ဒီးမၤသံကွံာ်ဝဲ ခ့ယုၢ်တဒု ဒီးအမၤနၢၤဝဲ ဒုၣ်ဒါလၢ အနီၢ်ဖးဒိၣ်ဖးထီတဂၤ. စီၤပၤဒၤဝံး နာ်န့ၢ်စီၤဘနါယၤ ဒိၣ်မးအဃိ အဃုထၢထီၣ် စီၤဘနါယၤလၢ ပှၤအခိၣ် လၢကဒီသဒၢ အသးသမူ.—၂ မူၤ ၂၃:၂၀-၂၃.

ဖဲစီၤအးဘၡါလိၣ် ဒီးစီၤအဒိနံၤယၤ ထီဒါက့ၤ စီၤဒၤဝံးအခါ စီၤဘနါယၤ ဆဲးတီဒီးစီၤဒၤဝံး. (၂ မူၤ ၈:၁၈; ၁၅:၁၈; ၁ စီၤပၤ ၁:၈) ဒီးဖဲစီၤဒၤဝံး သးပှၢ်ထီၣ်အခါ စီၤဘနါယၤ ပာ်ဖျါထီၣ်လၢ အတီဒီးစီၤဒၤဝံး ခီဖျိအဆီၣ်ထွဲမၤစၢၤ တၢ်ရဲၣ်တၢ်ကျဲၤ ဒ်သိး စီၤၡလိၤမိၤ ကကဲထီၣ်ဘၣ် စီၤပၤအဂီၢ်. (၁ စီၤပၤ ၁:၃၂-၄၀) ပထံၣ်ဘၣ်လၢ ဖဲပှၤဂၤ တအိၣ်ဒီး တၢ်သးတီဘၣ်အခါ စီၤဘနါယၤ တီဒီးယဟိဝၤယွၤ ဒီးတီဒီး စီၤပၤလၢ ယဟိဝၤယွၤဃုထၢဝဲ.

ပဝဲစ့ၢ်ကီး ဒ်သိး ပကမၤနၢၤကွံာ် ပဒုၣ်ပဒါမုၣ်ကီၤလံၢ် ဒီးပှၤလၢ အဆီၣ်ထွဲအီၤအဂီၢ် ပကဘၣ်အိၣ်ဒီး တၢ်သးဒူ. ပကဘၣ် ပာ်လီၤသး ဂၢၢ်ဂၢၢ်ကျၢၤကျၢၤလၢ ပကဆဲးအိၣ်မူမၤထွဲ ယဟိဝၤယွၤ အတၢ်ဘျၢ ဒီးမၤတၢ်ဘၣ်အသး. (အ့း ၆:၁၁; ၁ ပ့း ၅:၈, ၉) ပှၤတနီၤ မ့ၢ်ဆၢတဲာ်လီၤသးလၢ ကပာ်တ့ၢ်ကွံာ် ယဟိဝၤယွၤ သနာ်က့ ပကဘၣ်တီဒီး ယဟိဝၤယွၤ ဒီးနာ်သပှၢ်တၢၢ်လၢ အကဆိၣ်ဂ့ၤက့ၤပှၤ.—၂ မူၤ ၂၂:၂၆.