Pagsaka sa Pinakaubos sang Saba

ANG Olandes nga isla sang Saba isa anay ka kuta sang mga pirata sa Caribbean Sea. Sa karon, ining magamay nga isla, nga nahamtang mga 240 kilometros sa sidlangan sang Puerto Rico, may yara mga 1,600 ka pumuluyo, ang 5 sa ila mga Saksi ni Jehova. Apang, ining maisog nga mga ministro nagapangita sing butang nga mas bilidhon pa sangsa mga kinawat sang mga pirata. Mapisan sila nga nagapangita sing mga tawo nga “husto nga nahuyog sa kabuhi nga walay katapusan.”​—⁠Binuhatan 13:48.

Nakalab-ot ang maayong balita sang Ginharian sang Dios sa isla sang Hunyo 22, 1952, sang nagdungka sa baybayon sang Saba ang 18 metros nga sakayan nga Sibia sang mga Saksi ni Jehova. (Mateo 24:14) Ang mga misyonero nga sanday Gust Maki kag Stanley Carter nagsaka sa Hagdanan (The Ladder), isa ka alagyan nga may kapin sa 500 ka halintang nga bato pasaka sa minuro nga Pinakaubos (The Bottom), ang kapital sang Saba. * Sa sulod sang mga siglo, ining makitid nga banas amo lamang ang alagyan agod makadtuan ang mga pumuluyo sang isla.

Ang una nga report nga ginbalhag tuhoy sa pagpanaksi sang mga Cristiano sa Saba mabasa sa 1966 nga Tuigan nga Libro Sang mga Saksi ni Jehova. Suno sa sini nga report, isa lamang ang aktibo nga Saksi sa isla. Sang ulihi, isa ka pamilya halin sa Canada ang nagbantala sing maayong balita didto sa sulod sang pila ka tuig. Sining karon lang, sanday Russel kag Kathy, retirado nga mag-asawa gikan sa Estados Unidos, nagkadto sa Saba kag nakigbahin sa pagbantala didto. Binagbinaga ang ila istorya.

Pagduaw sa Saba

Nag-abot kami sang akon asawa sakay sa eroplano subong mga bisita ni Ronald, nga amo lamang  anay ang Saksi sa isla sang kalabanan nga bahin sang dekada 1990. Ginsugat niya kami sa erport. Nalipay gid sia sa regalo namon nga magamay nga kahon sang mga utanon, kay wala sing nagabaligya sang produkto halin sa uma sa isla. Sakay sa gamay nga trak, likoliko kami nga nagbiyahe pataklaron sa kilid sang Mount Scenery tubtob sa putukputukan sining patay nga bulkan.

Nagpundo kami sa minuro sang Hell’s Gate kag gintan-aw ni Ronald ang bulletin board kon yara gihapon ang pangagda para sa pamulongpulong publiko sa Domingo. Nalipay kami nga makita nga yara pa ini. Nagsakay sia liwat sa trak, kag nagpadayon kami sa pagtaklad padulong sa pinakadaku nga minuro sang isla, ang Windwardside. Subong sang ginapahangop sang ngalan sini, ining matahom nga minuro nahamtang sa parte sang isla nga bansada sa huyop sang hangin, nga nahamtang sa mga 400 metros sa ibabaw sang nibel sang dagat. Samtang nagahinampot kami sa balay ni Ron, nakita namon ang maduagon nga karatula sa balkon nga nagapakilala sa sini subong Kingdom Hall sang mga Saksi ni Jehova.

Sang tigpalanyaga ginpamangkot ko ang rason sang amon pagduaw, “Paano ka nangin manugbantala sang Ginharian sa Saba?”

“Sang matapos ang pagpatindog sang sanga sang mga Saksi ni Jehova sa Puerto Rico sang 1993,” siling ni Ron, “nangin interesado kami sang akon asawa nga magpabilin sa isa ka asaynment sa iban nga pungsod. Antes sini, nakaduaw na kami sa Saba upod sa isa ka mag-asawa nga payunir kag nahibaluan namon nga may 1,400 ka pumuluyo diri apang wala sing Saksi. Gani ginsugilanon namon ang Komite Sang Sanga sang Puerto Rico tuhoy sa amon plano nga magsaylo diri.

“Paborable ang mga hitabo, kag sang ulihi ginpasugtan kami sa pagsaylo. Sing makapasubo, pagligad sang duha ka tuig ang akon asawa nagmasakit sing grabe, gani nagbalik kami sa California. Pagkatapos sang iya kamatayon, nagbalik ako sa Saba. Kahibalo ka, indi ko abi luyag nga indi pagtapuson ang isa ka butang nga akon na nasugdan.”

Pagpanaksi sa mga Pamalay sa Saba

Ang salas sang 100-anyos nga balay ni Ron ginagamit man subong Kingdom Hall.⁠ * Samtang nagapamahaw kami kag nagahanda para sa paggua sa ministeryo, ginsugbuhan sang ulan gikan sa naglabay nga gal-um ang dapog sa gua. Pagkatapos sang pamahaw, naglakat kami bisan magal-um agod magpanaksi sa mga pamalay sa Pinakaubos. Sa kada balay, ginatamyaw ni Ron ang tagbalay sa ila ngalan. Ang amon paghinun-anon nasentro sa bag-ong lokal nga balita. Kilala sang kalabanan nga tawo si Ron kag pamilyar sila sa iya ministeryo, kag madamo ang gilayon nga nagbaton sing mga literatura pasad sa Biblia.

Mabudlay maghupot sing rekord sang mga interesado sa mensahe sang Ginharian kon indi mo kilala ang mga tagaminuro. Ngaa? Bangod sang “layi nga ang tanan nga balay dapat pinturahan sing pareho nga duag,” siling ni Ron. Matuod gid ini kay sang gintan-aw ko ang palibot, nakita ko nga ang tanan nga balay sa Saba duag-puti nga may pula nga mga atop.

Pagkatapos sang amon paghinun-anon sa Biblia, gin-agda namon ang tagbalay sa pagtambong sa pamulongpulong publiko pasad sa Biblia nga pagahiwaton sa Domingo sa Kingdom Hall. Kon yari diri si Ron, sia ang nagahatag sing pamulongpulong publiko kada semana. Sa karon, may yara 17 ka pagtuon sa Biblia nga ginadumalahan sa Saba. Duha ka pulo ka tawo ang nagtambong sa Memoryal sang kamatayon ni Cristo sang 2004. Kag bisan pa ini nga numero daw diutay lamang, katumbas ini sa 1 ka porsiento sang bug-os nga populasyon sang Saba!

Sa pagkamatuod, nagapanikasog gid ang mga Saksi ni Jehova nga mapalab-utan ang madamo nga tawo sang mensahe sang pagluwas sang Dios. Sa magamay man nga isla kaangay sang Saba ukon sa isa ka bug-os nga kontinente, ang mga Saksi ni Jehova matutom nga nagatuman sang sugo nga “maghimo sing mga disipulo sa mga tawo sang tanan nga kapungsuran.”​—⁠Mateo 28:19.

Nasubuan kami nga ang amon pagduaw natapos na. Sang masakay na kami sa eroplano, nagbabay kami. Indi gid namon malipatan ang amon pagduaw sa Saba kag ang amon pagsaka sa Pinakaubos.

[Mga nota]

[Mga Mapa sa pahina 10]

(Para sa aktual nga pormat, tan-awa ang publikasyon)

PUERTO RICO

[Credit Line sang retrato sa pahina 10]

Background: www.sabatourism.com