Itan 13:1-25
13 Ọmọn nọn wanlan miẹn adia nọnsi aba ọle ọbhi egbe,Ọkpakinọn, ọmọn nọn tẹngbemun i miẹn adia ọbhi egbe.
2 Ọta esili nin ọria ta, dẹ sabọ re ọle ha miẹn emhin esili,Bhi obọ nọnkẹle, okhọn bi ugbele, ọle yẹẹ ọria nin uwedẹ nesọle bha dia.
3 Ọria nọn gbega unun nọnsọle* gbega iẹnlẹn nọnsọle,Ọkpakinọn, ọria nọn talọ sankan-sankan dẹ re uhọnmhọn fia.
4 Ọria nọn gbe obọ bhi egbe i da miẹn emhin rẹ lu ebe ghọn ọlẹn,Bhi obọ nọnkẹle, ọria nọn re obọ lu dẹ wo miẹn rẹ lu.
5 Ohoghe sọnnọn eria ne lu ebe gbale,Bhi obọ nọnkẹle, ẹkhọle bi iregbebhunun, ọle eria ebe miẹn bhi ebi ele lu.
6 Iluemhin-nọnsẹn gbega ọria nọn bha lẹn ọkpa lẹn eva,Bhi obọ nọnkẹle, emhin ebe nin ọria ebe lu dẹ gbe ọle uhọnmhọn.
7 Ọria ribhọ nọn man lu ghe ọle fe, ọkpakinọn, ọle i mhọn emhin soso;Ọria ọbhebhe ribhọ nọn man lu ghe obhioguele ọle khin, sokpan, ọle wo manman fe.
8 Igho, ọle ọria nọn fele rẹ dẹ uhọnmhọn* nọnsọle,Bhi obọ nọnkẹle, ẹbho bhọ i kpokpo ọria nọn i mhọn emhin.
9 Orukpa ọsi eria esili manman bhala,Ọkpakinọn, a dẹ fuẹn eria ebe a beji a rẹ fuẹn orukpa a.
10 Ọria nọn i lu emhin ọbhi oleghe,* ẹmhọn ọkpa ọle si re,Bhi obọ nọnkẹle, ene guanọ adia bhi obọ ẹbho* dẹ miẹn ẹwanlẹn.
11 Ẹfe nan re ẹjẹje miẹn i da tọ,Bhi obọ nọnkẹle, igho nan fẹkẹ ha koko khere-khere, dẹ ha bun ọbhọ.
12 Ebi ọria khẹ nọn bha sẹ sẹ ọle obọ re egbe lọ ọle,Bhi obọ nọnkẹle, ahamiẹn ebi ọria khẹ sẹ ọle obọ, ahu ki do ọle bhọ.*
13 Ọria nọn hi ki rẹ khin nọn re ẹlo gbuhi a, ọle ki loya nọn ha nabhọre,Bhi obọ nọnkẹle, ọria nọn re obọ rẹkhan uhi ki miẹn elele bhọ.
14 Iman-emhin* ọsi ọria nọn wanlan re iẹnlẹn nin ọria,Ranmhude, ọ rẹkpa ọria rẹ rẹban edọnmhẹn nọn ha sabọ si uu ji ọle.
15 Ọria nọn sabọ lẹn otọ emhin nọnsẹn, ẹmhọn ọlẹn ti ẹbho bhọ,Bhi obọ nọnkẹle, ọria nin uwedẹ nọnsọle bha dia si ẹmhọn re.
16 Ọria nọn wanlan fẹkẹ re ẹwanlẹn rẹ lu emhin,Bhi obọ nọnkẹle, ẹwobi, ọle tobọle re egbọle bhi unun.
17 Ukọ nọn i mhẹn, ọle nabhi ẹmhọn,Bhi obọ nọnkẹle, ukọ nọn lu ebi a je ọle le re emhin esili re.
18 Ọria nọn hi ki rẹ khin nọn bha re ehọ bhi ude dẹ miẹn ẹkhọle bhi egbe, yẹ kiẹn ọria nin obọ gbe,Bhi obọ nọnkẹle, a dẹ gẹn ọria nọn wo ha re ehọ bhi ude.
19 Ebi ọria guanọ ha sẹ ọle obọ, ọle ki wo ha ghọnghọn,Sokpan, ọ i yẹẹ uhuki rẹ re obọ sibhi emhin ebe re.
20 Ọria nọn deba ọria nọn wanlan ha muobọ ki yẹ ha wanlan,Bhi obọ nọnkẹle, ọria nọn deba ọria nọn i wanlan ha muobọ ki miẹn ọbalọ bhọ.
21 Ọkhọbhegbe, ọle eria ne lu emhin ebe miẹn bhi egbe,Bhi obọ nọnkẹle, emhin mhẹn nin eria ne lu emhin esili.
22 Ọria nọn mhẹn, ọle fi uku ọbhi otọ nin eyẹ nesọle,Bhi obọ nọnkẹle, ẹfe nin ọria ebe rẹ ya, dẹ kiẹn ọsi ọria nọn lu ebe gbale.
23 Ugbo nin obhioguele mun wo manman biẹ ebale,Sokpan ẹbho dẹ sabọ re eku miẹn ọle le.*
24 Ọria nọn hi ki rẹ khin nọn bha gbe ọmọn nọnsọle bhi esankan bha hoẹmhọn ọne ọmọn,Bhi obọ nọnkẹle, ọria nọn hoẹmhọn ọmọn nọnsọle wo* gbe ọle bhi esankan.
25 Eria esili dẹ miẹn ebale le sẹbhi ikhọnlẹn,Bhi obọ nọnkẹle, eria ebe ki ha ribhi ohanmhẹn.
