1-2. Nama kebuah ti manah kitai ngayanka pengerindu ti meruan ngagai pangan diri?

KITAI bisi mayuh kebuah ti manah ngayanka pengerindu ti meruan ngagai pangan diri. Peratika nama dipadah Bup Kudus: ‘Anang ngelengkaka penaluk enggau penetap ati nuan. . . . Nya baru Petara enggau mensia deka rinduka nuan.’ “Nuan nyamai diau enti nuan nelap.” “Anang enda nelap sereta betul ati, nya baru nuan deka panjai umur.”—J-lam. 3:3, 4; 11:17; 21:21. *

² Ayat ari bup Jaku Dalam tu meri kitai tiga kebuah patut ngayanka pengerindu ti meruan ngagai pangan diri. Kesatu, enti kitai ngayanka pengerindu ti meruan, Petara deka rindu agi ke kitai. Kedua, kitai deka bulih penguntung. Ambika chunto, kitai ulih ngembuan kaul ti manah enggau orang bukai. Ketiga, kitai deka bulih mayuh berekat jemah ila, nyengkaum pengidup ti meruan belama iya. Endang amat, kitai bisi mayuh kebuah ngasika pesan Jehovah: “Ngayanka penelap enggau pengasih ngagai pangan diri.”—Sek. 7:9.

3. Nama tanya ke deka dipelajarka kitai ba artikel tu?

³ Ba artikel tu, kitai deka ngiga saut ngagai empat iti tanya: (1) Kitai deka nunjukka pengerindu ti meruan ngagai sapa?  (2) Nama ulih dipelajarka kitai ari bup Rut pasal ngayanka pengerindu ti meruan? (3) Baka ni kitai ulih ngayanka pengerindu ti meruan kemayaharitu? (4) Nama penguntung ke diulih sida ti ngayanka pengerindu ti meruan?

4. Baka ni kitai ulih neladan Jehovah lebuh nunjukka pengerindu ti meruan? (Mark 10:29, 30)

⁴ Ba artikel sebedau tu, kitai belajar Jehovah semina nunjukka pengerindu ti meruan ngagai orang ke rinduka Iya sereta nyembah Iya. (Dan. 9:4) Kitai deka ‘nunda teladan Petara, laban kitai tu anak ke dikesayauka Iya.’ (Eps. 5:1) Nya alai, kitai deka ngembuan pengerindu ti meruan ngagai bala menyadi ba eklisia.—Bacha Mark 10:29, 30.

5-6. Ari chunto ke diberi, nama kebuah seiku pekereja terus gawa enggau siti kompeni?

⁵ Nuan ulih ngayanka pengerindu ti meruan ngagai bala menyadi Kristian enti nuan nemu reti pengerindu ti meruan enggau manah agi. Aram kitai meda siti chunto kena meretika tu.

⁶ Gambarka seiku orang ke gawa ba siti kompeni pengelama betaun-taun. Sepemanjai iya gawa ba dia, iya nadai kala betemu enggau bos besai ba kompeni nya. Kekadang iya engka enda setuju enggau pemutus ke digaga kompeni nya. Iya gawa ba kompeni nya ukai ketegal pengerindu, tang ketegal deka ngulihka belanja. Iya deka terus gawa ba kompeni nya nyentukka iya pinchin tauka iya diberi kereja bukai ke manah agi.

7-8. (a) Nama meransang orang ngayanka pengerindu ti meruan? (b) Nama kebuah kitai deka ngelansa sekeda ayat ari bup Rut?

⁷ Ulih nuan meda bida entara pengerindu ti meruan enggau asai ati pekereja nya? Kebuah pekereja nya agi gawa ba kompeni ketegal iya deka ngulihka belanja. Tang nama meransang nembiak Jehovah nunjukka pengerindu ti meruan? Tu ukai ketegal sida dipejal tauka ngarapka orang malas pemanah sida. Tang, sida ngereja nya ketegal sida empu ti deka. Aram kitai meda chunto David. Taja pan apai Jonatan, Saul, deka munuh David, tang David terus ngayanka pengerindu ti meruan ngagai Jonatan. Betaun pengudah pemati Jonatan, David agi nunjukka pengerindu ti meruan ngagai anak lelaki Jonatan, iya nya Mepiboset.—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Kitai ulih belajar pasal pengerindu ti meruan ari sekeda ayat ba bup Rut. Nama ulih dipelajarka kitai pasal pengerindu ti meruan, lalu baka ni kitai ulih ngena utai ke dipelajar ba eklisia? *

9. Nama kebuah Naomi ngumbai Jehovah ngelaban iya?

⁹ Ba bup Rut, kitai macha pasal Naomi, menantu iya Rut sereta seiku lelaki ke benama Boas. Boas nangika Petara sereta seiku ari kaban belayan laki Naomi. Lebuh lapar pungkang nyadi ba Israel, Naomi, laki iya, enggau dua iku anak lelaki sida pindah ngagai Moap. Ba dia, laki Naomi mati. Udah nya, dua iku anak lelaki Naomi kawin. Tang sayau amat, sida mega mati ba Moap. (Rut 1:3-5; 2:1) Semua penusah tu ngasuh Naomi balat merinsa nyentukka iya ngumbai Jehovah ngelaban iya. Gambarka asai ati Naomi  lebuh iya madah: ‘Jari Jehovah udah mutar ngelaban aku.’ ‘Petara ti Pemadu Bekuasa udah ngasuh aku merinsa idup.’ ‘Laban Jehovah ti Pemadu Bekuasa udah ngukum [“ngelaban,” NWT] aku, lalu ngasuh aku ditinggang penusah.’—Rut 1:13, 20, 21.

10. Nama asai ati Jehovah ngagai utai ke disebut Naomi lalu nama digaga Iya?

¹⁰ Nama asai ati Jehovah ngagai utai ke disebut Naomi? Jehovah enda ninggalka Naomi. Tang, Iya ngayanka Diri meretika asai ati Naomi. Jehovah nemu “orang ke bepenemu-dalam tau nyadi baka orang gila enti iya balat ditekan.” (P-jar. 7:7, NWT) Taja pia, Naomi begunaka tulung kena nemu Jehovah enda kala ninggalka iya. Baka ni Jehovah nulung iya? (1 Sam. 2:8) Jehovah ngena Rut meransang Naomi lalu ngayanka pengerindu ti meruan ngagai iya. Rut nunjukka pengerindu ngagai Naomi lalu nulung iya mutarka asai asa ati. Rut mega nulung Naomi nemu Jehovah agi rinduka iya. Nama ulih dipelajarka kitai ari teladan Rut?

11. Nama kebuah bala menyadi Kristian deka nulung sida ke balat tusah ati?

¹¹ Pengerindu ti meruan meransang kitai nulung sida ke balat tusah ati tauka asa ati. Baka Rut ke enda ninggalka Naomi, mayuh bala menyadi kemayaharitu bebendar nulung menyadi Kristian ba eklisia ke balat tusah ati tauka asa ati. Sida sayauka bala menyadi tu lalu enggau naka ulih nulung sida. (J-lam. 12:25; 24:10) Tu sejalai enggau jaku lalau rasul Paul ke ngasuh kitai: “Meransang orang ke takut, nulung orang ke lemi, lalu liat ati enggau semua sida.”—1 Tes. 5:14.

12. Nama chara ti pemadu manah kena nulung bala menyadi ke asa ati?

¹² Chara ti pemadu manah kena nulung bala menyadi ke asa ati iya nya, ninga enggau manah lebuh sida mantaika asai ati. Lalu tulung sida nemu, nuan amat sayauka sida. Lebuh nuan ngayanka pengerindu ngagai bala menyadi, Jehovah gaga ati. (Mas. 41:1) Jaku Dalam 19:17 madahka: ‘Lebuh nuan meri utai ngagai orang ke seranta, nuan baka ke nyali utai ngagai Jehovah, lalu Iya deka mayar nuan.’

13. Nama bida entara pemutus Rut enggau Orpah, lalu baka ni Rut ngayanka pengerindu ti meruan? (Peda gambar ba mua majalah.)

¹³ Kitai ulih mereti enggau manah agi pasal pengerindu ti meruan lebuh kitai mansik utai ke nyadi ba Naomi pengudah laki enggau dua iku anak iya mati. Pengudah Naomi nemu Jehovah “udah merekatka bala nembiak Iya, ngasuh sida bulih asil ari utai ti ditanam sida,” iya mutuska deka pulai ngagai menua iya empu. (Rut 1:6) Rut enggau Orpah nitihka Naomi. Tang ba rantau jalai, tiga kali Naomi ngasuh seduai iya pulai ngagai Moap. Nama nyadi udah nya? Bup Kudus madah: “Orpah lalu nyium mentua indu iya, meri selamat tinggal, lalu pulai, tang  Rut enggai ngelengkaka Naomi.” (Rut 1:7-14) Orpah pulai ke Moap baka ke dipinta Naomi. Tang Rut mutuska deka terus enggau Naomi, taja pan iya ulih pulai ngagai Moap. (Rut 1:16, 17) Rut nitihka Naomi ukai ketegal iya ngasaika diri patut ngereja nya, tang ketegal iya empu ti deka. Utai ke digaga Rut nunjukka iya bisi pengerindu ti meruan. Nama ulih dipelajarka kitai ari Rut?

14. (a) Nama digaga bala menyadi Kristian kemayaharitu? (b) Nitihka Hebrew 13:16, baka ni kitai ulih ngagaka ati Petara?

¹⁴ Pengerindu ti meruan meransang kitai ngereja lebih agi kena nulung orang. Kemayaharitu mayuh bala menyadi Kristian ngayanka pengerindu ti meruan ngagai pangan diri, indah ngagai bala menyadi ke enda dikelala sida. Ambika chunto, lebuh pengerusak alam nyadi ba sesiti endur, bala menyadi enggau jampat meri tulung. Lebuh bisi menyadi ke napi penanggul ba penatai pemisi, bala menyadi enggau jampat deka nemu utai ke diguna iya lalu meri tulung. Baka orang Kristian ba abad keterubah di Masedonia, sida ngereja utai lebih agi ari ke dipinta. Sida sanggup ngena awak sereta utai ke dikemisi sida kena nulung bala menyadi ke begunaka bantu. Indah sida meri “lebih agi ari ti ulih diberi sida.” (2 Kor. 8:3) Jehovah tentu gaga ati lebuh meda bala nembiak Iya ngayanka pengerindu ti meruan!—Bacha Hebrew 13:16.

15-16. Baka ni Rut nunjukka diri keran deka nulung?

¹⁵ Kitai ulih belajar mayuh utai ari chara Rut nulung Naomi. Aram kitai meda.

¹⁶ Terus meh meri tulung. Lebuh Rut madahka diri deka enggau mentua indu iya Naomi ngagai Judah, Naomi nguji deka nagang iya. Tang Rut majak deka enggau iya. Nama nyadi pengudah nya? “Lebuh Naomi meda Rut keras deka mupuk enggau iya, iya lalu badu agi bejaku.”—Rut 1:15-18.

17. Nama utai ke ulih nulung kitai deka terus meri bantu?

¹⁷ Utai ke ulih dipelajarka kitai: Kitai patut sabar lebuh deka nulung orang ke balat tusah ati, lalu kitai anang badu ngereja nya. Ambika chunto, seiku menyadi Kristian engka terubah iya enggai nerima tulung ari kitai. Taja pia, pengerindu ti meruan deka meransang kitai mengkang semak enggau iya. (Gal. 6:2) Kitai ngarapka iya deka belubah-lubah nerima tulung ari kitai sereta ngemendarka kitai ngelantangka iya.

18. Nama utai ke ulih ngasuh Rut tusah ati?

¹⁸ Anang jampat ngambi ati. Lebuh Naomi enggau Rut datai ba Betlehem, Naomi betemu enggau bala kaban iya suba. Iya madahka sida: ‘Lebuh aku ninggalka menua tu, aku mayuh utai, tang Jehovah udah mai aku pulai puang.’ (Rut 1:21) Gambarka pengasai ati Rut lebuh Naomi bejaku baka nya! Rut udah bebendar nulung Naomi. Rut udah nyabak enggau iya, ngelantangka iya sereta udah bejalai jauh nitihka iya. Taja pia, Naomi madah: ‘Jehovah udah mai aku pulai puang.’ Taja pan Rut bediri ngimbai Naomi maya nya, utai ti disebut Naomi nunjukka iya baka ke enda beterima kasihka Rut ti udah bebendar nulung iya. Tu engka ulih ngasuh Rut balat tusah ati! Taja pia, iya enda ninggalka Naomi.

19. Nama nulung kitai mengkang semak enggau orang ke tusah ati?

¹⁹ Utai ke ulih dipelajarka kitai: Seiku menyadi Kristian ke benung tusah ati engka nyebut utai ti ulih ngemediska ati kitai, taja pan kitai udah bebendar nulung iya. Tang, kitai enggai ngambi ati. Kitai deka terus  ngiga chara kena nulung iya. Kitai mega deka minta tulung ari Jehovah ngambika ulih meri chara kena ngelantangka ati menyadi nya.—J-lam. 17:17.

20. Nama meransang Rut deka terus nulung Naomi?

²⁰ Beri meh jaku peransang ba maya ti ngena. Rut udah nunjukka pengerindu ti meruan ngagai Naomi. Tang Rut mega begunaka jaku peransang. Nya alai, Jehovah ngena Boas meransang Rut. Ku Boas madahka: ‘Awakka Jehovah ngupah nuan ketegal utai ti udah dikereja nuan. Awakka nuan bulih upah enggau penuh ari Petara Jehovah ke disembah orang Israel, ti udah alai nuan datai ngiga pengelikun!’ Jaku tu amat negu ati Rut. Lalu ku Rut nyaut Boas: “Nuan udah ngasuh ati aku berasai nyamai, laban nuan nelap amat bejaku enggau aku.” (Rut 2:12, 13) Jaku peransang ke diberi Boas ba maya ti ngena meri pengering ngagai Rut ngambika terus nulung Naomi.

21. Nitihka Isaiah 32:1, 2, nama deka digaga tuai gempuru ti bisi pengibuh?

²¹ Utai ke ulih dipelajarka kitai: Kingatka, sida ke ngayanka pengerindu ti meruan ngagai orang bukai mega begunaka jaku peransang. Baka Boas ke muji Rut lebuh iya meda Rut manah enggau Naomi, bala tuai gempuru mega muji bala menyadi Kristian lebuh beratika pengawa sida ti bebendar nulung menyadi bukai. Jaku puji ba maya ti ngena ulih ngeringka bala menyadi Kristian ngambika terus meransang orang bukai.—Bacha Isaiah 32:1, 2.

22-23. Baka ni asai ati Naomi berubah, lalu nama kebuah? (Masmur 136:23, 26)

²² Enda lama udah nya, Boas meri mayuh pemakai ngagai Rut sereta Naomi. (Rut 2:14-18) Baka ni asai ati Naomi enggau pengerah jari Boas? Ku iya: ‘Awakka Jehovah  merekatka Boas! Jehovah endang seruran [“ngayanka pengerindu ti meruan,” NWT] enggau orang ke agi idup sereta enggau orang ke udah mati.’ (Rut 2:20a) Tu nunjukka asai ati Naomi udah berubah! Sebedau nya, iya kala nyabak lalu madah: ‘Jehovah . . . udah ngelaban aku.’ Tang diatu iya madah enggau gaga ati: ‘Jehovah endang seruran [“ngayanka pengerindu ti meruan,” NWT].’ Nama engka ngasuh asai ati Naomi berubah?

²³ Naomi nyau nemu Jehovah enda kala ninggalka iya. Jehovah udah ngena Rut nulung Naomi lebuh seduai iya bejalai ngagai menua Judah. (Rut 1:16) Naomi mega nemu Jehovah ngena Boas ngintu seduai iya Rut. * (Rut 2:19, 20b) Naomi engka berunding baka tu: ‘Diatu aku nemu, Jehovah enda kala ninggalka aku, Iya bisi enggau aku ngelama tu!’ (Bacha Masmur 136:23, 26.) Naomi tentu beterima kasih ngagai Rut sereta Boas ti enda kala ninggalka iya! Semua sida amat gaga ati laban Naomi bulih baru pengaga ati iya sereta pengering kena nyembah Jehovah.

24. Nama kebuah kitai deka terus ngayanka pengerindu ti meruan ngagai bala menyadi Kristian kitai?

²⁴ Nama udah dipelajarka kitai ari bup Rut pasal pengerindu ti meruan? Pengerindu ti meruan meransang kitai terus nulung bala menyadi ke napi penusah ba ati sereta ngereja lebih agi kena nulung sida. Bala tuai gempuru ulih meri jaku peransang ba maya ti ngena ngagai sida ke nunjukka pengerindu ti meruan ngagai orang bukai. Lebuh kitai beratika baka ni bala menyadi bulih pengaga ati baru sereta pengering kena nyembah Jehovah, kitai mega deka berasai gaga ati. (SKR. 20:35) Tang keberat agi, nama kebuah kitai deka terus ngayanka pengerindu ti meruan? Laban kitai deka neladan sereta ngelantangka ati Jehovah ke ngembuan “pengerindu ti besai.”—P-sut. 34:6; Mas. 33:22.