1. Jehovah meransang kitai ngereja nama?

JEHOVAH seruran nunjukka pengerindu ti meruan belama iya. (Hos. 6:6) Iya mega deka kitai nunjukka pengerindu ti sama. Nengah nabi Mikah, Petara meransang kitai “seruran ngayanka pengerindu.” (Mik. 6:8) Tang sebedau kitai ngereja nya, kitai patut nemu nama reti pengerindu ti meruan belama iya.

2. Nama reti pengerindu ti meruan?

² Nama reti pengerindu ti meruan? Rambai jaku nya bisi ayan 230 kali ba salin Bup Kudus New World Translation of the Holy Scriptures. Enti seseiku orang bisi pengerindu ti meruan, pengerindu iya ngagai orang bukai enda nemu abis lalu iya deka mengkang tetap ati ngagai sida. Rambai jaku “pengerindu ti meruan” suah dikena lebuh nunjukka pengerindu Petara ke mensia. Pia mega, pengerindu ke baka tu bisi diayanka kitai ngagai pangan diri. Jehovah nya teladan ti pemadu badas ngayanka pengerindu ti meruan. Ba artikel tu, kitai deka berandauka baka ni Jehovah ngayanka pengerindu ti meruan ngagai mensia. Lalu ba artikel pengudah tu, kitai deka bejuraika baka ni kitai ulih neladan Jehovah ngayanka pengerindu ti meruan ngagai pangan diri.

3. Nama dipadah Jehovah ngagai Moses pasal Diri Empu?

³ Enda lama pengudah orang Israel pansut ari menua Ejip, Jehovah madah ngagai Moses pasal nama sereta pemanah  Iya. Ku Jehovah: ‘Aku tu Jehovah Petara ti kasih sereta siru, lubah ringat, sereta mandangka penetap ati enggau pengerindu ti besai. Aku deka tetap rinduka beribu-ribu serak lalu ngampun penyai enggau dosa.’ (P-sut. 34:6, 7) Ba ayat tu, Jehovah madah ngagai Moses utai ti ngalitka ati pasal pengerindu Iya. Nama nya?

4-5. (a) Nama dipadah Jehovah pasal Diri Empu? (b) Nama tanya ke deka dikerandauka kitai?

⁴ Jehovah ukai semina madahka Diri bisi pengerindu ti meruan, tang Iya mega madahka Diri ngembuan “pengerindu ti besai.” Ayat Bup Kudus ke bukai mega bisi nyebut pasal pemesai pengerindu Jehovah ti meruan. * Tiap ayat tu semina dituju ngagai Jehovah, ukai mensia. Endaka tu ngalitka ati, laban Jehovah seruran madahka Diri ngembuan pengerindu ti besai? Nya alai, kitai ulih meda Jehovah amat ngemeratka pengerindu ti meruan. Raja David madahka: ‘O Jehovah, pengerindu Nuan ti meruan belama iya endang tinggi agi ari langit . . . Naka meh pemadas pengerindu Nuan ti meruan belama iya, O Petara! Kami belindung di baruh sayap Nuan.’ (Mas. 36:5, 7) Baka David, kati pengerindu Petara ti meruan mega berega ba kitai?

⁵ Ngambika kitai ulih meretika agi reti pengerindu ti meruan, kitai deka berandauka dua iti tanya: (1) Ngagai sapa Jehovah nunjukka pengerindu ti meruan? Lalu (2) nama penguntung ke diulih kitai lebuh Jehovah ngayanka pengerindu ti meruan?

6. Ngagai sapa Jehovah nunjukka pengerindu ti meruan?

⁶ Jehovah nunjukka pengerindu ti meruan ngagai sapa? Bup Kudus madahka kitai ulih rinduka mayuh utai, baka “pengawa umai,” ‘wain enggau pemakai ti manah,’ “penemu,” “penemu-dalam” sereta mayuh agi. (2 Ban. 26:10; J-lam. 12:1; 21:17; 29:3) Pengerindu ti meruan ukai dituju ngagai utai ti dikerinduka kitai. Tang iya semina dituju ngagai orang. Taja pia, Jehovah enda nunjukka pengerindu tu ngagai sebarang orang. Iya nunjukka pengerindu tu ngagai orang ke bisi kaul ti rapat enggau Iya. Jehovah tetap ati ngagai orang ke nyadi pangan Iya. Iya deka meri sida pengidup ti manah lalu enda badu rinduka sida.

7. Baka ni Jehovah nunjukka pengerindu Iya ngagai semua orang?

⁷ Jehovah udah nunjukka pengerindu Iya ngagai semua orang. Ku Jesus madah ngagai  seiku lelaki ke benama Nikodimus: ‘Petara balat rinduka dunya [mensia], nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’—Jhn. 3:1, 16; Mat. 5:44, 45.

8-9. (a) Nama kebuah Jehovah nunjukka pengerindu Iya ti meruan ngagai penyembah Iya? (b) Nama deka dipelajarka kitai pengudah tu?

⁸ Baka ke disebut tadi, Jehovah semina nunjukka pengerindu ti meruan ngagai orang ke bisi kaul ti rapat enggau Iya, iya nya sida ke nyembah Iya. Kitai ulih meretika pekara tu lebuh kitai meda utai ke ditulis Raja David enggau nabi Daniel. Ambika chunto, ku David: “Awakka Nuan seruran rinduka orang ke nemu Nuan.” (Mas. 36:10) Iya mega madahka: ‘Pengerindu Jehovah deka meruan belama iya ba orang ke nangika Iya.’ (Mas. 103:17) Lalu ku Daniel: ‘Petara Jehovah, Nuan ngayanka pengerindu ti meruan ngagai orang ke rinduka Nuan sereta ngereja utai ti diasuh Nuan.’ (Dan. 9:4) Nitihka semua ayat tu, Jehovah ngayanka pengerindu ti meruan ngagai penyembah Iya laban sida nemu Iya, nangika Iya, rinduka Iya, sereta ngereja utai ti diasuh Iya. Jehovah semina ngayanka pengerindu ti meruan ngagai sida ke nyembah Iya enggau chara ti betul.

⁹ Sebedau kitai nyembah Jehovah, kitai udah nerima pengerindu ke diayanka Iya ngagai semua mensia. (Mas. 104:14) Tang pengudah kitai nyadi penyembah Iya, kitai mega nerima penguntung ari pengerindu Jehovah ti meruan. Jehovah ngasuh kitai andal, “pengerindu Aku ke nuan enda nemu abis.” (Isa. 54:10) David mega ngasaika pengerindu tu lebuh iya madah, “Jehovah deka ngintu nembiak Iya ke tetap ati enggau chara ti istimewa.” (Mas. 4:3, NWT) Nya alai, nama deka digaga kitai pengudah nerima pengerindu Jehovah? Ku pemasmur madahka: ‘Awakka orang ke bepenemu-dalam berundingka utai tu. Awakka sida berundingka pengerindu Jehovah ti meruan belama iya.’ (Mas. 107:43) Jaku lalau ti manah tu datai ari Jehovah. Nya alai, aram meh kitai berandauka tiga iti chara Jehovah ngayanka pengerindu ti meruan, lalu nama penguntung ke diulih kitai lebuh Jehovah ngayanka pengerindu ti meruan.

10. Baka ni pengerindu Jehovah ti meruan mai penguntung ngagai kitai? (Masmur 31:7)

¹⁰ Pengerindu Jehovah meruan belama iya. Ba Masmur 136, kitai ulih macha pasal pengerindu Petara ti meruan 26 kali. Ba ayat keterubah, kitai macha: ‘Beri terima kasih ngagai Jehovah, laban Iya endang badas. Laban pengerindu Iya meruan belama iya.’ (Mas. 136:1) Ari ayat 1 nyentuk ngagai ayat 26, kitai ulih tetemuka rambai jaku “pengerindu Iya meruan belama iya” diulang mayuh kali. Lebuh kitai macha masmur tu, kitai berasai alit ati laban Jehovah nunjukka pengerindu Iya enggau mayuh chara sereta enda ngetu nunjukka nya. Lebuh rambai jaku “pengerindu Iya meruan belama iya,” diulang mayuh kali, tu ngasuh kitai andal pengerindu Jehovah ngagai bala nembiak Iya enda berubah. Kitai tentu berasai diperansang lebuh nemu Jehovah enda ngetu rinduka bala nembiak Iya, indah ba maya ti tusah. Baka ni tu nulung kitai? Lebuh kitai nemu Jehovah seruran enggau kitai, kitai bulih pengelantang sereta pengering ngambika ulih betan napi penusah lalu terus nyembah Iya.—Bacha Masmur 31:7.

11. Nitihka Masmur 86:5, nama meransang Jehovah rindu ngampun?

¹¹ Pengerindu Jehovah ti meruan meransang Iya rindu ngampun. Lebuh Jehovah meda orang ke bedosa nesal ati lalu badu agi ngereja penyalah, pengerindu ti meruan meransang Jehovah ngampunka orang nya. Peratika utai ke dipadahka David pasal Jehovah: “Iya enda ngukum kitai nitihka dosa kitai tauka malas kitai nitihka penyai kitai.” (Mas. 103:8-11) David empu kala ngasaika asai besalah, lalu tu balat ngachau iya. Tang David mega nemu, Jehovah sedia deka “ngampun.” Nama meransang Jehovah deka ngampunka orang bukai? Saut iya bisi ba Masmur 86:5. (Bacha.) Baka ke disebut David ba sampi iya, Jehovah sedia deka ngampun laban Iya bisi pengerindu ti meruan ngagai sida ke minta pengampun ari Iya.

12-13. Nama ulih nulung kitai enti kitai agi berasai besalah enggau penyalah ke udah digaga kitai suba?

¹² Lebuh kitai bedosa, asai besalah ulih  nulung kitai nesal ati, minta ampun lalu ngaga ubah. Taja pia, sekeda orang agi berasai besalah taja pan udah nesal ati. Sida ngumbai Jehovah agi enggai ngampunka sida. Enti nuan mega benung belaban enggau asai ati ke baka nya, belematika pengerindu Jehovah ti meruan deka nulung nuan badu agi berasai besalah.

¹³ Baka ni tu nulung kitai? Taja pan kitai enda sempurna, kitai ulih gaga ati nyembah Jehovah enggau ati ti beresi. Kitai ulih ngereja nya laban “darah Anak Iya, Jesus, nuchi kitai ari semua dosa.” (1 Jhn. 1:7) Lebuh nuan berasai asa ati ketegal pengelemi diri, kingatka meh Jehovah keran deka ngampunka nuan enti nuan udah nesal ati. Peratika utai ti dipadah David pasal pengerindu ti meruan enggau chara Jehovah ngampunka kitai. David nulis: “Baka langit ti tinggi ari atas dunya, baka nya meh pemesai pengerindu Iya ke orang ke nangika Iya. Baka timur ti jauh ari barat, baka nya meh penyauh Iya muai dosa kitai.” (Mas. 103:11, 12) Au, Jehovah endang “jampat ngampun.”—Isa. 55:7.

14. Baka ni David ngambarka pengerindu Petara ti meruan ulih nyaga kitai?

¹⁴ Pengerindu Jehovah ti meruan nyaga kitai ba pengarap. Lebuh David besampi ngagai Jehovah, iya madah: ‘Nuan nyadi endur alai aku belalai. Nuan deka ngelepaska aku ari penusah. Aku belagu enggau nyawa ti inggar muji pengelepas ti datai ari Nuan, laban Nuan nyaga aku . . . Orang ke arapka Jehovah deka dijaga ulih pengerindu Iya ti meruan belama iya.’ (Mas. 32:7, 10) Maya jeman Bup Kudus kelia, dinding kuta ulih ngelindung rayat ari serang bala munsuh. Baka nya mega, pengerindu Jehovah ti meruan ulih nyaga kitai ari sebarang utai ke tau ngerusak kaul kitai enggau Iya. Nambahka nya, pengerindu Jehovah ti meruan meransang Iya “ngiring kitai semak ngagai Iya.”—Jer. 31:3, NWT.

15. Baka ni pengerindu Jehovah ti meruan tau disemaka enggau endur belindung?

¹⁵ David mega nyemaka chara Petara nyaga nembiak Iya enggau endur belindung. David nulis: ‘Aku belindung ba Petara ti rinduka aku.’ David mega bisi madahka Jehovah: “Iya nunjukka pengerindu ti meruan ngagai aku. Iya kuta aku, endur aku belalai, sereta endur aku belindung. Iya terabai aku enggau pengelepas aku.” (Mas. 59:17; 144:2, NWT) Nama kebuah David nyemaka pengerindu Jehovah ti meruan enggau endur belindung? Enda ngira dini endur kitai diau, seagi-agi kitai tetap ati nyembah Jehovah, Iya tentu deka ngelindung kitai ngambika kaul kitai enggau Iya seruran tegap. Masmur 91 ulih nulung kitai andal agi ke utai tu. Pemasmur nya nulis: “Nuan endang penyaga enggau pengelindung aku.” (Mas. 91:1-3, 9, 14) Moses ngena leka jaku “rumah” kena ngambarka Jehovah ngelindung nembiak Iya. (Mas. 90:1) Ba pengujung pengidup iya, Moses nyebut pasal siti agi utai ti negu ati. Iya nulis: “Ari kelia menya, Petara endang nyadi endur nuan belindung. Lengan Iya ti meruan nyadika sukung nuan.” (U-dat. 33:27, NWT) Nama ulih ditemu kitai pasal Jehovah ari rambai jaku “lengan Iya ti meruan nyadika sukung nuan”?

16. Baka ni Jehovah nulung kitai? (Masmur 136:23)

¹⁶ Kitai ulih berasai lantang lebuh kitai andal Jehovah deka nyaga kitai. Tang kekadang kitai engka berasai asa ati nyentukka kitai enda ulih muai asai nya. Lebuh nya nyadi, baka ni Jehovah nulung kitai? (Bacha Masmur 136:23.) Iya deka ngena lengan Iya nulung kitai angkat baru ngambika enda agi berasai asa ati. (Mas. 28:9; 94:18) Baka ni tu nulung kitai? Kitai ulih seruran bepanggai ba  Jehovah. Lalu kitai ulih ingatka dua iti pekara tu: (1) enda ngira ba dini alai kitai diau, kitai nemu Jehovah deka nyaga kitai sereta (2) Jehovah amat ibuhka kitai.

17. Nama ulih dikearapka kitai ari pengerindu Petara ti meruan? (Masmur 33:18-22)

¹⁷ Baka ke udah dipelajarka kitai, Jehovah tentu deka nulung kitai tiap kali kitai napi penguji. Tu ketegal Jehovah deka nulung kitai tetap ati ngagai Iya. (2 Kor. 4:7-9) Nabi Jeremiah nulis: “Ketegal pengerindu Jehovah ti meruan, kitai enda dipunaska laban pengasih Iya enda nemu abis.” (Sab. 3:22, NWT) Kitai ulih arapka Jehovah deka terus ngayanka pengerindu ti meruan laban Bup Kudus madahka: ‘Jehovah ngemataka semua orang ke ngasika Iya, ke manggaika diri ba pengerindu Iya ti meruan belama iya.’—Bacha Masmur 33:18-22.

18-19. (a) Nama utai ke patut dikingatka kitai? (b) Nama deka dikerandauka kitai ba artikel pengudah tu?

¹⁸ Nama utai ke patut dikingatka kitai? Sebedau kitai nyadi penyembah Jehovah, kitai ngasaika pengerindu Petara ti udah diayanka Iya ngagai semua mensia. Tang lebuh kitai nyadi penyembah Iya, kitai mega nerima penguntung ari pengerindu Iya ti meruan. Pengerindu nya meransang Jehovah nyaga kitai. Iya deka seruran semak ngagai kitai, lalu ngamatka semua semaya Iya jemah ila. Iya deka kitai nyadi pangan Iya belama iya. (Mas. 46:1, 2, 7) Enda ngira nama penanggul ke ditapi kitai, Jehovah deka meri kitai pengering ngambika kitai ulih mengkang tetap ati ngagai Iya!

¹⁹ Kitai udah belajar baka ni Jehovah nunjukka pengerindu ti meruan ngagai bala nembiak Iya. Tang Jehovah mega deka kitai ngayanka pengerindu nya ngagai pangan diri. Baka ni kitai ulih ngereja nya? Kitai deka bejuraika utai tu ba artikel ke nangkanka tu.