2 Samuel 8:1-18
8 Pengudah sesiti timpuh, David ngalahka orang Pilistin lalu nguasa sida. Iya ngambi kawasan Meteg-ama ari sida.
2 Udah nya, David ngalahka orang Moap. Iya ngasuh sida gali ba tanah, lalu nyukat barisan sida ngena tali. Dua pertiga ari sida dibunuh, lalu satu pertiga ari sida ditejuka idup. Udah nya, orang Moap nyadi ulun David lalu mayar chukai* ngagai iya.
3 David ngalahka Hadadeser anak Rehop, iya nya raja ke merintah Sobah, lebuh Hadadeser dalam pejalai iya deka ngambi kuasa iya pulai baru ba Sungai Eupratis.
4 David nangkap 1,700 iku soldadu Hadadeser ke nepan kuda, enggau 20,000 iku soldadu iya ke bejalai kaki. Udah nya, David netak urat kaki semua kuda nya. Semina 100 iku kuda ke dikena narit kerita kuda enda ditetak iya urat kaki.
5 Lebuh orang Siria ari Damaskus datai deka nulung Raja Hadadeser, David munuh 22,000 iku orang Siria.
6 Udah nya, David nganjung raban soldadu iya ngambika bejaga ba Damaskus, ba Siria. Orang Siria nyadi ulun David, lalu sida mayar chukai ngagai iya. Enda ngira kini ke penunga David, Jehovah ngasuh iya menang.*
7 David mega ngambi terabai bulat, ke digaga ari emas, ari orang ke gawa ke Hadadeser, lalu mai semua utai nya ngagai Jerusalem.
8 Raja David ngambi mayuh amat temaga ari kuta Betah enggau Berotai, iya nya kuta enggi Hadadeser.
9 Raja Toi ari Hamat bisi ninga pasal David ke udah ngalahka semua soldadu Hadadeser.
10 Nyadi, Raja Toi pan nganjung anak iya, Joram, betemu enggau David lalu nanyaka rita iya. Joram mega meri jaku puji* ngagai David ke udah nyerang lalu ngalahka Hadadeser. (Hadadeser selalu beperang enggau Toi.) Joram mega mai utai ke digaga ari pirak, emas, enggau temaga ke David.
11 Raja David nguduska semua utai nya lalu nyerahka nya ngagai Jehovah. Iya mega ngereja utai ti sama ngagai pirak enggau emas, ke dirampas iya ari semua bansa bukai ke udah dialahka iya,
12 iya nya ari Siria enggau Moap, ari orang Amon, ari orang Pilistin, ari orang Amalek, enggau ari Raja Hadadeser anak Rehop ke merintah Sobah.
13 David nyadi majak tebilang lebuh iya pulai pengudah munuh 18,000 orang Edom ba Lebak Garam.
14 Iya nganjung raban soldadu ngambika bejaga ba Edom. Iya ngereja nya ba serata menua Edom, lalu semua orang Edom nyadi ulun iya. Enda ngira kini ke penunga David, Jehovah ngasuh iya menang.*
15 David merintah serata Israel. Iya ngereja utai ti lurus sereta adil ke semua rayat iya.
16 Joap anak Seruyah nyadi ketuai soldadu. Jehosapat anak Ahilut nyadi orang ke nulis rekod.
17 Sadok anak Ahitup enggau Ahimelek anak Abiatar gawa nyadi imam. Serayah gawa nyadi sekretari.
18 Benayah anak Jehoyada merintah orang Kereti enggau orang Peleti. Bala anak lelaki David nyadi ketuai menteri.*
