DILONGI 26
Sambu na Nki Beto Ke Kutanaka ti Mambu ya Mbi mpi Bampasi?
Kana mambu ya mbi kibeni me salama, yo kele mbi ve na kuyula nde: “Sambu na nki yo me salama?” Beto ke vandaka mpenza na kiese sambu Biblia ke pesaka bamvutu ya pwelele na ngiufula yai!
1. Inki mutindu Satana kotisaka mambu ya mbi na ntoto?
Satana Diabulu kolamaka na Nzambi. Yandi vandaka kuzola kuyala, yo yina yandi pusaka bakala mpi nkento ya ntete, Adami ti Eva, na kukolama mpi na Nzambi. Satana salaka yo ntangu yandi kusaka Eva. (Kuyantika 3:1-5) Yandi pusaka Eva na kundima nde Yehowa bumbilaka yandi kima mosi ya mbote mpi nde bantu ta vanda kibeni na kiese kana bo ke lemfukila ve Nzambi. Satana kusaka na mbala ya ntete ntangu yandi songaka Eva nde yandi ta fwa ve ata fioti. Yo yina Biblia ke bingaka Satana nde “muntu ya luvunu mpi tata ya luvunu.”—Yoane 8:44.
2. Inki Adami ti Eva salaka?
Yehowa pesaka Adami ti Eva bima mingi mpenza. Yandi songaka bo na kudia bambuma ya banti yonso yina vandaka na kilanga ya Edeni katula kaka ya nti mosi. (Kuyantika 2:15-17) Ata mpidina, bo diaka kaka mbuma ya nti yango. Eva “bakaka mbuma na yo mpi diaka yo.” Na nima, Adami mpi “diaka yo.” (Kuyantika 3:6) Bo zole lemfukilaka ve Nzambi. Sambu Adami ti Eva vandaka bantu ya kukonda masumu, yo vandaka mpasi ve sambu bo sala mambu ya mbote. Kansi na luzolo yonso bo buyaka kulemfukila Nzambi, bo salaka disumu mpi bo buyaka nde Nzambi kuyala bo. Mambu yina bo salaka, natilaka bo bampasi mingi.—Kuyantika 3:16-19.
3. Mambu yina Adami ti Eva salaka me natilaka beto nki bampasi?
Ntangu Adami ti Eva salaka disumu, bo kumaka bantu ya masumu mpi bo me pesaka beto yonso bana na bo masumu yango. Biblia ke tuba mambu yai sambu na Adami: “Disumu kotaka na nsi-ntoto na nzila ya muntu mosi mpi lufwa na nzila ya disumu, mutindu mosi mpi lufwa me mwanganaka na bantu yonso.”—Baroma 5:12.
Mambu mingi ke salaka mpi nde beto mona mpasi. Bantangu ya nkaka beto ke monaka mpasi sambu na balukanu ya mbi yina beto to bantu ya nkaka ke bakaka to mpi sambu beto kele na kisika mosi ya mbi mpi na ntangu ya mbi.—Tanga Longi 9:11.
LONGUKA MAMBU MINGI
Beto tala sambu na nki mambu ya mbi mpi bampasi ya kele na ntoto bubu yai ke katukaka ve na Nzambi mpi mutindu yandi ke waka ntangu beto ke monaka mpasi.
4. Bampasi na beto ke katukaka na nani?
Bantu mingi ke yindulaka nde Nzambi muntu ke yalaka nsi-ntoto yai. Keti yo kele ya kieleka? Beno tala VIDEO.
Beno tanga Yakobo 1:13 mpi 1 Yoane 5:19. Na nima beno pesa mvutu na ngiufula yai:
-
Keti bampasi mpi mambu ya mbi ke katukaka na Nzambi?
5. Mambu yina kimfumu ya Satana me nataka
Beno tanga Kuyantika 3:1-6 mpi na nima beno pesa mvutu na bangiufula yai:
-
Inki mambu ya luvunu Satana tubaka?—Tala verse 4 mpi 5.
-
Inki mutindu Satana sosaka kumonisa nde Yehowa bumbilaka bantu kima mosi ya mbote?
-
Inki nge ke yindula, keti Satana ke tubaka nde bantu kele na mfunu nde Yehowa kuvanda Mfumu na bo sambu bo vanda na kiese?
Beno tanga Longi 8:9 mpi na nima beno pesa mvutu na ngiufula yai:
-
Inki mambu ke salamaka na ntoto mutindu bantu me buyaka nde Yehowa kuvanda Mfumu na bo?
-
Adami ti Eva vandaka bantu ya kukonda masumu mpi bo vandaka kuzinga na Paladisu. Kansi bo landaka Satana mpi kolamaka na Yehowa
-
Banda ntangu bo kolamaka, disumu, bampasi mpi lufwa me kotaka na ntoto
-
Yehowa ta katula disumu, bampasi mpi lufwa. Bantu ta kuma diaka ti nitu ya kukonda masumu mpi bo ta zinga na Paladisu
6. Yehowa ke kudiyangisaka ntangu beto ke monaka mpasi
Keti Nzambi ke kudiyangisaka ve ntangu beto ke monaka mpasi? Beno tala mambu yina ntotila Davidi mpi ntumwa Piere sonikaka. Beno tanga Nkunga 31:7 mpi 1 Piere 5:7. Na nima beno pesa mvutu na ngiufula yai:
-
Inki mutindu nge ke kudiwa mutindu nge me zaba nde Yehowa ke monaka bampasi na beto mpi ke kudiyangisaka sambu na yo?
7. Nzambi ta manisa bampasi yonso ya bantu ke monaka
Beno tanga Yezaya 65:17 mpi Kusonga 21:3, 4. Na nima beno pesa mvutu na ngiufula yai:
-
Sambu na nki yo ke pesa kikesa mutindu nge me zaba nde Yehowa ta manisa bampasi yonso ya bantu ke kutanaka ti yo?
Keti nge zabaka yo?
Satana kusilaka Yehowa makambu ntangu yandi taka luvunu ya ntete. Banda pana, yandi bebisaka lukumu ya Yehowa sambu yandi monisaka nde Yehowa kele ve Mfumu ya mbote mpi ya zola. Kubika fioti, Yehowa ta santisa zina na yandi ntangu yandi ta manisa bampasi ya bantu, disongidila yandi ta monisa nde luyalu na yandi kele mpenza ya kuluta mbote. Kusantisa zina ya Yehowa kele kima ya kuluta mfunu na zulu mpi na ntoto.—Matayo 6:9, 10.
BANTU YA NKAKA KE TUBAKA NDE: “Nzambi muntu ke zolaka nde beto mona mpasi.”
-
Inki mvutu nge ta pesa?
NA BUNKUFI
Satana Diabulu mpi Adami ti Eva bo ntete bantu me salaka nde mambu ya mbi kukota na ntoto. Yehowa ke kudiyangisaka mingi kibeni ntangu beto ke monaka bampasi mpi kubika fioti yandi ta manisa yo.
Inki Nge Me Simba?
-
Inki mambu ya luvunu Satana Diabulu songaka Eva?
-
Kukonda bulemfu ya Adami ti Eva me natilaka beto yonso nki bampasi?
-
Inki mutindu beto me zaba nde Yehowa ke kudiyangisaka ntangu beto ke monaka mpasi?
TALA MPI
Tala mpila Biblia ke tendulaka disumu.
Tala mambu ya nkaka ya ke tubila ntembe yina Satana Diabulu basisaka na kilanga ya Edeni.
“Sambu na Nki Nzambi Me Pesaka Nzila na Bampasi?” (Nzozulu ya Nkengi, Yanuari 1, 2014)
Tala bamvutu ya ke pesa kikesa na ngiufula mosi ya mpasi.
Tala mambu yina bakala mosi longukaka sambu na bampasi yina yandi vandaka kumona.
Nge Lenda Sepela Mpi Ti
BANGIUFULA YINA BANTU KE YULAKA MINGI
Inki Mutindu Bambangi ya Yehowa Ke Longukaka ti Bantu Biblia?
Ntangu nge ke longuka Biblia ti Bambangi ya Yehowa, nge lenda sadila konso Biblia yina. Nge lenda bingisa mpi dibuta na beno to banduku na nge na kulonguka nzila mosi ti nge.
