2 Samuel 21:1-22
21 Maya jeman David, lapar pungkang nyadi pengelama tiga taun bejurut. Nya alai, David nanya Jehovah, lalu Jehovah madahka: “Saul enggau ruang bilik iya berutang darah, laban iya udah munuh orang Gibeon.”
2 Nyadi, raja ngasuh orang Gibeon datai, lalu iya bejaku enggau sida. (Orang Gibeon ukai orang Israel. Sida nya orang Amor. Orang Israel enda munuh sida, laban orang Israel udah besumpah deka nejuka sida idup. Tang, ketegal Saul kelalu keran deka nulung orang Israel enggau orang Judah, Saul bebendar munuh orang Gibeon.)
3 David nanya orang Gibeon: “Nama utai ke patut digaga aku ke kita? Baka ni aku ulih ngasuh orang Israel enda agi berutang darah, ngambika kita merekatka bala nembiak* Jehovah?”
4 Ku orang Gibeon nyaut iya: “Kami enda minta pirak tauka emas kena mutarka penanggul entara kami enggau sida Saul sebilik. Kami mega enda ulih munuh sapa-sapa ba Israel.” Nyadi, David madahka: “Aku deka ngereja nama-nama utai ke dipinta kita.”
5 Ku sida madah ngagai raja: “Orang nya nguji deka munuh kami lalu ngemunaska kami, ngambika kami enda ulih diau ba dini-dini endur ba Israel.
6 Serahka tujuh iku lelaki ari peturun iya ngagai kami. Kami deka ngantung bangkai sida* ngambika dipeda Jehovah ba kuta Saul ba Gibeah, iya nya kuta raja ke dipilih Jehovah.” Raja pan madahka: “Aku deka nyerahka sida ngagai kita.”
7 Tang, Raja David kasihka uchu Saul, iya nya Mepiboset anak Jonatan, laban iya udah besumpah enggau Jonatan anak Saul ba depan Jehovah.
8 Nyadi, David ngambi Armoni enggau Mepiboset, iya nya anak lelaki Saul ke diadaka Rizpah anak Aiah. Iya mega ngambi lima iku anak lelaki Adril ke diadaka Mikal* anak Saul. (Adril nya anak Barsilai ari Meholah.)
9 Udah nya, iya nyerahka sida ngagai orang Gibeon. Orang Gibeon ngantung bangkai sida ba atas kawasan gunung ngambika dipeda Jehovah. Tujuh iku orang nya mati sama-sama. Sida dibunuh maya musin ngetau barli baru berengkah.
10 Udah nya, Rizpah anak Aiah ngambi kain guni lalu nganchau kain nya ba atas batu. Iya nyaga bangkai sida ngambika burung enda inggap ba bangkai sida maya siang hari, lalu ngambika jelu liar enda datai kia maya malam hari. Iya diau dia kenyau ari maya musin ngetau berengkah nyentukka maya hari ujan ngemasahka bangkai sida.
11 David bisi ninga pasal utai ke digaga gundik Saul nya, iya nya Rizpah anak Aiah.
12 Nya alai, David pan mansang ngagai bala tuai* Jabes-gilead, laban deka ngambi tulang Saul enggau tulang anak iya, Jonatan, ke udah dichuri bala tuai nya ari dataran awam ba Bet-san. (Orang Pilistin udah ngantung bangkai Saul enggau Jonatan ba dia, ba hari ti sama sida munuh Saul ba Gilboa.)
13 David pan ngambi tulang Saul enggau Jonatan ari kuta nya. Sida mega ngambi tulang orang ke udah digantung* nya.
14 Udah nya, sida nguburka tulang Saul enggau tulang anak iya, Jonatan, ba kubur apai Saul, Kish. Kubur nya bisi ba kuta Sela, ke ba menua Benjamin. Pengudah sida ngereja semua utai ke diasuh raja, Petara ningaka utai ke dipinta sida ke menua nya.
15 Udah nya, orang Pilistin enggau orang Israel beperang baru. David enggau bala iya pan beperang ngelaban orang Pilistin. Tang, David berasai lelak.
16 Bisi siku lelaki ari peturun Repaim ke benama Isbi-benop ingin deka munuh David. Iya mai sangkuh temaga ke ngemerat kira-kira tiga kilogram setengah,* enggau siti pedang ke agi baru.
17 Abisai anak Seruyah terus datai nulung David, lalu nyerang orang Pilistin nya sampai orang Pilistin nya mati. Maya nya, bala David besumpah ngagai David. Ku sida madahka: “Nuan enda tau enggau kami beperang agi, enggaika lampu kelita orang Israel padam!”
18 Udah nya, orang Israel beperang ngelaban orang Pilistin baru ba Gop. Maya nya, siku orang Husah ke benama Sibikai munuh Sap ke datai ari peturun Repaim.
19 Perang lalu nyadi baru enggau orang Pilistin ba Gop. Elhanan anak Jaare-oregim ari Betlehem munuh Goliat ari Gat. Goliat bisi sangkuh ke ngemesai kayu ba perengka ke dikena betenun.
20 Udah nya, perang nyadi baru ba Gat. Ba dia, bisi siku lelaki ti amat besai ari peturun Repaim. Iya bisi enam iti tunjuk jari ba kedua piak jari iya, lalu enam iti tunjuk kaki ba kedua piak kaki iya. Semua iya bisi 24 iti.
21 Iya majak mencabar* orang Israel. Nya alai, Jonatan, iya nya anak abang David ke benama Shimei, lalu munuh iya.
22 Sida empat nya peturun Repaim ba Gat, lalu sida alah laban David enggau bala iya.
