Keti nge tangaka na dikebi yonso banimero ya Nzozulu ya Nkengi ya me katuka kubasika? Tala kana nge lenda pesa mvutu na bangiufula yai ya ke landa:

Keti Bakristu fwete samba Yezu Kristu?

Ve. Yezu yandi mosi longaka beto na kusamba Yehowa, mpi yandi pesaka mbandu ntangu yandi vandaka kusamba Tata na yandi. (Mat. 6:6-9; Yoa. 11:41; 16:23) Na mbandu ya Yezu, balongoki na yandi ya mvu-nkama ya ntete vandaka kusamba Nzambi, kansi bo vandaka ve kusamba Yezu. (Bis. 4:24, 30; Bakol. 1:3)—1/1, lutiti 14.

Inki beto fwete sala ntangu beto ke kudibongisa na kusungimina lufwa ya Yezu?

Diambu mosi ya kusala kele kulanda manaka ya lutangu ya Biblia yina ke tubilaka lufwa ya Yezu. Beto lenda yedisa mpi kisalu na beto ya kusamuna na nsungi yina. Beto lenda yindulula na kivuvu yina Nzambi me pesaka beto.—1/15, balutiti 14-16.

Inki mambu kuminaka bantu zole ya Ezipte yina vandaka na boloko ti Yozefi, yina zabisaka yandi ndosi mosi ya bo lalaka yina bo bakisaka ve?

Yozefi zabisaka kapita ya malafu nde bo ta vutula yandi na kiyeka na yandi. Kansi yandi tubaka sambu na kapita ya mampa nde ndosi na yandi ke tendula nde Farao ta fwa yandi na zulu ya nti. Bantendula yina yonso zole lunganaka. (Kuy. 40:1-22)—2/1, balutiti 12-14.

Inki dikabu bampangi ya Japon bakaka yina sepedisaka bo?

Bo bakaka kamukanda mosi, yina vandaka kutubila nsangu ya mbote yina Matayo sonikaka yina bo balulaka na nsadisa ya Mbalula ya Nsi-Ntoto ya Mpa. Bo ke kabulaka yo na kisalu ya kusamuna, mpi bantu mingi yina me yikanaka ve ti Biblia ke ndimaka yo.—2/15, lutiti 3.

Inki mambu sadisaka balongoki na kumwanga nsangu ya mbote na mvu-nkama ya ntete?

Pax Romana sadisaka bantu na kuzinga na ngemba. Balongoki ya mvu-nkama ya ntete vandaka ti makuki ya kusala banzietelo ya nda sambu banzila vandaka ya kuyidika mbote. Kigreki yina bantu mingi vandaka kutuba sadisaka balongoki na kusamuna, ata na Bayuda yina mwanganaka na bambanza yina vandaka na nsi ya luyalu ya Roma. Diaka, balongoki sadilaka nsiku ya Roma sambu na kupesa bo nswa ya kulonga nsangu ya mbote.—2/15, balutiti 20-23.

Sambu na nki Bakristu ya kieleka ke taka ve nkinsi ya Paki?

Yezu zabisaka balongoki na yandi na kusungimina lufwa na yandi kansi lufutumuku na yandi ve. (Luka 22:19, 20)—3/1, lutiti 8.

Sambu na nki mikanda na beto ke tubilaka diaka ve mingi bizuzi ya mambu yina kele na Biblia mpi kulungana na yo?

Biblia me monisaka nde bantu ya nkaka ya ntama vandaka bizuzi ya mambu ya nene yina zolaka kusalama na nima. Mukanda ya Bagalatia 4:21-31 ke tubila bantu ya nkaka yina vandaka bizuzi. Kansi, yo kele mbote ve na kuyindula to kutuba nde kima to muntu mosi buna vandaka kumonisa diambu mosi yina salamaka na nima. Ata mpidina, bantu to masolo ya ntama yina Biblia ke tubilaka lenda sadisa beto na kubaka malongi. (Bar. 15:4)—3/15, balutiti 17-18.

Sambu na nki kitini ya papirusi yina bo sengumunaka na kisika yina bo vandaka kulosa mvindu na Ezipte ke benda dikebi na beto?

Na mvu-nkama ya me luta, bo sengumunaka kitini ya papirusi, yo kele ti kitini ya Evanzile ya Yoane. Ziku, bo sonikaka papirusi yai bamvula fioti na nima ya mvula yina Yoane sonikaka Evanzile na yandi, mpi mambu yina kele na kitini ya papirusi yai ke ndimisa nde masonama yina beto ke sadilaka kele ya siki-siki mpi yo ke ndimisa nde Biblia kele mukanda ya kutudila ntima.—4/1, balutiti 10-11.

Sambu na nki kubasisa nsumuki yina me balula ve ntima na dibundu kele ngidika mosi ya zola?

Biblia ke monisa nde kubasisa muntu yina me sala disumu kansi me balula ve ntima kele mbote, mpi nde yo lenda natila bantu mambote. (1 Bak. 5:11-13) Yo ke pesaka zina ya Nzambi lukumu mpi ke taninaka bampangi ya dibundu, diaka yo lenda sadisa muntu yina salaka disumu na kuvutukila mabanza ya mbote.—4/15, balutiti 29-30.