2 Samuel 4:1-12
4 Lebuh anak Saul, Is-boset, ninga Abner udah mati ba Hebron, iya berasai balat amat takut,* lalu semua orang Israel pan berasai enda tenang.
2 Bisi dua iku lelaki ke nyadi ketuai raban perumpak ke diempu anak Saul nya. Siku benama Banah, lalu siku da agi benama Rekap. Apai seduai iya Rimon, orang Berot ke ari raban bansa Benjamin. (Berot kala nyadi sebagi ari kawasan raban bansa Benjamin.
3 Orang Berot rari ngagai Gitaim, lalu sida diau ba dia nyadi orang asing sampai ke seharitu.)
4 Jonatan anak Saul bisi siku anak lelaki ke tachat. Anak iya nya benama Mepiboset. Mepiboset beumur lima taun lebuh orang mai berita ari Jesril pasal pemati Saul enggau Jonatan. Maya nya, siku indu ke ngibun Mepiboset merap iya lalu ngerarika diri. Tang laban iya kelalu begaut, Mepiboset pan labuh, lalu kaki iya pan tachat.
5 Rekap enggau Banah, iya nya anak lelaki Rimon ari Berot, tama ngagai rumah Is-boset maya tengah hari. Maya nya hari angat, lalu Is-boset benung tinduk.
6 Lebuh seduai iya tama kia, seduai iya ngaga diri deka ngambi gandum. (Tang, seduai iya ngerejang perut Is-boset lalu ngerarika diri.)
7 Lebuh seduai iya tama ngagai rumah nya, Is-boset benung gali ba dalam bilik iya. Seduai iya ngerejang iya sampai mati, lalu mumpung pala iya. Udah nya, seduai iya ngambi pala Is-boset, lalu bejalai sepemanjai malam nengah jalai ke nuju ngagai Arabah.
8 Seduai iya lalu mai pala Is-boset ngagai David ba Hebron. Ku seduai iya bejaku ngagai raja nya: “Tu meh pala Is-boset, anak Saul, munsuh nuan ke deka munuh nuan. Seharitu, Jehovah udah malas Saul enggau bala peturun iya ke nuan, tuan raja.”
9 Tang, David madah ngagai Rekap enggau menyadi iya, Banah, iya nya anak orang Berot ke benama Rimon: “Aku besumpah atas nama Jehovah, Petara ti idup, ke udah nyelamatka* aku ari semua penusah.
10 Suba, bisi orang madah ngagai aku: ‘Saul udah mati.’ Orang nya ngumbai iya udah mai berita ti manah. Tang, aku nangkap iya lalu munuh iya ba Siklak. Nya meh upah ke diberi aku ngagai iya.
11 Endaka balat agi enti orang jai munuh orang ke nadai ngereja penyalah ba endur iya tinduk, ba rumah iya empu? Endaka seduai patut betanggungjawapka darah iya, lalu dipunaska ari dunya tu?”
12 Udah nya, David ngasuh bala iya munuh seduai iya. Sida netak jari enggau kaki seduai iya, lalu ngantung bangkai seduai iya semak kolam ba Hebron. Sida ngambi pala Is-boset lalu nguburka nya ba kubur Abner ba Hebron.
