‘Ang Iya mga Ginhimo Nag-upod sa Iya’

NATAPOS ni Theodore Jaracz, isa ka katapo sang Nagadumala nga Hubon sang mga Saksi ni Jehova, ang iya dutan-on nga kabuhi sang Mierkoles sang aga, Hunyo 9, 2010. Napatay sia sa edad nga 84. Si Melita, ang iya nabalo nga asawa nangin kaupod niya sa sulod sang 53 ka tuig. Ang iban pa sa pamilya ni Utod Jaracz nga buhi amo ang iya magulang nga babayi, isa ka hinablos nga lalaki kag duha ka hinablos nga babayi.

Natawo sia sang Septiembre 28, 1925 sa Pike County, Kentucky, U.S.A. kag nabawtismuhan sang Agosto 10, 1941 sa edad nga 15 anyos. Pagligad sang duha ka tuig, sang 17 anyos na sia, nagregular payunir sia kag amo ini ang umpisa sang iya halos 67 ka tuig nga bug-os tion nga pag-alagad.

Sang 1946, sa edad nga 20, nag-eskwela si Utod Jaracz sa ika-pito nga klase sang Watchtower Bible School of Gilead. Pagkatapos sang ila gradwasyon, gintangdo si Utod Jaracz subong manugtatap sang sirkito sa Cleveland, Ohio, Estados Unidos. Sang 1951, gin-asayn sia sa Australia subong alagad sang sanga. Ang 1983 Yearbook of Jehovah’s Witnesses nagreport nga “ginpalig-on gid [ni Utod Jaracz] ang mga kauturan sa bug-os nga pungsod paagi sa iya kakugi sa teokratikong mga kahimusan kag pagpakita sang maayo nga halimbawa sa latagon.”

Sang nagbalik sia sa Estados Unidos, ginpangasawa niya si Melita Lasko sang Disiembre 10, 1956. Magkaupod sila nga nag-alagad sa paglakbay nga hilikuton kag mapisan nga nagduaw sa mga sirkito kag mga distrito sa daku nga bahin sang Estados Unidos. Sang hingapusan nga bahin sang 1974, gin-agda si Utod Jaracz nga mangin bahin sang Nagadumala nga Hubon sang mga Saksi ni Jehova.

Si Utod Jaracz padayon nga pagadumdumon subong isa ka dedikado kag matutom nga alagad ni Jehova, nga bug-os tagipusuon nga nagkonsentrar sa teokratikong mga hilikuton. Isa sia ka mapinalanggaon kag matinatapon nga bana kag espirituwal nga tawo nga ginauna ang kaayuhan sang iban sangsa iya kaugalingon. (1 Cor. 13:4, 5) Ginpakita niya ang hanuot nga interes sa iban paagi sa pagpat-od nga ang tanan mapakig-angutan sing makatarunganon kag mainayuhon. Dugang pa, nakita man ang iya matuod nga gugma kag kabalaka sa mga tawo paagi sa iya kakugi sa ministeryo.

Bisan pa nasubuan kita sa kamatayon sining mapisan kag hinigugma nga katapo sang pamilya Bethel kag sang bug-os kalibutan nga paghiliutod, nalipay kita sa mainunungon nga pag-alagad ni Utod Jaracz kay Jehova sa madamo nga dekada. Nagasalig kita nga ‘ginpamatud-an niya nga matutom sia bisan tubtob sa kamatayon, kag nabaton niya ang korona sang kabuhi.’ (Bug. 2:10) Makapat-od man kita nga ‘ang iya mga ginhimo nag-upod sa iya.’—Bug. 14:13.