Sulat Halin sa Mexico

“Palangga Bala Kami ni Jehova Bisan Indian Kami?”

SI Melesio, nga nagahambal sing O’dam, nagadulhog kon kaisa halin sa kabukiran para mangita sing obra. Nagatambong sia sa Cristiano nga mga pagtilipon kag nagadala sing mga balasahon parte sa Biblia kon magpauli sia para ipabasa sa iban. Nangabay sia nga kuntani may magkadto sa ila para tudluan pa gid sila parte sa Biblia.

Ang O’dam isa ka tribo sa kabukiran sang Sierra sa aminhan kag sentro nga bahin sang Mexico. Mga 240 kilometros ini halin sa pinakamalapit nga kongregasyon sang mga Saksi ni Jehova. Gani, nagdesisyon kami nga kadtuan sila.

Nangita kami sing salakyan, mga tolda, tululugan, kag pagkaon kag gasolina para sa tatlo ka adlaw. Mga alas kuatro sang aga kami naghalin sa siudad sang Durango, kag nagbiyahe sing walo ka oras pataklad sa yab-ukon nga dalan. Sa punta sini nga dalan amo ang alagyan pakadto sa mga O’dam. Pag-abot didto, kitaon na ang madalom nga pil-as kag ang isa pa ka bukid.

Ginbilin namon ang salakyan sa ranchito, ang tawag nila sa naligwin nga komunidad. Ginbitbit namon ang amon mga dala kag tatlo ka oras nga nagdulhog sa pil-as. Pag-abot sa ubos, nagdabok kami para indi magpalapit ang talunon nga mga sapat. Bulosbulos kami tulog sang tig-tatlo ka oras para may magsugnod sang dabok.

Temprano pa pagkaaga, nagtaklad kami liwat. Madamo ang banas, gani kapila kami magtalang. Ang isa namon ka upod kabalo gawa maghambal sing O’dam, gani nakaistorya kami sing malip-ot lang parte sa Biblia sa mga balay nga naagyan namon. Ginsugiran kami sang mga tawo nga sa Los Arenales, ang lugar nga kadtuan namon, may mga nagasiling nga Saksi ni Jehova sila kag nagatipon sila kag nagatuon sing Biblia. Nakibot kami, pero nalipay sa sini nga balita.

May mga lap-ok na ang amon tiil sang nag-abot kami sa Los Arenales. Malaka diri ang pamalay nga human sa tisa kag karton ang atop. Wala  sing eskwelahan kag koryente. Bangod layolayo ang ila lugar, pigado sila katama kag nagamantenir sing binukbok nga mais nga ginhimo nga daw tinapay, kag kon ano lang ang ara. Nakilala namon si Melesio. Niwangon sia kag nalipay gid sia sang makita kami. Ginpadayon niya kami sa ila gamay nga balay kag ginsugiran kami nga kada adlaw nagapangamuyo sia kay Jehova nga magpadala sang Iya mga Saksi para tudluan sa Biblia ang iya pamilya kag ang iban pa nga O’dam. Indi niya kuno masabat ang tanan nila nga pamangkot.

Nagahimo sing espiritismo ang mga O’dam. Ginahimo nila nga anting-anting ang bulbol kag tul-an sang agila, ginasimba ang kinaugali, kag nahadlok sila sa mga shaman (ang tawag sa ila espiritista), nga nagahingalit sa ila. Suno kay Melesio, sang nagpasiudad sia natun-an niya nga si Jehova ang matuod nga Dios, gani ginpangguba niya ang iya mga imahen. Abi sang mga tawo, patyon sia sang ila mga dios. Sang wala ini matabo, narealisar nila nga mas gamhanan si Jehova sangsa ila mga dios. Nag-upod sila dayon kay Melesio kag sa iya pamilya sa pagtuon sing Biblia, nga nagagamit sang aton mga balasahon.

“Ginsilingan ko sila nga dapat nila sunugon ang ila mga anting-anting kag mga imahen,” siling ni Melesio. Madamo ang nagbiya sa ila mga disparatis, kag sobra na sa 80 ang nagatipon. Nalipay gid kami, gani nagdesisyon kami nga maghiwat sing pagtilipon sina mismo nga hapon. Ginpahibalo namon paagi sa mga manugkabayo ang mga nagatipon pirme sa balay ni Melesio. Bisan pa tungatunga sang semana kag subol na, 25 gihapon ang nagkadto. Ang iban naglakat lang kag ang iban nagsakay sa asno.

Naghiwat kami sing pamangkot kag sabat parte sa Biblia, kag gin-interpret ini ni Melesio. Namangkot sila: “Palangga bala kami ni Jehova bisan Indian kami?” “Ginapamatian bala niya ang O’dam nga pangamuyo?” “Kon mag-Armagedon, dumdumon bala niya kami bisan malayo kami sa siudad?” Paagi sa Biblia, nalipay kami nga ipakita sa sining mapainubuson nga mga tawo nga ginaulikdan ni Jehova ang mga mahagop, bisan ano man ang ila lenguahe ukon lugar. Siling nila, tani may makadto sa ila para matudluan pa gid sila.

Sa tapos sang pagtilipon, ginhatagan namon sila sang amon balon. Pagkagab-i, grabe katugnaw sa bukid, gani nagpasalamat kami sang ginpatulog nila kami sa kuarto nga wala pa mahuman. Pagkaaga, gin-updan nila kami sa lakturan pabalik sa amon salakyan, kag nagbiyahe kami pabalik sa Durango. Kapoy kami pero malipayon.

Pribilehiyo gid namon nga makilala ining sinsero nga mga tawo. Kalabanan sa ila indi kabalo magbasa, magsulat, ukon maghambal sing Espanyol, pero gusto gid nila magtuon parte sa matuod nga Dios kag magsimba sa iya! Halin sang nagbisita kami, anom pa ka Saksi ang nagkadto didto kag nagtener sing tatlo ka semana. Gintudluan nila ang 45 ka tawo nga gusto gid mag-alagad kay Jehova. Tanan sila nagatambong pirme sa mga pagtilipon.

Ang makapainteres pa kay ang isa gid lang ka tiangge sa Los Arenales wala na nagabaligya sigarilyo. Kay man, madamo na ang nagatuon sing Biblia kag nag-untat panigarilyo. Madamo man ang nagpakasal.

[Retrato sa pahina 24]

Si Melesio upod ang iya asawa, apat ka kabataan, kag ugangan

[Mga Retrato sa pahina 25]

Ang pagtuon sa Biblia kag ang Cristiano nga pagtilipon sa Los Arenales

[Picture Credit Line sa pahina 25]

Servicio Postal Mexicano, Correos de Mexico