Kwenda na mambu ke na kati

Kwenda na tansi ya malongi

 BATANGI NA BETO KE YULA . . .

Keti Pake Ke Vandaka Mpenza Nkinsi ya Bakristu?

Keti Pake Ke Vandaka Mpenza Nkinsi ya Bakristu?

Mukanda mosi (Encyclopædia Britannica) ke tuba nde Pake kele “nkinsi ya nene yina dibundu ya Bukristu ke salaka sambu na kusungimina Lufutumuku ya Yezu Kristu.” Keti Pake ke vandaka mpenza nkinsi ya Bakristu?

Sambu na kuzaba kana kima mosi kele ya kieleka, yo ke vandaka mfunu mingi kutula dikebi na mambu ya fioti-fioti. Mutindu mosi, sambu beto zaba kana Pake kele nkinsi ya Bakristu to ve, beto fwete tula dikebi na mambu ya fioti-fioti ya nkisi yango.

Yezu lombaka balongoki na yandi na kusungimina lufwa na yandi kansi lufutumuku na yandi ve. Ntumwa Polo bingaka nkinsi yai “Madia ya Nkokila ya Mfumu.”1 Bakorinto 11:20; Luka 22:19, 20.

Mukanda yango (Britannica) ke tuba diaka nde binkulu mingi ya Pake “ke wakanaka ve” ti lufutumuku ya Yezu, “kansi yo me katukaka na binkulu ya bantu.” Sambu na bidimbu ya Pake, mu mbandu diaki mpi lapin, (binkulu ya bantu ke sadilaka na bansi mingi) mukanda mosi (The Encyclopedia of Religion) ke tuba nde: “Diaki ke monisa luzingu ya mpa yina ke yantikaka ntangu diaki me pasuka.” Yo ke yika nde: “Lapin me zabanaka bonso mbisi mosi ya ke butaka mingi mpi yo vandaka kumonisa nde nsungi ya printemps me yantika.”

Philippe Walter, longi mosi ya littérature ya ntama ke tendula mutindu bantu kumaka kusadila binkulu yai na nkinsi ya Pake. Yandi sonikaka nde sambu “mabundu ya mimpani vandaka kukuma ya Bukristu,” yo vandaka mpasi ve nde bo wakanisa lufutumuku ya Yezu ti nkinsi ya mimpani yina bo vandaka kusala “ntangu nsungi ya madidi vandaka kusuka mpi nsungi ya printemps vandaka kuyantika.” Walter ke yika nde yo vandaka kitambi mosi ya nene ntangu bo kotisaka manaka ya mimpani na “bankinsi ya Bakristu” mpi diambu yai salaka nde binkulu mingi ya mimpani kukota na dibundu ya Bukristu.

Ntangu bantumwa vandaka na luzingu, binkulu ya mimpani kotaka ve na dibundu ya Bukristu sambu bantumwa vandaka ‘kukanga’ yo nzila. (2 Batesalonika 2:7) Ntumwa Polo tubaka nde: “Ntangu [yandi] ta kwenda bantu ta basika mpi ta tuba mambu ya nioka-nioka sambu na kubenda balongoki na kulanda bo.” (Bisalu 20:29, 30) Na nsuka ya mvu-nkama ya ntete, ntumwa Yoane sonikaka nde bantu ya nkaka vandaka dezia kukusa Bakristu. (1 Yoane 2:18, 26) Nsuka-nsuka, binkulu ya mimpani yantikaka kukota na dibundu ya Bukristu.

“Beno vukana ve ti bantu yina ke kwikilaka ve.”2 Bakorinto 6:14

Kansi, bantu ya nkaka lenda yindula nde kusadila binkulu ya nkaka ya Pake kele mbi ve sambu yo ke sadisaka “mimpani” na kubakisa mbote-mbote tendula ya lufutumuku ya Yezu. Polo vandaka kundima ve mambu ya mutindu yai. Ata yandi monaka bantu ke sadila binkulu mingi ya mimpani ntangu yandi vandaka kusala banzietelo na Kintinu ya Roma, yandi sadilaka ve ata kinkulu mosi sambu na kusadisa bantu na kubakisa Yezu mbote-mbote. Kansi, yandi kebisaka Bakristu nde: “Beno vukana ve ti bantu yina ke kwikilaka ve. Sambu nki kuwakana kele na kati ya lunungu mpi kufwa bansiku? To nki kuwakana kele na kati ya nsemo mpi mudidi? Yehowa ke tuba nde: ‘Yo yina beno basika na kati na bo, beno kabwana ti bo, mpi beno yambula kusimba kima ya mvindu.’”2 Bakorinto 6:14, 17.

Mambu ya beto me tadila awa ke longa beto nki? Yo me monisa beto pwelele nde Pake kele ve nkinsi ya Bakristu.