2 Samuel 13:1-39
13 Anak lelaki David, iya nya Absalom, bisi siku adik ti bajik ke benama Tamar. Amnon, ke mega anak lelaki David, jatuh cinta enggau Tamar.
2 Amnon balat tusah ati nyentukka iya nyau sakit ketegal adik iya, Tamar, laban Tamar agi dara, lalu iya enda ulih ngereja nama-nama utai ngagai Tamar.
3 Amnon bisi siku kaban ke benama Jehonadap. Jehonadap nya anak Shimeah, lalu Shimeah nya menyadi David. Jehonadap nya orang ti pintar.
4 Ku Jehonadap madah ngagai Amnon: “O anak raja, nama kebuah tiap pagi nuan tusah ati? Padah meh ngagai aku.” Ku Amnon nyaut iya: “Aku jatuh cinta enggau Tamar, adik indu Absalom, menyadi aku nya.”
5 Ku Jehonadap madah ngagai iya: “Uji nuan gali ba katil nuan lalu ngaga diri sakit. Lebuh apai nuan datai ngabas nuan, padahka iya tu: ‘Apai, asuh adik aku, Tamar, datai ngenahka aku pemakai. Enti iya nyediaka pemakai* nya ba depan aku, aku tentu deka makai nama-nama utai ke dienahka iya ke aku.’”
6 Nyadi, Amnon pan gali lalu ngaga diri sakit. Lebuh raja datai ngabas iya, Amnon pan madah ngagai raja nya: “Apai, asuh adik aku, Tamar, datai kitu lalu ngaga ke aku dua iti kuih* ba depan aku. Aku deka makai nama-nama utai ke dienahka iya.”
7 Udah nya, David ngirumka pesan tu ngagai Tamar ke ba istana: “Alai nuan ngagai rumah menyadi nuan, Amnon, lalu sediaka meh pemakai ke iya.”
8 Nyadi, Tamar pan mansang ngagai rumah Amnon, lalu ba dia iya meda Amnon benung gali. Tamar ngambi adunan tepung, ngenyakka adunan nya, lalu manduk nya ba depan Amnon.
9 Udah nya, Tamar ngambi kuih nya lalu ngenahka nya ngagai Amnon. Tang Amnon enggai makai nya, lalu madahka: “Pansut magang kita!” Nyadi, semua orang pan pansut.
10 Amnon madah ngagai Tamar: “Bai pemakai nya ngagai bilik tinduk, ngambika aku ulih makai nya.” Nyadi, Tamar pan ngambi kuih ke digaga iya lalu mai kuih nya ngagai Amnon ba bilik tinduk iya.
11 Lebuh Tamar ngenahka kuih nya ngagai Amnon, Amnon megai Tamar lalu madahka: “Aram tinduk enggau aku.”
12 Tang Tamar madah ngagai iya: “Anang baka nya! Anang ngemaluka aku, laban utai tu sigi enda patut nyadi ba Israel. Anang ngereja utai ti jai tu.
13 Nyau aku ke malu legi. Dini meh aku ka engkah mua aku tu? Nuan mega deka dikumbai orang beli ba Israel. Manah agi nuan bejaku enggau raja, laban iya tentu deka nyerahka aku ngagai nuan.”
14 Tang Amnon enggai mendingka iya. Ketegal iya kering agi ari Tamar, iya lalu ngerugul Tamar.
15 Udah nya, Amnon balat begedika Tamar. Pemenchi iya besai agi ari pengerindu iya ke Tamar sebedau tu. Nya alai, iya madahka Tamar: “Angkat! Pansut nuan!”
16 Ku Tamar: “Anang muru aku. Enti nuan muru aku, tu teruk agi ari utai ke udah digaga nuan tadi.” Tang Amnon enggai mendingka iya.
17 Amnon lalu ngangauka orang gaji iya lalu madahka: “Bai indu tu pansut, lalu kunchi pintu.”
18 Nyadi, orang gaji nya pan mai Tamar pansut lalu ngunchi pintu. (Maya nya, Tamar ngena jubah ti diias enggau lawa ke semina dikena anak indu raja ke agi dara.)
19 Udah nya, Tamar naburka amau ba atas pala iya lalu nyarikka jubah ti lawa ke dikena iya. Iya ngengkahka kedua-dua jari iya ba pala iya, lalu bejalai sambil nyabak.
20 Abang iya, Absalom, nanya iya: “Kati nya abang nuan, Amnon, ke ngereja utai ti jai tu ngagai nuan? Anang madahka tu ngagai sapa-sapa, laban iya abang nuan. Anang berunding pasal nya agi.” Nya alai, Tamar diau ba rumah Absalom lalu enda begulai enggau orang bukai.
21 Lebuh Raja David ninga semua utai nya, iya pan balat ringat. Tang iya enggai ngemediska ati anak iya, Amnon, laban Amnon nya anak tuai iya, lalu iya sayauka Amnon.
22 Absalom enda nyebut nama-nama utai ngagai Amnon. Iya begedika Amnon laban Amnon udah ngemaluka adik iya, Tamar.
23 Pengudah dua taun, Absalom mai semua anak raja makai besai ba Baal-hasor, semak Efraim. Maya nya, orang benung nyukur bulu bedus iya ba dia.
24 Absalom pan betemu enggau raja lalu madahka: “Apai, aku bisi ngasuh orang nyukur bulu bedus aku. Kati nuan enggau bala pegawai nuan ka enggau aku?”
25 Ku raja nya nyaut: “Enda ibuh pan, anak. Enti semua kami enggau magang, nyau ngenusahka nuan ga.” Taja pan Absalom bebendar mujuk raja, raja agi ga enggai enggau. Tang iya merekatka Absalom.
26 Ku Absalom: “Enti nuan enggai enggau, asuh abang aku ga enggau kami.” Ku raja nya nyaut: “Nama kebuah Amnon mesti enggau nuan deh?”
27 Tang Absalom bebendar mujuk raja. Pengujung iya, raja pan ngemendarka Amnon enggau semua anak raja ke bukai mupuk enggau iya.
28 Udah nya, Absalom madahka pesan tu ngagai orang gaji iya: “Peratika Amnon. Lebuh iya gaga ati maya iya ngirup wain, aku deka madah: ‘Bunuh Amnon!’ lalu kita mesti munuh iya. Anang takut, laban aku tu meh ke ngasuh kita ngereja nya. Kita mesti kuat sereta berani.”
29 Orang gaji Absalom pan ngereja utai ke diasuh iya lalu munuh Amnon. Pengudah utai nya nyadi, semua anak raja pan angkat. Sida nepan baghal* sida lalu ngerarika diri.
30 Lebuh sida agi ba rantau jalai, David nerima berita pasal Absalom ke udah munuh semua anak lelaki raja, lalu nadai siku pan ari sida iya idup.
31 Pengudah ninga nya, raja angkat, nyarikka gari iya, lalu gali ba lantai. Semua pegawai iya ke bediri semak iya mega nyarikka gari sida.
32 Tang, Jehonadap anak Shimeah madahka: “Tuan raja, anang ngumbai sida udah munuh semua anak lelaki nuan. Semina Amnon aja ke dibunuh. Absalom ke ngasuh utai nya nyadi. Iya udah mutuska deka ngereja nya kenyau ari maya Amnon udah ngemaluka menyadi iya, Tamar.
33 Nyadi, anang pechayaka berita ke madahka pasal semua anak lelaki nuan udah mati magang, laban semina Amnon aja ke mati.”
34 Maya nya, Absalom udah ngerarika diri. Udah nya, siku jejaga meda mayuh orang datai ari jalai ke ba tisi gunung.
35 Jehonadap lalu madah ngagai raja: “Tuan raja, peda nuan! Anak nuan udah pulai, baka ke udah dipadahka aku ngagai nuan tadi.”
36 Pengudah iya bejaku munyi nya, bala anak raja pan tama lalu nyabak enggau inggar. Raja enggau semua pegawai iya mega nyabak tusah ati.
37 Absalom ngerarika diri ngagai Talmai anak Amihut, iya nya raja Gesur. Ninting hari, David tusah ati ke pemati anak iya.
38 Pengudah Absalom ngerarika diri ngagai Gesur, iya diau ba dia pengelama tiga taun.
39 Pengujung iya, Raja David nyau ulih nerima pemati Amnon. Iya amat lelengauka Absalom lalu deka betemu enggau iya.
