Ombeibela ya tuurunga. Ku nao, ndino ove mo yenene okukara nOmbeibela nokuilesa. Nu indu tji wa toorora Ombeibela ndja torokwa nawa, ove mo yenene okukara nongamburiro kutja imbi mbi mo lese vi ri otja komatjangwa inga omatenga. * Nu hapo omena raye Ombeibela tji ya tuurunga momuano omuhimise nao nandarire kehi yomakurupiro, omapirukiro, nozongondjero nḓa tjitwa okurundurura ombuze yayo? Hapo omena raye embo ndo tji ri ri embo rapeke?

Ovahongwa ovengi vOmbeibela ve ya koumune umwe tjimuna imbwi womuapostele Paulus ngwa tja: “Omatjangwa aehe ya tjangwa nombatero yOmbepo yaNdjambi.” (2 Timoteus 3:16) Owo ve kambura kutja Ombeibela ya tuurunga, mena rokutja oro Embo ra Mukuru rapeke nu eye we ritjevera nga ku ndino. Faizal, ngwa tamuna rukuru morupa orutenga, korusenina wa tya okukonḓonona Ombeibela omuini. Imbi mbya muna vye mu kumisa. Eye wa kamuna kutja oviṋa ovingi mbi hongwa mozongamburiro zoposyo kavi ri mOmbeibela. Kombanda yanao, eye wa ṱunwa i yondando ya Mukuru kombanda yehi otja tji ya raisiwa mEmbo re.

Eye wa tja: “Ami nai mbi nongamburiro kutja Ombeibela ndji mbi nayo otjiyandjewa okuza ku Mukuru. Ndoovazu Mukuru wa yenena okuungura evaverwa, okutja eye u nomasa wokutupa embo re Ombeibela nokuritjevera. Tji tu hi nokuyakura nao okutja matu tja Mukuru ke nomasa. Owami uṋe okuhina okukambura kutja Mukuru Omunamasaaehe?”—Jesaja 40:8.