Itan 21:1-31
21 Atata-obọ nọnsi Jehova ọle ọkhọle ọsi ojie ye.
Ọle dia ọle diọbhi eje ghọn ọlẹn, beji a rẹ sabọ dia amẹn nọn nẹ diọbhi eji ọ hi ki rẹ khin.
2 Ọria sabọ rẹ ha riale ghe, uwedẹ rebhe nin ọle rẹ lu emhin wo dia,Ọkpakinọn, Jehova fẹ ọkhọle ghe.
3 Nin ọria rẹ lu ebe gbale bi ebe diale,Ọle ti Jehova bhọ gbera nin ọria rẹ zọese.
4 Inian ihianbhegbe bi itẹngbemun diabe orukpa nin eria ebe rẹ daghe,Ọkpakinọn, olukhọ ene emhin nan khin.
5 Emhanmhan ọsi ọria nọn de ẹlo re lu emhin* dẹ kiọnlẹn.Bhi obọ nọnkẹle, ọria nọn re otua-otua lu emhin, nọn i ria eria fo dẹ kiẹn ọria nin obọ gbele.
6 Inian emhin ne ghanlẹn nin ọria re ohoghe miẹn diabe ebhu nọn i bue ọ kuẹ hẹ a,Sẹyẹ, ọ dẹ sabọ gbe ọria uhọnmhọn.*
7 Okhọn nin eria ebe khọn, ọle ha gbe ele uhọnmhọn,Ranmhude nin ele bha rẹ ho nin ele lu ebe gbale.
8 Eku ọkpa ọria ebe wo lu,Bhi obọ nọnkẹle, a i miẹn eku bhi obọ ọria nọn lu ebe gbale.
9 Nin okpia rẹ dọ ha nyẹnlẹn bhi obọ ọkpa bhi okhun uwa,Ọle fu bhi egbe nẹ nin ọle rẹ deba okhuo ọle nọn van ovan-ovan ha nyẹnlẹn bhi uwa ọkpa.
10 Nan rẹ ha lu ọkhọlọ ọkpa ghọn ọria ebe;Ọle i gbo mhọn itohan da ibo ọle.
11 A ha re oya nin ọria nọn re ẹbho zọojiẹ, ene bha lẹn eji a ye ki daghe ọle ha wanlan.Sẹyẹ, ọria nọn wanlan a ha mhọn ilẹn-otọ-emhin, ọle ki lẹn ebi ọle ha rẹ lu emhin yẹ.
12 Osẹnobulua nọn lu ebe gbale lẹn ebe sunu bhi uwa ọsi ọria ebe.Ọle dẹ gbe ọle khuelo.
13 Ọria nọn hi ki rẹ khin nọn re emhin lan ehọ sade obhioguele viẹ bu ọle re,Ọle ha yẹ ha viẹ nan rẹkpa ọle, ọle i da miẹn ọnọn ha ka ọle ehọ.
14 Ẹsele nan do lu nin ọria nọn khọẹkẹ, sabọ re ẹkẹ fu ọle re,Sẹyẹ, a ha do re emhin nin ọria nọn fi bhi ẹlo, ọ sabọ de ọle ọkhọle re.
15 Ọ re eria esili ghọnghọn rẹ ha lu ebe diale.Bhi obọ nọnkẹle, ọ i yẹẹ eria ebe rẹ ha lu ebe diale.
16 Ọria nọn zobọ bhọ rẹ ha noo ilẹn-otọ-emhin,Dẹ ke egbe ọle re bhi ẹwẹ ẹbho ne yuno.
17 Ọria nọn yẹẹ rẹ ha le agbọn ẹghe rebhe dẹ kiẹn ọria nin obọ gbele.Sẹyẹ, ọria nọn wo hoẹmhọn anyọn bi abhili,* ẹghe i ribhọ nin ọle ha rẹ fe.
18 Ọria ebe dẹ re uhọnmhọn haosa ebe ha rẹ sunu ji ọria esiliSẹyẹ, ọria nin uwedẹ nọnsọle bha dia, dẹ re uhọnmhọn haosa ebe ha rẹ sunu ji ọria nin uwedẹ nọnsọle diale.
19 Nin okpia rẹ dọ ha nyẹnlẹn bhi ojẹgbo,Ọle fu bhi egbe nẹ nin ọle rẹ deba okhuo ọle nọn van ovan-ovan, nọn yẹ to bhi egbe ha nyẹnlẹn.
20 Emhin ne ghanlẹn bi abhili, ele a miẹn bhi uwa ọsi ọria nọn wanlan,Bhi obọ nọnkẹle, uhuki ki tobọle fi ebi ọle mhọn kua.*
21 Ọria nọn wo ha khu ọbhọ rẹ ha lu ebe gbale, yẹ re oyẹẹ nọn i beghe man,Dẹ miẹn ọmhẹn, sẹyẹ, ọle ki ha mhọn iẹnlẹn bi uyi.
22 Ọria nọn wanlan dẹ sabọ khọn agbaẹbho ne mhọn eyokhọnlẹn ne bunbun miotọ,Ọle dẹ yẹ sabọ dunmhun ogbe nọn ziẹnlẹn nọn gbega ele a.
23 Ọria nọn gbega unun nọnsọleI da nabhi ẹmhọn.
24 Ọria nọn mhọn okpẹhio, nọn yẹ re ebi ọle mhọn dẹgbọ,Ọle lu emhin beji ọle sabọ. Ọle i ria ẹmhọn ebe ha na bhi ebi ọle lu re.
25 Ebi ọria ọdinbhẹlo guanọ nin ọle ha mhọnlẹn dẹ gbe ọle uhọnmhọn,Ranmhude, ọle bha guanọ nin ọle re obọ lu.
26 Ẹghe rebhe ọle rẹ wo guanọ nin ọle ha mhọn emhin ne bunbun,Ọkpakinọn, ọria esili re emhin nin ẹbho, ọle i re ebi ọle mhọn rẹ si akhaẹn.
27 Ahamiẹn izọese ọsi ọria ebe sọnnọn Osẹnobulua,
Eka-eka ki hi ọne ọle re ọkhọle ebe zẹ?
28 Ọria nọn sọsali ohoghe dẹ re uhọnmhọn ọbhọ,Bhi obọ nọnkẹle, ọria nọn ta ebi ọle họn, a dẹ rẹọbhi ebi ọle ta.*
29 Ọria ebe sabọ rẹ lu ẹlo bhi uhọnmhọn bọsi ghe emhin rebhe dia nọnsẹn,Ọrẹyiriọ, ọria nọn lu ebe gbale, ọle emhin ha kiọnlẹn nan.
30 Ẹwanlẹn, ilẹn-otọ-emhin, la adia soso i ribhọ nọn ha sabọ de idobolo ọbhi iho nọnsi Jehova.
31 A ha rẹ mun akasi egbe ọbhi otọ khẹ ukpẹdẹ okhọnlẹn,Jehova hi ọnọn khọnlẹn nin ọria.
