3 Longuka Kyeleka ya Metala Yezu

“Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.”​—Yoane 3:16.

SAMBU NA NKI YO LENDA VANDA MPASI? Bantu yankaka ketubaka nde Yezu kuvandaka ve muntu ya kyeleka. Bankaka kendimaka nde yandi vandaka muntu ya kyeleka kansi bo ketubaka nde yandi vandaka kaka muntu bonso bantu yonso mpi nde yandi mefwaka bamvula mingi meluta.

INKI MUTINDU NGE LENDA NUNGA DYAMBU YINA YA MPASI? Landa mbandu ya longoki Natanaele. a Nduku na yandi Filipo kusongaka yandi nde yandi keyindula nde yandi memona Mesia​—“Yesu, mwana ya Yozefi ya bwala Nazareti.” Kansi, Natanaele kukwikilaka ve kaka sambu Filipo kutubaka nde yandi memona Mesia. Nkutu, yandi vutulaka nde: “Keti mambu ya mbote lenda katuka na Nazareti?” Ata mpidina, yandi ndimaka ntangu Filipo kubingaka yandi sambu yandi “kwisa kutala” yandi mosi. (Yoane 1:43-51) Nge mpi tabaka mambote kana nge tadila nge mosi banzikisa ya ketadila Yezu. Inki nge lenda sala?

Tadila banzikisa ya istware ya kemonisa nde Yezu kuvandaka muntu ya kyeleka. Josèphe mpi Tacite, yina kuzingaka na mvu-nkama ya ntete mpi ya kuvandaka ve Bakristu, kuvandaka bantu zole ya istware yina kuzabanaka mingi. Bo tubilaka Yezu Kristu bonso muntu ya kyeleka yina kuzingaka mpenza. Ntangu yandi tubilaka mutindu Ntinu ya Roma Nero kukusilaka Bakristu makambu nde bo bantu kutulaka tiya na Roma na mvu 64 T.B., Tacite kusonikaka nde: “Nero kuyindulaka bantu ya kupesa kifu mpi kupesaka ndola ya kuluta ngolo na kimvuka mosi yina bantu vandaka kumenga sambu na mambu na bo ya mbi mpi bo vandaka kubinga bantu yango Bakristu. Kristus [Kristu], kisika zina na bo mekatuka, kufwaka na maboko ya Ponse Pilate mosi na kati ya bamfumu na beto, na nsungi ya luyalu ya Tibere.”

Na kutadila mambu yina bantu ya istware ya mvu-nkama ya ntete mpi ya zole kutubaka sambu na Yezu mpi Bakristu ya ntete, Encyclopædia Britannica, Kubasika ya 2002, ketuba nde: “Masolo yai ya metubilama na kingenga kemonisa nde na bantangu ya ntama ata bambeni ya Bukristu kutulaka ve ntembe ata fyoti nde Yezu kuzingaka kibeni. Kansi Bantu yantikaka kutudila yo ntembe na mbala ya ntete mpi na bikuma ya luvunu na nsuka ya mvu-nkama ya 18, na mvu-nkama ya 19, ti na luyantiku ya mvu-nkama ya 20.” Na mvu 2002, disolo mosi ya kubasikaka na zulunalu mosi (The Wall Street Journal) kutubaka nde: “Bantu mingi ya mayele, katula kaka mwa ndambu ya bantu yina kendimaka ve nde Nzambi kele, mendimaka dezia Yezu ya Nazareti bonso muntu ya kuzingaka mpenza.”

Tadila banzikisa ya kemonisa nde Yezu kufutumukaka. Ntangu bambeni ya Yezu kukangaka  yandi, banduku na yandi ya ngolo kuyambulaka yandi, mpi sambu na boma, nduku na yandi Piere kubuyaka nde yandi zaba yandi ve. (Matayo 26:55, 56, 69-75) Ntangu bo kangaka Yezu, balongoki na yandi kupanzanaka. (Matayo 26:31) Na nima, na kintulumukina, balongoki na yandi kukumaka ti kikesa mingi. Piere ti Yoane kutelaminaka na kikesa yonso bantu yina kufwaka Yezu. Balongoki ya Yezu kukumaka kikesa mpenza na mpila nde bo panzaka malongi na yandi na Kintinu ya mvimba ya Roma, bo ndimaka kufwa na kisika ya kubebisa balukwikilu na bo.

Inki kuvandaka kikuma mosi yina kupusaka bo na kusoba mpenza nkadilu na bo? Ntumwa Polo ketendula nde Yezu kufutumukaka mpi “yandi kwisaka kumonika ntete na Piere, ebuna yandi kwisaka kumonika mpi na bantumwa yonso kumi na zole.” Polo keyika nde: “Na nima, na mbala mosi, yandi kwisaka kumonika na bakristo nkama tanu nkutu kuluta ntalu yina.” Mingi na kati ya bantu yina kumonaka Yezu na nima ya lufutumuku kuvandaka na luzingu ntangu Polo kusonikaka bangogo yina. (1 Korinto 15:3-7) Bantu yina ketulaka ntembe lendaka kubuya kundima kukonda mpasi kimbangi ya muntu mosi to ya bantu zole yina kumonaka dyambu yina. (Luka 24:1-11) Kansi, kimbangi ya bantu kuluta nkama tanu yina kumonaka dyambu yina kepesa banzikisa ya kendimisa nde Yezu kufutumukaka.

INKI MAMBOTE NGE TABAKA? Nzambi lenda lolula masumu ya bantu yina kekwikilaka mpi kelemfukilaka Yezu mpi bo lenda vanda na kansansa ya mbote. (Marko 2:5-12; 1 Timoteo 1:19; 1 Piere 3:16-22) Kana bo fwa, Yezu mesila na kufutumuna bo “na kilumbu ya nsuka.”​—Yoane 6:40.

Sambu na kuzaba mambu mingi, tala kapu ya 4, “Yezu Kristu Kele Nani?”” mpi kapu ya 5, “Nkudulu Kele Dikabu ya Kuluta Nene ya Nzambi Mepesaka,” na mukanda Inki Biblia Kelongaka Mpenza? b

[Banoti na nsi ya lutiti]

[Kifwanisu ya kele na lutiti 7]

Bonso Natanaele, tadila banzikisa ya ketadila Yezu