1-2. (a) Nama kebuah laki bini ke baru jadi patut bepanggai ba Jehovah? (Masmur 37:3, 4) (b) Nama deka dipejuraika kitai ba artikel tu?

KATI nuan deka kawin enda lama da agi, tauka nuan baru udah kawin? Enti pia, nuan tentu gaga ati ulih idup begulai enggau orang ti amat dikesayauka nuan. Endang amat, laki bini tentu deka bisi penanggul lalu seduai patut ngaga pemutus ti berat. Pengelantang seduai ba tikah bepanggai ba chara seduai mutarka penanggul sereta pemutus ke digaga seduai. Enti seduai bepanggai ba Jehovah, seduai tentu deka ngaga pemutus ti manah. Pia mega, tikah seduai deka nyadi tegap lalu seduai deka gaga agi ati. Tang enti seduai enda nitihka jaku lalau Petara, seduai deka napi penanggul ti ulih ngachau tikah seduai lalu ngujungka seduai enda gaga ati.—Bacha Masmur 37:3, 4.

² Taja pan artikel tu ditujuka ngagai orang ke baru jadi, tang artikel tu mega deka berandauka penanggul ke ditapi semua laki bini. Kitai deka bejuraika utai ke ulih dipelajarka kitai ari teladan sida ke tetap ati ba Bup Kudus. Teladan sida deka ngajar kitai utai ke ulih dikena ba pengidup, nyengkaum  ba pengidup melaki-bini. Kitai mega deka belajar ari sekeda peneleba laki bini kemayaharitu.

3-4. Nama penanggul ke ditapi laki bini ke baru jadi?

³ Sekeda orang engka meransang sida ke baru jadi ngembuan pengidup baka orang bukai. Ambika chunto, apai indai sereta kaban belayan engka ngansak sida jampat bisi anak. Tauka bala bakih sereta diri sebilik ke bukai engka ngasuh sida meli rumah sereta ngemenuhka rumah enggau utai ti ulih ngasuh pengidup berasai nyamai.

⁴ Enti enda bejimat, sida ke baru jadi engka ngaga pemutus ti tau ngujungka sida bisi mayuh utang. Ketegal nya, seduai iya engka patut gawa mayuh agi jam kena mayar semua utang nya. Nya deka ngasuh seduai iya nadai chukup awak belajarka Bup Kudus kediri empu, enggau diri sebilik sereta enggau pengawa nginjil. Sida mega engka tusah deka datai begempuru laban patut gawa overtime kena ngulihka mayuh agi duit tauka takut dibuai kereja. Pengujung iya, seduai iya engka lenyau peluang deka gawa mayuh agi ke Jehovah.

5. Nama ulih dipelajarka nuan ari utai ke nyadi ba Klaus enggau Marisa?

⁵ Mayuh peneleba nunjukka enti kitai bebendar ngulihka mayuh reta tengkira, kitai enda gaga ati. Peratika peneleba Klaus enggau Marisa. * Lebuh seduai iya baru jadi, seduai iya gawa apus hari ngambika ulih ngembuan pengidup ti nyamai. Taja pia, seduai iya enda gaga ati. Ku Klaus: “Pengidup kami duai chukup nyamai. Tang kami duai nadai juluk ati ka gawa mayuh agi ke Jehovah. Kebendar iya, pengidup kami duai mayuh stres.” Kati nuan mega ngasaika utai ti sama? Taja pan nuan bebendar gawa, tang nuan agi enda puas ati. Enti utai tu nyadi ba nuan, anang meh asa ati. Nuan ulih ngaga ubah ti patut lebuh belajar ari pengidup orang bukai. Keterubah, aram kitai beratika utai ti ulih dipelajar sida ke laki ari teladan Raja Jehosapat.

6. Baka ni Raja Jehosapat nitihka prinsip ba Jaku Dalam 3:5, 6 lebuh raban soldadu ti besai deka nyerang rayat iya?

⁶ Kita ke laki, kati nuan kekadang ngasaika diri bisi mayuh tanggung pengawa? Enti pia, nuan ulih belajar ari teladan Raja Jehosapat. Ketegal iya raja, Jehosapat bisi tanggung pengawa nyaga pengelikun rayat iya. Baka ni iya bejalaika tanggung pengawa ti berat nya? Iya nirika mayuh kuta ba nengeri Judah lalu ngumpul seraban besai soldadu ke penyampau iya lebih ari 1,160,000 iku orang. (2 Ban. 17:12-19) Udah nya, Jehosapat napi penanggul ti besai. Seraban besai soldadu ari bansa Amon, Moap enggau orang ari bukit menua Seir  deka nyerang Jehosapat sebilik sereta rayat iya. (2 Ban. 20:1, 2) Nama digaga Jehosapat? Iya minta tulung sereta pengering ari Jehovah. Tu sejalai enggau jaku lalau ke bisi ba Jaku Dalam 3:5, 6. (Bacha.) Sampi Jehosapat ke bisi ditulis ba 2 Bansa Israel 20:5-12 nunjukka iya bepanggai ba Jehovah. Baka ni Jehovah nyaut sampi Jehosapat?

7. Baka ni Jehovah nyaut sampi Jehosapat?

⁷ Jehovah nyaut sampi Jehosapat nengah seiku orang Lewi ke benama Jahasil. Jehovah madah: ‘Belatur aja, lalu diau jenuh nengkilaka Jehovah menang beperang ngarika kita.’ (2 Ban. 20:13-17) Nya chara beperang ti nyelai! Taja pia, iring nya ukai datai ari mensia tang datai ari Jehovah. Ketegal Jehosapat andalka Jehovah, iya ngereja utai ke diasuh Jehovah. Lebuh iya enggau bala rayat mansang ngagai endur beperang, Jehosapat enda ngengkahka bala soldadu ba mua. Tang iya ngengkahka bala lelaki ke enda besenyata, ke muji Jehovah nengah lagu. Jehovah ngamatka semaya Iya ngagai Jehosapat lalu ngalahka bala munsuh nya.—2 Ban. 20:18-23.

8. Nama ulih dipelajarka bala laki ari teladan Jehosapat?

⁸ Kita ke laki, belajar meh ari teladan Jehosapat. Nuan bisi tanggung pengawa nyaga ruang bilik nuan. Nya alai, nuan bebendar nyaga sereta ngintu ruang bilik nuan. Lebuh napi penanggul, nuan engka ngasaika diri ulih mutarka nya nitihka chara diri empu. Tang seliahka runding ke baka nya. Lebuh nuan kediri, besampi meh ngagai Jehovah minta tulung. Nambahka nya, nuan mega ulih besampi enggau bini nuan. Giga meh iring ari Jehovah nengah pengawa belajarka Bup Kudus sereta litaricha ti udah disediaka gerempung Jehovah. Udah nya, titihka meh jaku lalau ke udah ditemu nuan. Orang bukai engka enda setuju enggau pemutus ke digaga nuan bepelasarka prinsip Bup Kudus. Indah sida engka madahka pemutus ti digaga nuan nya beli. Sida mega engka madahka duit meh chara ti pemadu manah kena nyaga ruang bilik nuan. Tang kingatka teladan Jehosapat. Iya pechayaka Jehovah lalu nunjukka nya nengah ulah iya. Ketegal iya tetap ati, Jehovah enda ninggalka iya. Jehovah mega tentu enda ninggalka nuan. (Mas. 37:28; Heb. 13:5) Nama ulih digaga sida ke laki bini ngambika ulih ngembuan pengidup ti ngelantangka ati?

9. Nama ditemu kitai pasal nabi Isaiah enggau bini iya?

⁹ Utai ti pemadu beguna ba nabi Isaiah enggau bini iya, iya nya ngenuluka pengawa Jehovah. Isaiah seiku nabi, lalu bini iya mega engka bisi ngereja pengawa benabi laban iya dikumbai “nabi indu.” (Isa. 8:1-4, NWT) Seduai iya ngenuluka sembah ngagai Jehovah ba pengidup seduai iya. Endaka sida teladan ti manah ngagai laki bini kemayaharitu?

10. Baka ni belajarka jaku benabi ba Bup Kudus ulih nulung laki bini keran agi deka gawa ke Jehovah?

¹⁰ Laki bini kemayaharitu ulih neladan Isaiah enggau bini iya. Baka ni? Enggau naka ulih ngenuluka Jehovah ba pengidup seduai. Seduai ulih negapka pengarap ngagai Jehovah nengah belajarka jaku benabi begulai, lalu meda baka ni jaku benabi nya dikeamatka. * (Tit. 1:2) Seduai ulih berundingka utai ke ulih digaga kena ngamatka sekeda jaku benabi ba Bup Kudus. Ambika chunto,  seduai ulih berundingka baka ni ulih ngamatka jaku Jesus pasal Berita Manah ti deka dikerembaika ngagai serata dunya sebedau pengujung dunya datai. (Mat. 24:14) Majak agi seduai pechaya jaku benabi ba Bup Kudus deka dikeamatka, keran agi seduai deka gawa mayuh agi ke Jehovah.

11. Nama ulih digaga Prisila enggau Akuila, lalu nama kebuah?

¹¹ Laki bini ke biak ulih belajar ari teladan Prisila enggau Akuila. Seduai iya laki bini ke bansa orang Judah ti diau di Rome. Sida udah ninga Berita Manah pasal Jesus lalu nyadi orang Kristian. Seduai iya tentu puas ati ba pengidup. Tang pengidup seduai iya berubah enggau ngenyit lebuh Raja Besai Rome, iya nya Klaudius, muru semua orang Judah ari Rome. Peratika utai ke nyadi ba Akuila enggau Prisila pengudah nya. Seduai iya patut pindah ngagai endur ti baru, ngiga rumah sereta numbuhka bisnis ngaga langkau kain. Kati ubah ke nyadi tu nagang seduai iya ari ngenuluka Perintah Petara? Perundingka tu. Ba endur baru sida di Korint, Akuila enggau Prisila berengkah nulung eklisia ba dia, sereta besaup enggau rasul Paul ngeringka bala menyadi ba dia. Udah nya seduai iya pindah ngagai endur bukai ke begunaka mayuh agi penginjil. (SKR. 18:18-21; Rom. 16:3-5) Pengidup seduai iya tentu amat kisuk sereta gaga ati!

12. Nama kebuah laki bini patut netapka juluk ati gawa ke Jehovah?

¹² Laki bini kemayaharitu ulih neladan Prisila enggau Akuila lebuh sida ngenuluka Perintah Petara ba pengidup. Maya ti pemadu manah kena seduai iya berandauka juluk ati, iya nya sebedau jadi. Lebuh seduai iya netapka juluk ati gawa ke Jehovah sereta bebendar deka nyapai juluk ati nya, seduai iya bisi mayuh agi peluang meda chara Jehovah nulung ba pengidup. (P-jar. 4:9, 12) Peratika peneleba Russell enggau Elizabeth. Russell madahka: “Sebedau kami duai jadi, kami berandau enggau silik pasal juluk ati kami gawa ke Jehovah.” Elizabeth mega madahka: “Kami berandauka tu ngambika enti kami patut ngaga sekeda pemutus ila, semua  pemutus nya enda nagang kami ari nyapai juluk ati kami.” Russell enggau Elizabeth ulih pindah ngagai Micronesia, endur ti begunaka mayuh agi penginjil.

13. Nitihka Masmur 28:7, nama deka nyadi lebuh kitai bepanggai ba Jehovah?

¹³ Baka Russell enggau Elizabeth, mayuh laki bini kemayaharitu idup enggau pengumbas iya. Ketegal nya, sida ulih ngereja mayuh agi ba pengawa nginjil sereta ngajar Bup Kudus. Lebuh laki bini netapka juluk ati gawa mayuh agi ke Jehovah sereta bebendar nyapai nya, sida deka bulih asil ti manah. Seduai iya deka meda chara Jehovah nyaga seduai iya, lalu nya deka ngasuh seduai iya andal agi ngagai Jehovah. Pengujung iya, seduai iya deka gaga agi ati.—Bacha Masmur 28:7.

14. Baka ni rasul Peter enggau bini iya ngayanka diri pechayaka semaya ba Matthew 6:25, 31-34?

¹⁴ Laki bini kemayaharitu mega ulih belajar ari teladan rasul Peter enggau bini iya. Dalam urung enam bulan nyentukka setaun pengudah rasul Peter terubah kali betemu enggau Jesus, iya patut ngaga siti pemutus ti besai. Peter gawa nyadi orang berikan. Ari pengawa tu, iya ulih ngintu ruang bilik iya. Lebuh Jesus mai Peter nitihka iya, Peter patut berunding pasal ruang bilik iya. (Luk. 5:1-11) Peter milih deka nitihka Jesus ba pengawa nginjil. Lalu kitai bisi kebuah pechaya bini Peter nyukung pemutus laki iya. Bup Kudus bisi nunjukka dalam siti timpuh bini Peter bisi enggau ba pengawa iya, lalu tu nyadi pengudah Jesus diangkatka idup baru. (1 Kor. 9:5) Ketegal bini iya udah nyadi teladan ti manah, Peter enda kakang ati meri jaku lalau ngagai laki bini. (1 Pet. 3:1-7) Endang amat, Peter enggau bini iya pechayaka semaya Jehovah. Enti seduai iya ngenuluka Perintah Petara ba pengidup, Jehovah tentu deka nyaga seduai iya.—Bacha Matthew 6:25, 31-34.

15. Nama ulih dipelajarka nuan ari Tiago enggau Esther?

¹⁵ Enti seduai udah lama kawin, baka ni seduai ulih ngemansangka pengingin deka ngereja mayuh agi ba pengawa nginjil? Belajar meh ari peneleba laki bini Kristian ke bukai. Ambika chunto, nuan ulih macha “Cherita Pengidup.” Peratika peneleba Tiago enggau Esther, sepasang laki bini ari Brazil. Artikel ke baka tu udah nulung seduai iya ngemansangka pengingin deka pindah ngagai endur ke begunaka mayuh agi penginjil. Tiago madahka: “Lebuh kami duai macha pasal chara Jehovah nulung nembiak Iya kemayaharitu, kami mega deka ngasaika iring sereta tulung ari Iya.” Nyau kelama, seduai iya pindah ngagai Paraguay. Ba dia, seduai iya nulung ba raban bansa jaku Portugis kenyau ari taun 2014. Ku Esther madah: “Kami duai rinduka ayat ba Epesus 3:20. Mayuh kali kami duai ngasaika jaku tu dikeamatka ba pengidup kami.” Ba surat Paul ke dituju ngagai eklisia ba Epesus, Paul besemaya Jehovah deka meri mayuh agi ari utai ke dipinta kitai. Semaya tu endang amat!

16. Lebuh berundingka pasal juluk ati ba pengidup, laki bini ke biak ulih ngiga lalau ari sapa?

¹⁶ Laki bini ke biak kemayaharitu ulih belajar ari menyadi Kristian ke udah bepanggai ba Jehovah. Sekeda laki bini engka udah betaun-taun gawa penuh jam ke Jehovah. Nya alai, pinta meh lalau ari sida lebuh berundingka pasal juluk ati ba pengidup. Tu siti chara nuan ulih nunjukka diri arapka Jehovah. (J-lam. 22:17, 19) Kelimpah ari nya, bala tuai gempuru mega ulih nulung laki bini  ke biak netapka juluk ati gawa ke Jehovah sereta nyapai nya.

17. Nama nyadi ngagai Klaus enggau Marisa, lalu nama utai ke ulih dipelajarka kitai ari seduai iya?

¹⁷ Kitai engka udah ngaga pemutus deka gawa mayuh agi ke Jehovah. Tang kekadang, kitai engka enda nerima pengawa ti dikinginka kitai. Peratika utai ke nyadi ba Klaus enggau Marisa, ke disebut ba pun tadi. Pengudah tiga taun seduai iya jadi, seduai iya pindah lalu gawa sukarela ba pengawa nirika bengunan di pampang opis Finland. Taja pia, seduai iya enda ulih diau ba dia lebih ari enam bulan. Ketegal nya, seduai iya berasai asa ati. Tang enda lama udah nya, seduai iya dikangau enggau siti kus belajarka bansa jaku Arab. Diatu, seduai iya amat gaga ati ulih nginjil ba menua ti ngena bansa jaku Arab. Lebuh Marisa ngenang baru utai ke udah nyadi, iya madah: “Kebendar iya, aku berasai takut deka ngereja utai ke enda kala digaga sereta bepanggai ba Jehovah enggau pengabis ati. Tang, aku udah meda chara Jehovah nulung kami ngena chara ti enda dijangka kami duai. Pengudah aku ngasaika nya, pengarap aku ngagai Jehovah majak tegap.” Ari peneleba tu, kitai mega ulih andal Jehovah deka seruran merekatka kitai enti kitai bepanggai ba Iya enggau pengabis ati.

18. Nama ulih nulung laki bini terus bepanggai ba Jehovah?

¹⁸ Pengawa melaki-bini nya siti pemeri ari Jehovah. (Mat. 19:5, 6) Iya deka laki bini gaga ati enggau pemeri tu. (J-lam. 5:18) Laki bini ke biak, kati seduai beterima kasihka pemeri ti udah diberi Jehovah ngagai seduai? Enti pia, tunjukka nya ari pemutus ke digaga seduai. Besampi meh ngagai Jehovah. Giga meh prinsip Bup Kudus ke ngena ba seduai lalu titihka jaku lalau nya. Enti seduai ngenuluka Jehovah ba tikah seduai, seduai tentu deka gaga ati!