OSẸNOBULUA hi ọnọn re ẹlinmhin nọn khiale rẹ rẹkpa eria ne gbẹn Ebenọnkhiale. Urolo Hibru, Aramaik, bi Grik ene eria nan rẹ gbẹn ọlẹn. Ranmhude ẹbho ne bunbun ihọn ene urolo nan, ọ da khẹke nan zedu Ebenọnkhiale diọbhi urolo ne bunbun beji ẹbho bhi “otọ agbọn rebhe” ha da sabọ miẹn elele bhọ. (Matiu 24:14) Ebe ihinlọn nyan uje, ele ribhi Matiu rẹ sẹbhi Arẹman. A tie ene ebe nan “Obọ Baibo Nan Re Urolo Grik Gbẹn,” ranmhude urolo Grik a ka rẹ gbẹn ele. Kristiẹn eso bhi ore nin ọhẹnhẹn, ele Osẹnobulua noo rẹ gbẹn ọlẹn.

Ukpe 1950, ọle hi ẹghe ọhẹnhẹn nin Esali Jehova rẹ re Ebenọnkhiale—Matiu-Arẹman dagbare bhi urolo Ebo. Ebe Baibo ẹdẹlẹ nin Westcott bi Hort koko kugbe, ọle ele noo rẹ zedu ọne Baibo nan. Ẹmhọn ne ribhi ebe nin ele koko kugbe, ọle yẹ ribhi ebe Baibo ẹdẹlẹ ne dọman nẹ. Ene zedu ọne Baibo nan re dagbare bhi ukpe 1950 wo manman dọnmhegbe nin ele rẹ zedu ẹmhọn nọn ribhi Baibo beji ọ khin tee. Baibo nan zedu ọle diọbhi urolo Ebo nin Esali Jehova re dagbare bhi ukpe 2013, ọle a noolo rẹ zedu ọne Baibo ọsi Esan nan. Esali Jehova yẹ wo dọnmhegbe nin ele rẹ zedu ẹmhọn ne ribhi ọne Baibo nan beji ọ khin tee. Rẹ deba ọnin, ele da dọnmhegbe rẹ zedu ọle bhi uwedẹ nọn ha da lẹkhẹ nan rẹ tie yẹ lẹn otọle. Nin uwẹ rẹ lẹn emhin eso ne dia uwedẹ nan rẹ zedu ọne Baibo nan, fẹ ene uhọnmhọnta nan ghe bhi obọ natiọle “Ebi A Gbẹn Ba Ọle”: “Ebi A Rẹ Zedu Baibo Yẹ,” “Emhin Ne Ribhi Ọne Baibo Nan,” bi “Ebi Baibo Rẹ Tọ Sẹbhi Ẹghe Nọnsẹmhan Yẹ.”

Igba 237, ọle elin nọnsi Osẹnobulua nọn yi Jehova zegbere bhi ẹkẹ Ebenọnkhiale—Matiu-Arẹman. Emhin nọn manman wo lu uhọnmhọn-emhin nọn nan rẹ kpe elin nọnsi Osẹnobulua khia. Ọ yẹ wo lu uhọnmhọn-emhin nin eria rẹ ha sotie ọne elin, ranmhude ọ dẹ rẹkpa ele rẹ miẹn umiẹnfan. Ranmhude ọnan, a da gbẹn elin nọnsi Osẹnobulua ọbhi eji ọkhẹke nọn ha ye bhi ọne Baibo nan. (Matiu 6:9; Rom 10:13) Nin uwẹ rẹ lẹn ebezẹle nan da gbẹn elin nọnsi Jehova ọbhi ije kẹkẹ bhi ọne Baibo nan, fẹ uhọnmhọnta nọn yọle “Elin Nọnsi Osẹnobulua Bhi Obọ Baibo Nan Re Urolo Grik Gbẹn” bhi obọ natiọle “Ebi A Gbẹn Ba Ọle.”

Ọta nọnsi Osẹnobulua, nọn ha rẹkpa ẹbho rẹ nyẹnlẹn bhi agbọn ọsọgbọn nin Osẹnobulua vele, ọle Ebenọnkhiale khin. Ọnan zẹle nan da tie ọne Baibo nan Ebenọnkhiale Ọsi Agbọn Ọsọgbọn. (2 Pita 3:13) Eria ne zedu ọne Baibo nan wo manman hoẹmhọn Osẹnobulua, nọn nyan ẹmhọn rebhe ne ribhi ẹkẹ ọle. Ranmhude ọnan, ele riale ghe, ọ wo manman khẹke nin ele zedu ọta nọnsọle beji ọ khin tee. Mhan bhii Osẹnobulua nin ọne Ebenọnkhiale nan rẹkpa eria ne mhọn ọkhọ esili rẹ “dọ lẹn ẹmhọanta.”—1 Timoti 2:4.